ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ — ដើម្បីឆ្លើយតបទៅនឹងការវិវត្តយ៉ាងរហ័ស នៃសេដ្ឋកិច្ច និងតម្រូវការកម្លាំងពលកម្មជំនាញ ព្រឹទ្ធបុរសមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ លោកបណ្ឌិត សុខ សូត្រ បានផ្តល់នូវអនុសាសន៍សំខាន់ចំនួន ៣ ដែលជាយុទ្ធសាស្ត្រក្នុងការបន្តពង្រឹងគុណភាពអប់រំ និងធានាថា ការបណ្តុះបណ្តាលធនធានមនុស្សដើរទន្ទឹមគ្នានឹងតម្រូវការទីផ្សារការងារជាក់ស្តែង។
បើតាមលោកបណ្ឌិត សុខ សូត្រ ការផ្លាស់ប្តូរត្រូវធ្វើឡើងចាប់ពីកម្រិតបុគ្គល រហូតដល់កម្រិតស្ថាប័ន ដូចជា៖
ទី១. សម្រាប់គ្រូបង្រៀន ៖ ត្រូវផ្លាស់ប្តូរពីការបង្រៀនបែបប្រពៃណី មកជាការបង្រៀនដែលផ្តោតលើសិស្សជាមជ្ឈមណ្ឌល និងការប្រើប្រាស់ទិន្នន័យ (Data-driven) ដើម្បីវាយតម្លៃសិស្ស។ គ្រូត្រូវមានសមត្ថភាពប្រើប្រាស់បច្ចេកវិទ្យា និងវិធីសាស្ត្របង្រៀនបែបថ្មី ដើម្បីធានាថា សិស្សមិនត្រឹមតែចេះចាំមេរៀនទេ តែមានបំណិនត្រិះរិះពិចារណា និងដោះស្រាយបញ្ហា ដែលជាបំណិនចាំបាច់សម្រាប់ទីផ្សារការងារ។
ទី២. សម្រាប់សិស្ស/និស្សិត ៖ ត្រូវងាកមកចាប់អារម្មណ៍លើមុខវិជ្ជា STEM (វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា) ព្រោះរបាយការណ៍បង្ហាញថា មានតែ ២០% ប៉ុណ្ណោះដែលចាប់យកជំនាញនេះ។ ទន្ទឹមនឹងជំនាញរឹង សិស្សត្រូវពង្រឹង «បំណិនទន់» និងត្រៀមខ្លួនសម្រាប់ទីផ្សារការងារតាំងពីនៅរៀន ដោយចូលរួមការងារស្ម័គ្រចិត្ត ឬកម្មវិធីហាត់ការនានា។
ទី៣. សម្រាប់ស្ថាប័នអប់រំ ៖ ចាំបាច់ត្រូវពង្រឹង «ភាពជាដៃគូជាមួយវិស័យឯកជន/ឧស្សាហកម្ម»។ ភាពជោគជ័យនៃគម្រោងនេះបានបង្ហាញថា ការសហការរចនាកម្មវិធីសិក្សាជាមួយនិយោជក គឺជាកត្តាកំណត់អត្រាការងាររបស់និស្សិត។ លើសពីនេះ ស្ថាប័នត្រូវជំរុញការស្រាវជ្រាវឱ្យបានខ្លាំងក្លា និងធ្វើឱ្យប្រព័ន្ធគ្រប់គ្រងសាលារៀន (School-Based Management) និងយុទ្ធសាស្ត្រសហគមន៍សាលារៀន (School Community Strategy) កាន់តែមានប្រសិទ្ធភាព។
យ៉ាងណាក៏ដោយ បើតាមលោកបណ្ឌិត សុខ សូត្រ ការពង្រឹងគុណភាពពីថ្នាក់ក្រោម (Foundational Learning) គឺជាកូនសោរដ៏សំខាន់ដែលមិនអាចខ្វះបាន ដើម្បីឈានទៅរកភាពជោគជ័យនៅកម្រិតឧត្តមសិក្សា និងការងារនាពេលអនាគត៕
