ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជារៀងរាល់ថ្ងៃមានបញ្ហារាប់លានជំពូកដែលមានក្នុងជីវិតយើងម្នាក់ៗ បានធ្វើឱ្យយើងមានអារម្មណ៍ធុញថប់ ស្មុគស្មាញ និងតានតឹង។ យ៉ាងណាមិញ ទន្ទឹមនឹងបញ្ហានេះ អ្នកជំនាញចិត្តសាស្ត្រ Thuy – Vy Nguyen និងជាជំនួយការសាស្ត្រចារ្យ នៃសាកលវិទ្យាល័យ Durham បានរកឃើញថា ការចំណាយពេលខ្លះនៅម្នាក់ឯង អាចជួយអ្នកដោះស្រាយវិបត្តិទាំងនេះបាន។
ការចំណាយពេលនៅម្នាក់ឯង (Solitude) មិនមានន័យថា នៅកន្លែងដែលគ្មានមនុស្សនោះទេ។ ផ្ទុយទៅវិញ យើងអាចចំណាយពេលនៅម្នាក់ឯងក្នុងទីសាធារណៈ ដូចជាការអង្គុយផឹកតែក្នុងហាងកាហ្វេ ឬអានសៀវភៅនៅក្នុងសួនកម្សាន្តជាដើម។ បើតាមការការស្រាវជ្រាវរបស់ Thuy – Vy Nguyen ការចំណាយពេលសម្រាប់ខ្លួនឯង អាចមានឥទ្ធិពលវិជ្ជមានទៅលើអារម្មណ៍ប្រចាំថ្ងៃរបស់យើង។
អ្នកជំនាញរូបនេះ បានធ្វើការពិសោធន៍មួយ ដោយបាននាំនិស្សិតថ្នាក់បរិញ្ញាបត្រមួយក្រុមចូលបន្ទប់មួយ ហើយឱ្យពួកគេអង្គុយនៅស្ងៀម ដោយមានសៀវភៅ ឬទូរស័ព្ទនៅជាមួយផង។ បន្ទាប់ពីនៅសៀមបាន ១៥ នាទី គេបានរកឃើញថា អារម្មណ៍ នៃភាពថប់បារម្ភ ឬរំភើបរបស់និស្សិតទាំងនោះបានធ្លាក់ចុះ។ ចំណុចនេះ បានធ្វើឱ្យគេសន្និដ្ឋានបានថា ការចំណាយពេលនៅម្នាក់ឯង ជាវិធីសាស្ត្រមួយដ៏ល្អ ដែលអាចជួយការបន្ថយភាពតានតឹងអារម្មណ៍ខឹង ស្មុគស្មាញ ឬភាពរំជើបរំជួលជាដើម។
ទន្ទឹមនឹងនេះ មនុស្សជាច្រើនយល់ថា មានតែមនុស្ស introverts ប៉ុណ្ណោះ ដែលចូលចិត្តចំណាយពេលនៅជាមួយខ្លួនឯង។ ប៉ុន្តែនៅក្នុងការស្ទង់មតិលើមនុស្សពេញវ័យជាង ១៨,០០០ នាក់ជុំវិញពិភពលោក បានរកឃើញថា ជាងពាក់កណ្តាលនៃពួកគេ បង្ហាញការយល់ឃើញថា ការចំណាយពេលនៅម្នាក់ឯងជាសកម្មភាពមួយដ៏សំខាន់ ដែលផ្ដល់គម្លាតសម្រាប់ពួកគេអាចសម្រាក និងប្រមូលថាមពល។ ដូច្នេះ មានន័យថា ទោះជាអ្នកជាមនុស្ស Extroverts ក៏ដោយ ក៏គួរចំណាយពេលខ្លះ ដើម្បីនៅម្នាក់ដែរ ព្រោះនេះជាពេលវេលាមួយ ដែលផ្ដល់ឱកាសឱ្យអ្នកសម្រាក និងមានចិត្តស្ងប់។
បើតាមការស្រាវជ្រាវរបស់ អ្នកជំនាញខាងលើ ខណៈពេលដែលអ្នកនៅម្នាក់ឯង អ្នកអាចអង្គុយនៅស្ងៀមដោយមិនធ្វើអ្វីសោះ ឬចំណាយពេលធ្វើសកម្មភាពសាមញ្ញណាមួយ ដើម្បីបំបាត់អារម្មណ៍អផ្សុក ប៉ុន្តែកិច្ចការទាំងនោះ មិនជាប់ទាក់ទងនឹងការងារដែលធ្វើឱ្យអ្នកត្រូវប្រើការគិតច្រើននោះទេ ។ លើសពីនេះ អ្នកអាចទៅមើលកុនម្នាក់ឯង ញ៉ាំអាហារម្នាក់ឯង ឬធ្វើដំណើរកម្សាន្តម្នាក់ឯងជាដើម។ សកម្មភាពទាំងនេះនឹងធ្វើឱ្យអ្នកមានទំនុកចិត្តលើខ្លួនឯងជាងមុន និងផ្ដល់នូវសេរីភាពក្នុងការសម្រេចចិត្ត៕
