ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីបិទវគ្គបណ្ដុះបណ្ដាលយុវជនស្ម័គ្រចិត្តទូទាំង ២៥ រាជធានី/ខេត្ត កាលពីពេលថ្មីៗនេះ ឯកឧត្តម សេរី ជំនះ រដ្ឋលេខាធិការ នៃក្រសួងអប់រំ យុវជន និងកីឡា បានមានប្រសាសន៍ ដោយលើកទឹកចិត្តយុវជនចូលរួមការងារស្ម័គ្រចិត្តនៅតាមសហគមន៍ឱ្យបានច្រើន ដើម្បីអភិវឌ្ឍសមត្ថភាពក្រៅម៉ោងសិក្សាបន្ថែម។
ឯកឧត្តម សេរី ជំនះ មានប្រសាសន៍ថា ការស្ម័គ្រចិត្តដើម្បីសហគមន៍ខ្ញុំ ឬហៅថា “ស.ស.ខ.” គឺជាកម្មវិធីដែលបង្កើតឡើងដើម្បីជួយអភិវឌ្ឍសមត្ថភាពរបស់យុវជន សហគមន៍ និងស្ថាប័ន តាមរយៈយន្តការការងារស្ម័គ្រចិត្ត។ កម្មវិធីបានជ្រើសរើសយុវជនស្ម័គ្រចិត្តទូទាំងប្រទេស ហើយធ្វើការបណ្ដុះបណ្ដាលលើជំនាញគ្រប់គ្រងគម្រោង ជំនាញទន់ ជំនាញរឹង បច្ចេកវិទ្យាឌីជីថល និងជំនាញបច្ចេកទេសផ្សេងៗ។
រដ្ឋលេខាធិការក្រសួងអប់រំ បន្ថែមថា ក្រោយទទួលការបណ្ដុះបណ្ដាលទាំងផ្ទាល់ និងតាមប្រព័ន្ធវីដេអូអនឡាញរួចហើយ យុវជនអាចប្រើប្រាស់ជំនាញទាំងអស់នោះ ដើម្បីកំណត់បញ្ហា ឬតម្រូវការរបស់សហគមន៍ និងសរសេរសំណើឯកសារគម្រោង ដើម្បីដោះស្រាយ ឬកែលម្អបញ្ហាទាំងនោះ និងអនុវត្តគម្រោងរបស់ខ្លួនផ្តោតលើប្រធានបទពាក់ព័ន្ធនឹងវិស័យធំៗចំនួន៨ រួមមាន៖ វិស័យអប់រំ សុខាភិបាល សេវារដ្ឋបាល ទេសចរណ៍ កសិកម្ម បរិស្ថាន សហគ្រិនភាព និងឧស្សាហកម្ម៤.០។
ឯកឧត្តម សេរី ជំនះ បន្ថែមថា ការអនុវត្តគម្រោងតូចៗនៅតាមសហគមន៍នេះ គឺជួយជំរុញសកម្មភាពក្រៅម៉ោងសិក្សាមួយ ដែលឆ្លើយតបទៅនឹងការសម្រួចអាទិភាពនៃកំណែទម្រង់វិស័យអប់រំ យុវជន និងកីឡា និងការជំរុញការអនុវត្តស្តង់ដារសាលារៀនគំរូ ហើយក៏បានឆ្លុះបញ្ចាំងយ៉ាងច្បាស់ពីកម្លាំងស្ម័គ្រចិត្តរបស់យុវជន ក្នុងការលើកកម្ពស់ការងារស្ម័គ្រចិត្តផងដែរ។
រដ្ឋលេខាធិការក្រសួងអប់រំបញ្ជាក់ថា សកម្មភាពនេះ គឺជាការសិក្សាបែបអនុវត្តន៍ជាក់ស្ដែងមួយដែលផ្តល់ដល់យុវជនស្ម័គ្រចិត្តនូវបទពិសោធន៍ដ៏មានតម្លៃ និងមានភាពសម្បូរបែប ដូចជា ការកសាងនូវមូលដ្ឋានសម្រាប់ការបង្កើតទំនាក់ទំនងក្នុងសង្គម ការពង្រឹង និងពង្រីកចំណងមិត្តភាព សាមគ្គីភាព និងការយោគយល់គ្នាទៅវិញទៅមក តាមរយៈការបញ្ចូលនូវខ្លឹមសារគន្លឹះសំខាន់ៗដូចជា ការការពារខ្លួន ការស្វែងរកឬសគល់បញ្ហាកើតឡើងនៅក្នុងសហគមន៍ ការរៀបចំបង្កើតគម្រោង ការវាយតម្លៃហានិភ័យ ការស្វែងរកធនធានគាំទ្រ ជំនាញនិយាយជាសាធារណៈ ការធ្វើការងារជាក្រុម កិច្ចសហប្រតិបត្តិការ និងទស្សនកិច្ចសិក្សាជាដើម។
បើតាម ឯកឧត្តម សេរី ជំនះ ការអនុវត្តគម្រោងរបស់យុវជន បានចូលរួមដោះស្រាយ ឬកែលម្អបញ្ហារបស់សហគមន៍ និងជាការរៀនសូត្រតាមរយៈការអនុវត្តជាក់ស្ដែងលើជំនាញដែលត្រូវបានបណ្ដុះបណ្ដាល។ ជាមួយគ្នានេះ សមត្ថភាពរបស់ស្ថាប័ន ត្រូវបានពង្រឹងតាមរយៈការដោះស្រាយបញ្ហា ការដឹកនាំ និងគ្រប់គ្រងលើយុវជនស្ម័គ្រចិត្ត។
គួរជំរាបជូនថា ជារៀងរាល់ឆ្នាំ កម្មវិធីការស្ម័គ្រចិត្តដើម្បីសហគមន៍ខ្ញុំ តែងតែជ្រើសរើសគម្រោងចំនួន៣ ជាគម្រោងឆ្នើមប្រចាំប្រទេស នៃឆ្នាំអនុវត្ត និងគម្រោងឆ្នើមរងប្រចាំប្រទេសចំនួន៣។ គម្រោងឆ្នើម និងឆ្នើមរង នឹងទទួលបានថវិកាឧបត្ថម្ភ ពានជ័យលាភី និងមេដាយពីក្រសួងអប់រំ យុវជន និងកីឡា៕
