ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រធានក្លឹបអ្នកកាសែតកម្ពុជា លោក ពុយ គា បានលើកឡើងថា ក្រសួងព័ត៌មាននឹងត្រូវសហការជាមួយក្រសួងប្រៃសណីយ៍ និងទូរគមនាគមន៍ ដើម្បីប្រើប្រាស់ QR Code កំណត់អត្តសញ្ញាណអ្នកសារព័ត៌មានឱ្យមានភាពច្បាស់លាស់ ។ ការលើកឡើងរបស់លោក ពុយ គា នេះនៅក្នុងកម្មវិធីបិទវគ្គបណ្តុះបណ្តាលអ្នកសារព័ត៌មាន ស្តីពីការប្រើប្រាស់ប្រព័ន្ធទំនាក់ទំនងសង្គមប្រកបដោយប្រសិទ្ធភាព និងសុវត្ថិភាព រៀបចំឡើងដោយក្លឹបអ្នកកាសែតកម្ពុជា សហការជាមួយបណ្ឌិត្យសភាពបច្ចេកវិទ្យាកម្ពុជា (CADT) នៃក្រសួងប្រៃសណីយ៍ និងទូរគមនាគមន៍ នាល្ងាចថ្ងៃទី៣១ ខែសីហា ឆ្នាំ២០២៣ ។
លោក ពុយ គា ប្រធានក្លឹបអ្នកកាសែតកម្ពុជា មានប្រសាសន៍ថា តាមរយៈជំនួបស្វែងយល់អំពីទស្សនវិស័យព័ត៌មាននៅកម្ពុជា រវាងគណៈនាយកក្លិបអ្នកកាសែតកម្ពុជា និងឯកឧត្តម នេត្រ ភក្រ្តា រដ្ឋមន្ត្រីក្រសួងព័ត៌មាន កាលពីព្រឹកថ្ងៃទី៣០ ខែសីហាកន្លងទៅ រដ្ឋមន្ត្រីក្រសួងព័ត៌មានមានបំណងសុំកិច្ចសហការជាមួយក្រសួងប្រៃសណីយ៍ និងទូរគមនាគមន៍ ដើម្បីប្រើប្រាស់ QR Code កំណត់អត្តសញ្ញាណអ្នកសារព័ត៌មានចៀសវាងការក្លែងបន្លំព័ត៌មាន ។
ប្រធានក្លឹបអ្នកកាសែតកម្ពុជា បានបន្តថា ការប្រើប្រាស់ប្រព័ន្ធគ្រប់គ្រងអត្តសញ្ញាណអ្នកសារព័ត៌មានដោយប្រើប្រាស់ QR Code នឹងកាត់បន្ថយវត្តមានអ្នកកាន់ប័ណ្ណឈ្មោះជាអ្នកសារព័ត៌មាន ដែលមិនមែនជាអ្នកសារព័ត៌មានពិតប្រាកដ ។ ទន្ទឹមគ្នានេះ លោក ពុយ គា បានកត់សម្គាលថា កន្លងទៅមានបុគ្គលមួយចំនួនតូច បានប្រើប្រាស់ប័ណ្ណជាអ្នកសារព័ត៌មានធ្វើជាប្រយោជន៍ការងារផ្ទាល់ខ្លួន ឬប្រើក្នុងបំណងងាយស្រួលរកស៊ីដោយយកឈ្មោះជាអ្នកសារព័ត៌មាន ។
សូមជម្រាបថា បើតាមប្រធានក្លឹបអ្នកកាសែតកម្ពុជា ឯកឧត្តមរដ្ឋមន្រ្តីក្រសួងព័ត៌មាន បានជំរុញឱ្យក្លិបអ្នកកាសែតកម្ពុជា បន្តកិច្ចសហប្រតិបត្តិការជាមួយក្រសួងព័ត៌មាន បណ្តុះបណ្តាលអ្នកសារព័ត៌មានបន្ថែមទៀត ដើម្បីគាំទ្រសមត្ថភាពអ្នកសារព័ត៌មាន ជួយពង្រឹងវិជ្ជាជីវៈ និងក្រមសីលធម៌ ដែលជាការងារស្នូលរបស់ក្លិបអ្នកកាសែតកម្ពុជា៕
