ភ្នំពេញ – «កីឡាគ្មានថ្នាំជក់» ​កំពុងអនុវត្តក្នុងព្រឹត្តិការណ៍ការប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលើកទី១២ នៅ​ឆ្នាំ២០២៣នេះ ខណៈប្រទេស​កម្ពុជា​ធ្វើជា​ម្ចាស់ផ្ទះ។ នេះមានន័យថា ការផ្សាយពាណិជ្ជកម្មបារី ឬបារីអេឡិចត្រូនិក និងការឧបត្ថម្ភផ្សេងៗរបស់ក្រុមហ៊ុនថ្នាំជក់ ឬក្រុមហ៊ុនបារីអេឡិចត្រូនិក រួមទាំងការប្រើប្រាស់ថ្នាំជក់ក្នុង​ព្រឹត្តិការណ៍​កីឡានេះ ត្រូវបានហាមឃាត់។

លោក តុន ច័ន្ទរិទ្ធិ ជាអ្នកនិពន្ធឯករាជ្យ បាននិយាថា ការអនុវត្តកីឡាគ្មានថ្នាំជក់ក្នុងព្រឹត្តិការណ៍ប្រកួតកីឡាស៊ីហ្គេមពិតជាមានសារៈសំខាន់រួមមាន ទី១.អ្នកចូលរួមផ្ទាល់មានមនសិកាលះបង់ដើម្បីប្រទេសជាតិ។ ឧទាហរណ៍ថា ប្រសិនបើពីមុនពួកគាត់ធ្លាប់ប្រើប្រាស់ថ្នាំជក់ គឺចាប់ផ្ដើមឈប់ប្រើប្រាស់ដើម្បីចូលរួមឱ្យតម្លៃដល់ប្រទេសជាតិរបស់ខ្លួន ទី២.ល្អដល់អ្នកចូលរួមទាំងអស់ ទាំងសុខភាព ទាំងអារម្មណ៍របស់ពួកគាត់មិនទទួលបានអារម្មណ៍រំខានពីផ្សែងបារី ឬបារីអេឡិចត្រូវនិចមកប៉ះពាល់ដល់សុខភាពរបស់គាត់។ ទី៣. ជារឿងល្អសម្រាប់ប្រទេសជាតិដោយសារបរទេសគេនឹងឱ្យតម្លៃយើងតាមនោះ នៅពេលដែលយើងមានច្បាប់វិធានការតឹងរឹង និងអនុវត្តបានល្អ។

លោក តុន ច័ន្ទរិទ្ធិ ជាអ្នកនិពន្ធឯករាជ្យ

“ខ្ញុំចង់ឃើញកម្ពុជានឹងដាក់វិធានការតឹងរឹងថែមទៀត មិនគ្រាន់តែចេញសេចក្ដីណែនាំ ប៉ុន្តែមានអ្នកត្រួតពិនិត្យត្រឹមត្រូវដល់អ្នកចូលរួមទស្សនា ព្រមទាំងផ្សព្វផ្សាយបន្ថែមទៀតឱ្យបានទូលំទូលាយតាមរយៈទូរទ្សន៍ ឬបិទផ្ទាំងប៉ាណូអំពីនិមិត្តសញ្ញាហាមជក់បារីនៅតាមទីសាធារណៈឱ្យបានច្រើន។ លើសពីនេះ បដិសេធការស្នើសុំសហការពីក្រុមហ៊ុនថ្នាំជក់ ដើម្បីឱ្យសេចក្ដីណែនាំកាន់តែមានតម្លៃ”

អ្នកនិពន្ធឯករាជ្យ រូបនេះ ក៏បានលើកទឹកចិត្តទៅដល់យុវជនផ្សេងទៀត សូមគិតគូពីបញ្ហានេះ ហើយសូមចូលរួមទាំងអស់គ្នាដើម្បីប្រទេសជាតិយើង ដើម្បីមុខមាត់សង្គមរបស់យើង ដែលជាការឱ្យតម្លៃខ្លួនឯងដែរបើសិនយើងចេះគោរពច្បាស់ ចេះឱ្យតម្លៃទៅលើច្បាប់ ឱ្យតម្លៃទៅលើសេចក្ដីណែនាំ ដូចយើងឱ្យតម្លៃទៅលើខ្លួនឯងដែរ។ ដូច្នេះ សូមចូលរួមទាំងអស់គ្នាដើម្បីកុំឱ្យមានផ្សែងបារី។

កញ្ញា សៀក ពេជ្ររចនា ម្ចាស់ជ័យលាភីនិយាយជាសាធារណៈស្ដីពីថ្នាំជក់ បានប្រាប់ឱ្យដឹងថា សម្រាប់ការអនុវត្តគោលការណ៍កីឡាគ្មានថ្នាំជក់ មានសារៈសំខាន់ខ្លាំងដោយកម្ពុជាមិនត្រឹមតែអនុវត្តក្នុងព្រឹត្តិការណ៍ស៊ីហ្គេមនោះទេ គឺអាចអនុវត្តបានរហូតតែម្ដងដើម្បីកាត់បន្ថយផលប៉ះពាល់នៃផលិតផលថ្នាំជក់ដល់អត្តពលិក យុវជនស្ម័គ្រចិត្ត និងយុវជនដែលចូលរួមទស្សនា។ លើសពីនេះ បង្ហាញទៅដល់ភ្ញៀវអន្តរជាតិទាំងអស់ឱ្យបានដឹងថា កម្ពុជាពិតជាបានលើកកម្ពស់សុខភាព និងសុខមាលភាពរបស់ប្រជាពលរដ្ឋ ដោយមិនមានការផ្សព្វផ្សាយពីថ្នាំជក់ និងហាមឃាត់ការប្រើប្រាស់ ជាពិសេសកាត់បន្ថយការជះឥទ្ធិលពលអាក្រក់ទៅយុវជនជំនាន់ក្រោយផងដែរ។

កញ្ញា សៀក ពេជ្ររចនា ម្ចាស់ជ័យលាភីនិយាយជាសាធារណៈស្ដីពីថ្នាំជក់

“ខ្ញុំគាំទ្រចំពោះរាជរដ្ឋាភិបាលយ៉ាងពេញទំហឹងចំពោះការអនុវត្តគោលការណ៍ស្ដីពីកីឡាគ្មានថ្នាំជក់ ព្រោះជាការហាមឃាត់ដ៏ចម្បងក្នុងការហាមឃាត់ការប្រើប្រាស់ថ្នាំជក់ ក៏ដូចជាការហាមឃាត់ទៅលើផលិតផលថ្នាំជក់ទាំងឡាយ ជាពិសេសបារីអេឡិចត្រូនិចនៅក្នុងបរិវេណពហុកីឡាដ្ឋាន ឬតំបន់ស្នាក់នៅ ហូបចុក របស់គណៈប្រតិភូកីឡា”

កញ្ញា សៀក ពេជ្ររចនា ក៏បានលើកទឹកចិត្តយុវជនទាំងអស់គ្នាឱ្យជៀសឆ្ងាយពីផលិតផលថ្នាំជក់ក៏ដូចជាបារីអេឡិចត្រូនិច ព្រោះយុវជនយើងភាគច្រើនយល់ច្រឡំថាជាផលិតផលផ្ដាច់បារី ប៉ុន្តែវាមិនមែនជាផលិតផលផ្តាច់បារីទេ គឺជាឧបករណ៍ដែលធ្វើឱ្យយើងកាន់តែញៀន បើប្រើយូរៗទៅអាចឈានទៅដល់ការប្រើប្រាស់គ្រឿងញៀន ហើយអាចបំផ្លាញដល់សណ្តាប់ធ្នាប់សាធារណៈ។ ដូច្នេះ សូមឱ្យយុវជនកាត់បន្ថយ ហើយរាជរដ្ឋាភិបាលបន្តឹងច្បាប់ឱ្យកាន់តែខ្លាំងចំពោះការប្រើប្រាស់ថ្នាំជក់នេះផងដែរ។

លោក រស់ ណូអែលរង្សី ជានិសិ្សតឆ្នាំទី១ នៃសាកលវិឡាល័យផារ៉ាហ្គន និងយុវជនស័្មគ្រចិត្តក្នុងព្រឹត្តិការណ៍ការប្រកួតកីឡាស៊ីហ្គេម បាននិយាយថា នេះជារឿងល្អដែលកម្ពុជាអនុវត្តកីឡាគ្មានថ្នាំជក់ខណៈកម្ពុជាធ្វើជាម្ចាស់ផ្ទះប្រកួតកីឡាស៊ីហ្គេមនេះ ដោយសារតែប្រជាជនកម្ពុជារៀងរាល់ឆ្នាំមានមនុស្សស្លាប់ប្រមាណ ១ម៉ឺន៥ពាន់នាក់ ដែលបង្កឡើងដោយសារការប្រើប្រាស់ថ្នាំជក់ ។ នេះមានន័យថា កម្ពុជាបានគិតគូរទៅដល់កីឡាករ អ្នកស្ម័គ្រចិត្ត ជាពិសេសអ្នកដែលបានចូលរួមទស្សនាព្រឹត្តិការណ៍ស៊ីហ្គេម ព្រោះកាលណាមានបុគ្គលណាម្នាក់ជក់បារី ឬបារីអេឡិចត្រូនិច គឺវាបង្កនូវផលប៉ះពាល់ដល់ខ្លួនគាត់ និងមនុស្សនៅជុំវិញខ្លួនគាត់ ហើយក៏ធ្វើឱ្យអ្នកដែលមិនធ្លាប់ប្រើប្រាស់រងផលប៉ះពាល់ដែលអាចប្រឈមនឹងជំងឺបង្កមកពីថ្នាំជក់។

លោក រស់ ណូអែលរង្សី បញ្ជាក់បន្ថែមថា កីឡាគ្មានថ្នាំជក់ ជាសារលើកទឹកចិត្តដល់ប្រជាជន ឬយុវជនដែលកំពុងប្រើប្រាស់បារី អាចកាត់បន្ថយ ឬផ្ដាច់បារីបានអំឡុងពេលមកទស្សនាកីឡាស៊ីហ្គេម ព្រោះនៅពេលដែលយុវជនមកចូលរួមទស្សនាការប្រកួតស៊ីហ្គេម មិនឃើញមានការអនុញ្ញាតិឱ្យជក់បារី ឬបារីអេឡិចត្រូនិច អាចធ្វើឱ្យពួកគាត់បានយល់ច្បាស់ពីកីឡាដែលគ្មានថ្នាំជក់ ។ លើសពីនេះ កីឡាគ្មានថ្នាំជក់ ក៏បានជួយដល់បរិស្ថានផងដែរ ព្រោះជាទូទៅអ្នកជក់បារីអាចបោះចោលកន្ទុយបារីពាសវាលពាសកាល ស្រូបយកផ្សែងពុលចូលទៅក្នុងខ្លួន ហើយបញ្ចេញផ្សែងពុលមកវិញចូលទៅក្នុងបរិយាកាសដែលអាចបង្កជាផលប៉ះពាល់នៅថ្ងៃអនាគត។

លោក រស់ ណូអែលរង្សី យុវជនស័្មគ្រចិត្តក្នុងព្រឹត្តិការណ៍ការប្រកួតកីឡាស៊ីហ្គេម

“នៅក្នុងព្រឹត្តិការណ៍ប្រកួតស៊ីហ្គេមនេះ មានក្មេងៗឆ្ងល់អំពី កីឡាគ្មានថ្នាំជក់ ជាអ្វី ? ដោយពួកគាត់គិតថាអាចជាប្រភេទកីឡា។ ខ្ញុំនិងឪពុកម្ដាយរបស់ក្មេងក៏បាននិយាយណែនាំគាត់អំពីអត្ថន័យកីឡាគ្មានថ្នាំជក់នេះ ឱ្យគាត់ដឹងថា កីឡាគ្មានថ្នាំជក់ គឺជាការហាមឃាត់មិនឱ្យមានប្រើប្រាស់ថ្នាំជក់ បារី ឬបារីអេឡិចត្រូនិច និងការឧបត្ថម្ភរបស់ក្រុមហ៊ុនថ្នាំជក់នៅក្នុងទីកន្លែងប្រកួតកីឡា”

យុវជនស័្មគ្រចិត្តក្នុងព្រឹត្តិការណ៍ការប្រកួតកីឡាស៊ីហ្គេម ក៏បានលើកទឹកចិត្តដល់អ្នកជក់បារីដែលចង់បានភាពឡូយ ភាពហ៊ឺហា ឱ្យបានដឹងថាផលិតផលថ្នាំជក់ដូចជា បារី បារីអេឡិចត្រូនិច ប្រៀបដូចជាថ្នាំពុលដែលបំផ្លាញខ្លួនឯងទៅថ្ងៃក្រោយ ព្រោះវាបានតែឡូយហ៊ឺហាមួយពេល ប៉ុន្តែពេលក្រោយទៅវានឹងអាចបំផ្លាញខ្លួនឯងជាក់ជាមិនខាន។ ចំពោះអ្នកមានបញ្ហាស្រ្តេសត្រូវការប្រើប្រាស់ថ្នាំជក់ដើម្បីរំសាយអារម្មណ៍ សូមបញ្ឈប់ការជក់បារី ដោយជ្រើសរើសញ៉ាំស្ករគ្រាប់ជំនួសបារី ដើម្បីកុំឱ្យយើងនឹកឃើញចង់តែជក់បារី ។

គួរជម្រាបជូនថា ចាប់ពីឆ្នាំ២០០៣មក ការប្រកួតកីឡាអាស៊ីអាគ្នេយ៍ (ស៊ីហ្គេម) ត្រូវបានចាត់ទុកជាព្រឹត្តិការណ៍ប្រកួតកីឡាដោយគ្មានផ្សែងថ្នាំជក់។ ប្រទេសវៀតណាម បានក្លាយជាប្រទេសទី១ ដែលបានសម្រេចជោគជ័យព្រឹត្តិការណ៍ប្រកួតកីឡាដោយគ្មានផ្សែងថ្នាំជក់ ក្នុងការប្រកួតកីឡាអាស៊ីអាគ្នេយ៍លើកទី២២ នៅឆ្នាំ២០០៣។ ទន្ទឹមគ្នានេះ ការប្រកួតកីឡាអាស៊ីអាគ្នេយ៍ជាបន្តបន្ទាប់ទៀតក៏បានអនុវត្តតាមគោលការណ៍កីឡាគ្មានថ្នាំជក់ផងដែរ ដោយប្រទេសជាម្ចាស់ផ្ទះបានអនុវត្តយ៉ាងខ្ជាប់ខ្ជួននូវគោលការណ៍កីឡាគ្មានថ្នាំជក់នេះ។ ជាក់ស្ដែង ក្នុងនាមជាម្ចាស់ផ្ទះរៀបចំការប្រកួតកីឡាអាស៊ីអាគ្នេយ៍លើកទី៣២និងកីឡាអាស៊ានប៉ារ៉ាហ្គេមលើកទី១២ កម្ពុជាក៏បានបន្តរក្សាវប្បធម៌កីឡាគ្មានផ្សែងថ្នាំជក់នេះដែលអនុលោមតាមច្បាប់ស្តីពីការត្រួតពិនិត្យផលិតផលថ្នាំជក់ និងលិខិតបទដ្ឋានគតិយុត្តនានារបស់ព្រះរាជាណាចក្រកម្ពុជា៕