បុគ្គល នីមួយៗ មានតួនាទីថែទាំផ្លូវចិត្តដោយខ្លួនឯង តែយ៉ាងណាការទទួល ឬផ្តល់ការគាំទ្រចំពោះគ្នាទៅវិញទៅមក ក៏ជាចំណែកដែលមិនគួរមើលរំលងដែរ មានដូចជា ការផ្តល់ជាកម្លាំងចិត្ត ការសួរសំណួរបំផុសនិងការឆ្លុះបញ្ចាំង ក៏ដូចជាដើម្បីពង្រឹងផលិតភាពក្នុងក្រុម និងកាត់បន្ថយភាពតានតឹង។ តាមរយៈគេហទំព័រ Inc. This Morning បានបង្ហាញសំណួរ១០ ក្នុងការជួយស្រោចស្រង់ស្ថានភាពមិនល្អ ជាពិសេសពេលសមាជិកក្រុមមិនមានថាមពលគ្រប់គ្រាន់ក្នុងការបំពេញបេសកកម្ម។

១. តើគេងបានត្រឹមត្រូវតាមកាលវិភាគទេ? ប្រភេទការងារខ្លះ ការចោទសំណួរបែបនេះ ហាក់ដូចជាប្រហារផ្លូវចិត្តបន្តិច តែយ៉ាងណា ការគេងបានគ្រប់គ្រាន់ គេងស្ងប់ និងមានកាលវិភាគគេងបានទៀតទាត់ មានតួនាទីសំខាន់ក្នុងការគ្រប់គ្រងស្រ្តេស និងរក្សាតុល្យភាពអារម្មណ៍ប្រចាំថ្ងៃ។

 ២.​ កាត់ផ្តាច់ពីស្រ្គីនបានបួនម៉ោងមុនពេលចូលគេងដែរឬទេ? ពន្លឺដែលជះចេញពីកញ្ចក់ទូរស័ព្ទ ឬកុំព្យូទ័រ ប៉ះពាល់យ៉ាងខ្លាំងចំពោះគុណភាពនៃការគេង។ ដូច្នេះការបំផុសសំណួរបែបនេះ គឺជាការផ្តល់សារដាស់តឿនឱ្យរក្សាគម្លាតពីអេក្រង់មុនពេលទទួលទានដំណេក។

៣. ហាត់ប្រាណបានទៀងទាត់ដែរទេ? លំហាត់ប្រាណជាចំណែកមួយជួយពង្រឹងរបៀបរស់នៅឱ្យមានគុណភាព ដោយហេតុថា ការហាត់ប្រាណបានទៀងទាត់ជួយឱ្យរាងកាយមានសមត្ថភាពគ្រប់គ្រាន់ក្នុងការទប់ទល់នឹងអាការៈតានតឹង ក៏ដូចជាជួយឱ្យស្រឡះខួរក្បាលផងដែរ។

៤. រៀបចំកន្លែងការងារបានល្អដែរទេ? កាលដែលបន្តទុកឱ្យសណ្តាប់ធ្នាប់មិនមានរបៀបរៀបរយ ជាពិសេសនៅលើតុដែលត្រូវអង្គុយធ្វើការរាល់ថ្ងៃបានជះផលអវិជ្ជមានចំពោះសុខភាពផ្លូវចិត្ត រួមទាំងប៉ះពាល់ទៅដល់សមត្ថភាពនៃការផ្តោតស្មារតីលើកិច្ចការប្រចាំថ្ងៃ។

៥. បានផ្តោតលើការងារតែមួយដែរទេ ? ផ្តោតលើសកម្មភាពជាច្រើនក្នុងពេលតែមួយពុំនាំនូវផលចំណេញប៉ុន្មាននោះទេ ដើម្បីកាត់បន្ថយអារម្មណ៍តានតឹង ការផ្តោតលើភារកិច្ចមួយក្នុងពេលតែមួយ អាចជួយឱ្យការងារសម្រេចបានលឿន។

៦. បានសរសេរសេចក្ដីរំលឹកដឹងគុណ ឬក៏ការឆ្លុះបញ្ចាំងដែរទេ? ភាពរីកចម្រើន វិលាសភាពនៃលទ្ធផល និងការសម្រេចគោលដៅឱ្យបានលឿន ឬច្រើន នេះជាអ្វីដែលមនុស្សមួយចំនួយបានរំពឹងទុក ទោះស្មារតីមានការផ្តោតខ្លាំងទៅលទ្ធផលក្ដី យ៉ាងណាគួរតែទុកចន្លោះខ្លះ ក្នុងការសិក្សាឆ្លុះបញ្ចាំងបន្ថែម។ ហើយព្យាយាមពេញចិត្តចំពោះអ្វីដែលបានសម្រេចនាពេលកន្លងមក និងរក្សាផ្នត់គំនិតវិជ្ជមាន។ ការរក្សាសកម្មភាពបែបនេះបានជាប្រចាំ ជាកត្តាជំរុញឱ្យស្ថានភាពផ្លូវចិត្តកាន់តែល្អប្រសើ អភិវឌ្ឍន៍គុណភាពនៃការគេង ទំនាក់ទំនង និងសុខុមាលភាពទូទៅ។

៧. ទុកចន្លោះក្នុងការបន្ថយភាពតានតឹងដែរទេ? គិតពីសកម្មភាពដែលមិនអាចទៅរួច ឬរក្សាផ្នត់គំនិតអវិជ្ជមាន ជាកត្តាប៉ះពាល់ទៅកាន់ផលិតភាព ជំរុញឱ្យខ្សោះថាមពលក្នុងការប្រត្តិបត្តិការងារប្រចាំថ្ងៃ។ រៀ​ងរាល់ពេលមានបញ្ហានៅកន្លែងការងារ គួរតែទុកចន្លោះខ្លះដើម្បីសម្រាក ក៏ដូចជាការលើកទឹកចិត្តឱ្យមានកិច្ចសន្ទនាមួយបែបបើកចំហ រកដំណោះស្រាយដោយសន្តិវិធី។

៨. តើរៀបផែនការដើម្បីគ្រប់គ្រងការផ្តោតដែរទេ? នៅពេលដែលកាលវិភាគផ្ទុកការងារលើសចំណុះ បណ្តាលឱ្យស្ថានភាពផ្លូវចិត្តធ្លាក់ចុះបានយ៉ាងងាយ ហើយជាការឆ្លើយតបទៅនឹងស្ថានការណ៍នេះ ការកំណត់កិច្ចការសំខាន់ៗទៅតាមលេងរៀង ដែលយ៉ាងហោចណាស់កំណត់អាទិភាព៣ប្រភេទក្នុងមួយថ្ងៃ។​

៩. តើបានសរសេរកំណត់ហេតុដើម្បីសម្រាលបន្ទុកខួរក្បាលដែរទេ? សរសេរកំណត់ហេតុប្រចាំថ្ងៃ ឬការកត់ត្រាព្រឹត្តិការណ៍សំខាន់ៗដែលបានកើតមាន ជាចំណែកក្នុងការគ្រប់គ្រងការគិតដែលស្មុគស្មាញ ក៏ដូចជាបង្កើនការចងចាំផងដែរ។

១០. រៀបចំកញ្ចប់ថវិកាបានត្រឹមត្រូវដែរឬទេ? ការគ្រប់គ្រងហិរញ្ញវត្ថុមិនបានល្អ គឺជាមូលហេតុមួយក្នុងចំណោមមូលហេតុជាច្រើន អាចបណ្តាលឱ្យមានភាពតានតឹង មិនថាក្នុងជីវិតឯកជន ឬក៏បែបជាលក្ខណៈគ្រួសារនោះទេ។ កាលដែលមានទម្លាប់គ្រប់គ្រងថវិកាបានល្អ មិនត្រឹមតែជួយឱ្យពង្រឹងគោលដៅមួយដែលមានភាពច្បាស់លាស់នោះទេ ប៉ុន្តែជាចំណែកកាត់បន្ថយភាពតានតឹងផងដែរ៕