ស្ថិតក្នុងដំណាក់កាលត្រៀមប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប សិស្សានុសិស្សមួយចំនួនក៏កំពុងខិតខំស្វ័យសិក្សា រំលឹកមេរៀន ធ្វើលំហាត់ ឬវិញ្ញាសាចាស់ៗជាដើម។ ទន្ទឹមគ្នានេះ សិស្សានុសិស្សមួយចំនួនទៀត ក៏ជួបបញ្ហាផ្ទាល់ខ្លួន បញ្ហាក្រុមគ្រួសារ ឬឧបសគ្គជីវិតដទៃទៀតមករាំងស្ទះដែលធ្វើឱ្យរំខានដល់ការរៀនត្រៀមប្រឡងបាក់ឌុប។  

យ៉ាងណាមិញ លោកបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា បានផ្តល់អនុសាសន៍ថា ដើម្បីប្រឡងជាប់មកដល់ម៉ោងនេះ សិស្សានុសិស្សកុំគិតអ្វីដែលអវិជ្ជមាននាំឱ្យប៉ះពាល់ដល់អារម្មណ៍ ឬការគិត ហើយត្រូវផ្ដោតតែលើការរៀនសូត្រឱ្យបានល្អ ដូចជាកសាងក្រុមរៀនត្រៀមប្រឡងបាក់ឌុប ដោយរកកន្លែងរៀនល្អ ធ្វើឱ្យខួរក្បាលល្អ ដើម្បីរៀនឆាប់យល់ និងឆាប់ចាំ។

«ប្អូនៗអាចសុំទោសគ្រួសារថា ក្នុងមួយខែនេះ កុំនិយាយអ្វីឱ្យប៉ះពាល់ដល់អារម្មណ៍ខ្ញុំ គឺដើម្បីប្រឡងបាក់ឌុបជាប់»

បណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា

បើតាមលោកបណ្ឌិត តាន់ មុនីវណ្ណ សិស្សានុសិស្សជាបេក្ខជនត្រៀមប្រឡងបាក់ឌុបថ្ងៃខាងមុននេះ ក៏ត្រូវត្រៀមលុយសម្រាប់ទិញម្ហូបអាហារណាដែលជួយឱ្យមានសុខភាពល្អ។ ហើយក្នុងនោះ សិស្សានុសិស្សក៏មិនបាច់ដាក់សម្ពាធលើខ្លួនឯង ហើយខំប្រឹងរៀនពេកដែរ  ព្រោះពេលខ្លះអាចឆាប់ភ្លេចមេរៀនថ្មីៗ តែអ្វីដែលសំខាន់បំផុត គឺបំប៉នខួរក្បាលឱ្យមានសុខភាពល្អ ដើម្បីប្រឡងជាប់ ។

«មុនថ្ងៃប្រឡងមួយខែឬ២ខែ សិស្សានុសិស្សត្រូវរំលឹករៀនឱ្យអស់ ប៉ុន្តែថ្ងៃប្រឡងអាចរំលឹកបន្តិចបន្តួច ហើយគេងឱ្យឆ្អែត កុំភ័យ កុំព្រួយ »

បណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា

អនុប្រធានសភាពាណិជ្ជកម្មកម្ពុជា បញ្ជាក់បន្ថែមថា បើតាមបទពិសោធន៍របស់លោក សិស្សានុសិស្សគួរត្រៀមប៊ិកឱ្យបានច្រើន ចាប់ពីពីរឡើងទៅ ដោយត្រូវរកប៊ិកណាដែលសរសសេរលឿន ត្រៀមជាប់ខ្លួន ព្រោះប៊ិកខ្លះសរសេរតឹង សរសេរអត់ទៅមុខ ដែលនាំឱ្យមានការលំបាកក្នុងការសរសេរពេលកំពុងប្រឡង។

គួរជម្រាបជូនថា ការប្រឡង​សញ្ញាបត្រមធ្យមសិក្សា​ទុតិយភូមិ ឬបាក់ឌុប សម្រាប់ឆ្នាំ​សិក្សា២០២២-២០២៣ នឹងប្រព្រឹត្តទៅរយៈពេល​២ថ្ងៃ គឺនៅថ្ងៃទី៦ និង​ថ្ងៃទី៧ ខែវិច្ឆិកា ឆ្នាំ​២០២៣៕