ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ល្បែងចោលឈូង ជាល្បែងប្រជាប្រិយដែលប្រជាជនខ្មែរនិយមលេងនៅពេលពិធីបុណ្យចូលឆ្នាំខ្មែរ ។ ល្បែងចោលឈូងនេះ បានចាត់ទុកថា ជួយហាត់ភ្នែកឱ្យឈ្លាសវៃ ហាត់ដៃឱ្យត្រង់ផង ជាការកម្សាន្តសប្បាយ ដោយមានការរាំច្រៀងលាយជាមួយផង។ នេះបើយោងតាមសៀវភៅ ល្បែងប្រជាប្រិយខ្មែរ របស់ ក្រុមជំនុំទំនៀមទម្លាប់ខ្មែរ។
គោលបំណងនៃការបង្កើតល្បែងចោលឈូងនេះ គឺដើម្បីឱ្យពលរដ្ឋកម្ពុជាគ្រប់រូប ជាពិសេសកំលោះ ក្រមុំ បានជួបជុំគ្នា និងលេងសប្បាយ ក្នុងរដូវចូលឆ្នាំថ្មី។ ល្បែងនេះ មិនត្រឹមតែធ្វើឱ្យបរិយាកាសនៃការជួបជុំយុវជនរីករាយប៉ុណ្ណោះទេ តែថែមទាំងបង្ហាត់បង្រៀនពួកគេ ឱ្យមានភ្នែកឱ្យឈ្លាសវៃ និងហាត់ដៃឱ្យត្រង់ផងដែរ។
ហេតុផលដែលថា ល្បែងចោលឈូង អាចធ្វើភ្នែកឱ្យឈ្លាសវៃ និងហាត់ដៃឱ្យត្រង់ ព្រោះទាំងក្រុមនារី និងក្រុមបុរស ដែលជាអ្នកចូលរួមលេង ត្រូវតែប្រុងប្រ័យត្នទាំងសងខាង ក្នុងការចាប់ឈូង។
ល្បែងចោលឈូង គេចែកគ្នាជា ២ក្រុម គឺប្រុស ១ក្រុម និងស្រី១ក្រុម។ ក្នុង ១ក្រុមៗ មានគ្នាចំនួនពី ១០នាក់ ឬ២០នាក់ឡើងទៅ ឈរតម្រៀបជា ២ជួរ ទល់មុខគ្នា ឃ្លាតពីគ្នាប្រមាណជា ៨ឬ១០ម៉ែត្រ។ គេយកក្រមា ឬកន្សែងមកធ្មូលឱ្យមូលចងរឹតឱ្យតឹងណែនល្អ ទុកឱ្យមានកន្ទុយបន្តិចហៅថា «ឈូង» សម្រាប់កាន់បោះ ឬបោះចោលទៅមករកគ្នា។
មុនដំបូង ពួកបុរសៗ បោះឈូងទៅឱ្យពួកនារីៗ ដោយតម្រូវឱ្យក្រុមនារី ចាប់ឈូងឱ្យបាន។ បើភាគីនារីចាប់ឈូងមិនបាន ហើយបណ្តាលឱ្យធ្លាក់ដល់ដី គេចាត់ទុកជាស្អុយ។ បន្ទាប់មក ខាងនារី ត្រូវបោះឈូងទៅខាងបុរសវិញម្តង។ នៅពេលខាងបុរសចាប់ឈូងបាន នោះពួកគេនឹងចោលសំដៅទៅខាងនារី បើចោលឈូងត្រូវនារីណាហើយ នារីនោះត្រូវយកឈូងទៅជូនខាងប្រុស អមដោយចម្រៀងនិងការរាំផង ហៅថា «ច្រៀងរាំជូនឈូង»។
នៅពេលច្រៀងរួចហើយ ក៏ហុចឈូងនោះទៅឱ្យបុរសវិញ។ បន្ទាប់មក ក្រុមបុរស ក៏ផ្ដើមបោះឈូងនោះទៅឱ្យក្រុមនារីវិញ។ នៅពេលក្រុមនារីចាប់ឈូងបាន ពួកគេត្រូវចោលសំដៅទៅក្រុមបុរស បើចោលឈូងត្រូវបុរសណា បុរសនោះ ត្រូវច្រៀងរាំ នាំឈូងទៅជូននារី វិញម្តង។ ហេតុដូច្នេះហើយ ក្នុងអំឡុងនៃការលេងល្បែងនេះ ទាំងភាគីនារី និងភាគីបុរស ត្រូវតែប្រើភ្នែកឱ្យឈ្លាសវៃ និងហាត់ដៃឱ្យត្រង់ ដើម្បីចោលឈូងឱ្យចំគោលដៅ ឬចាប់ឈូងឱ្យបាន។
គួរជម្រាបជូនថា ពិធីបុណ្យចូលឆ្នាំថ្មីប្រពៃណីជាតិ គ្រោងនឹងប្រារព្ធធ្វើនៅថ្ងៃទី១៤, ១៥ និង ១៦ ខែមេសា ខាងមុខ។ ដើម្បីអបអរដល់ពិធីបុណ្យចូលឆ្នាំខ្មែរនេះ ស្ទើរតែគ្រប់ខេត្តក្រុងនៃប្រទេសកម្ពុជា សុទ្ធសឹងតែរៀបចំនូវព្រឹត្តិការណ៍សង្រ្កាន្ត ដោយមានការលេងល្បែងប្រជាប្រិយ៍ខ្មែរ ក្នុងនោះក៏មានការលេងបោះឈូងនេះដែរ៕
