របៀបកាពារខ្លួនបញ្ជៀសពីការវាយប្រហារនិងការគំរាមកំហែងនានាតាមប្រព័ន្ធអ៊ីនធឺណិត និងបញ្ជៀសពីសកម្មភាពបោកប្រាស់តាមបណ្តាញសង្គមដែលកំពុងកើតឡើងនៅជុំវិញពិភពលោក ជាប្រធានបទសំខាន់មួយដែលអ្នកជំនាញបច្ចេកវិទ្យានៃក្រសួងប្រៃសណីយ៍ និងទូរគមនាគមន៍ បង្ហាញទៅកាន់សិក្ខាកាមអ្នកសារព័ត៌មានប្រមាណជាង ៤០រូប មកពីចម្រុះស្ថាប័នទូទាំងប្រទេស ។ នេះជាវគ្គបណ្តុះបណ្តាលមួយដែលបានរៀបចំឡើងដោយក្លឹបអ្នកកាសែតកម្ពុជា (CCJ) សហការជាមួយបណ្ឌិត្យសភាពបច្ចេកវិទ្យាកម្ពុជា (CADT) របស់ក្រសួងប្រៃសណីយ៍ និងទូរគមនាគមន៍ ដើម្បីពង្រឹងចំណេះដឹងជំនាញឌីជីថល និងការប្រើប្រាស់ប្រព័ន្ធទំនាក់ទំនងសង្គមប្រកបដោយប្រសិទ្ធភាព និងសុវត្ថិភាពដល់អ្នកសារព័ត៌មាន ។

លោក ពុយ គា ប្រធានក្លឹបអ្នកកាសែតកម្ពុជា (CCJ) មានប្រសាសន៍ថា អ្នកសារព័ត៌មានប្រៀបដូចជាកងទ័ពជួរមុខកំពុងប្រើប្រាស់បណ្តាញសង្គម ហើយត្រូវតែមានចំណេះដឹងថ្មីៗបន្ថែមពីកម្មវិធីឌីជីថល និងបច្ចេកវិទ្យា ដើម្បីយល់ដឹងពីបច្ចុប្បន្នភាពឌីជីថលនិងបច្ចេកវិទ្យា ការពារសុវត្ថិភាពបណ្តាញសង្គម និងប្រើប្រាស់ប្រកបដោយប្រសិទ្ធភាពនៅក្នុងវិជ្ជាជីវៈរបស់ខ្លួន ។

លោក ពុយ គា ប្រធានក្លឹបអ្នកកាសែតកម្ពុជា មានប្រសាសន៍បញ្ជាក់ថា “បេសកកម្មចម្បងរបស់ក្លឹបអ្នកកាសែតកម្ពុជា គឺព្យាយាមបណ្តុះបណ្តាលអ្នកសារព័ត៌មានគ្រប់វិស័យទាំងអស់ឱ្យមានក្រមសីលធម៌ និងវិជ្ជាជីវៈ ហើយការបណ្តុះបណ្តាលបន្ថែមលើជំនាញផ្សេងៗ រួមមាន ចំណេះដឹងអាយធី (IT) និងចំណេះដឹងបច្ចេកវិទ្យាឌីជីថល (digital) និងសុវត្ថិភាពឌីជីថលជារឿងសំខាន់សម្រាប់ក្លឹបអ្នកកាសែតកម្ពុជា ដើម្បីជួយដល់អ្នកសារព័ត៌មាន ! … យុវជន (អ្នកសារព័ត៌មាន) ត្រូវដឹងថា សម័យនេះជាសម័យអាយធី អីចឹងត្រូវតែរៀនសូត្រចំណេះដឹងថ្មីៗ បើយើងមិនរៀនសូត្រអ្វីដែលថ្មីទេ មានន័យថា គេកំពុងដើរទៅមុខយើងនៅមួយកន្លែង…” ។

ចំណែកឯកឧត្តម លីវ សុផាណារិទ្ធិ រដ្ឋលេខាធិការក្រសួងប្រៃសណីយ៍ និងទូរគមនាគមន៍ មានប្រសាសន៍ថា ចំណេះដឹងស្តីពីបច្ចេកវិទ្យាឌីជីថលសំខាន់សម្រាប់អ្នកសារព័ត៌មាន និងសម្រាប់វិស័យនានា ។ បច្ចេកវិទ្យាឌីជីថលកំពុងជឿនលឿនពីមួយថ្ងៃទៅមួយថ្ងៃ ដែលតម្រូវឱ្យអង្គភាពការងារ ស្ថាប័ននានា ជាពិសេសបុគ្គលខ្លួនឯង ត្រូវចាប់យកចំណេះដឹងបច្ចេកវិទ្យាឌីជីថលជាចំបាច់ក្នុងការងារ និងការរស់នៅប្រចាំថ្ងៃ ។ ប្រសិនបើមិនដូច្នេះទេ អ្វីដែលចេះដឹងពីប៉ុន្មានឆ្នាំមុន នឹងត្រូវបាត់បង់ទាំងអស់ ។

ទន្ទឹមគ្នានេះ ឯកឧត្តម លីវ សុផាណារិទ្ធិ បានបន្តទៀតថា ក្រសួងប្រៃសណីយ៍ និងទូរគមនាគមន៍ កំពុងខិតខំរៀបចំវគ្គបណ្តុះបណ្តាលជាច្រើនបញ្ជ្រាបការយល់ដឹងអំពីការប្រើប្រាស់បច្ចេកវិទ្យា និងផលប៉ះពាល់នានាពីការគំរាមកំហែង និងហានិភ័យថ្មីៗនៅលើប្រព័ន្ធអ៊ីនធឺណិតដល់មន្រ្តីរាជការនៅតាមស្ថាប័ននានា ។ ក្រសួងប្រៃសណីយ៍កំពុងផ្តល់អាហារូបករណ៍លើកទឹកចិត្តឱ្យសិស្សានុសិស្សចាប់យកជំនាញឌីជីថល និងបច្ចេកវិទ្យា ។ ការអភិវឌ្ឍន៍ធនធានមនុស្សនេះ ដើម្បីឱ្យប្រជាពលរដ្ឋអាចទទួលបានព័ត៌មាន និងងាយយល់ដឹងពីបច្ចេកវិទ្យាថ្មីៗ ។

សូមជម្រាបថា វគ្គបណ្តុះបណ្តាលស្តីពីការប្រើប្រាស់ប្រព័ន្ធទំនាក់ទំនងសង្គមប្រកបដោយប្រសិទ្ធភាព និងសុវត្ថិភាពដល់អ្នកសារព័ត៌មាន បានរៀបចំឡើងដោយក្លឹបអ្នកកាសែតកម្ពុជា (CCJ) សហការជាមួយបណ្ឌិត្យសភាពបច្ចេកវិទ្យាកម្ពុជា (CADT) នៃក្រសួងប្រៃសណីយ៍ និងទូរគមនាគមន៍ ។ ក្រៅពីផ្តល់ចំណេះជំនាញសុវត្ថិភាពឌីជីថលខាងលើ អ្នកសារព័ត៌មានក៏ទទួលបានចំណេះដឹងកម្មវិធីថតវីដេអូ កាត់តវីដេអូតាមទូរស័ព្ទដៃ និងការប្រើទូរស័ព្ទដៃបំពេញការងារផងដែរ ៕