ការប្រារព្ធពិធីបុណ្យ​ចូលឆ្នាំចិន របស់ប្រជាពលរដ្ឋខ្មែរជាប់សែស្រឡាយចិន ត្រូវបានអ្នកវប្បធម៌លើកឡើងថា គឺជាការផ្សារភ្ជាប់ទំនាក់ទំនងប្រពៃណីរស់នៅរបស់ប្រជាជន​ និងជាការបង្ហាញអំពីសេរីភាពផ្នែកជំនឿ សាសនា នៅកម្ពុជា ។ ទន្ទឹមគ្នានេះ ការប្រារព្ធពិធីបុណ្យចូលឆ្នាំចិនរបស់ប្រជាពលរដ្ឋខ្មែរសែស្រឡាយចិន ក៏បានបង្ហាញតម្លៃនៃការជួបជុំក្នុងក្រុមគ្រួសារ បងប្អូន សាច់ញាតិ ផងដែរ។

លោកបណ្ឌិត ឈត ប៊ុនថង ប្រធានវិទ្យាស្ថាន​ ទំនាក់​វប្បធម៌ អប់រំ និងទេសចរណ៍​ នៃរាជបណ្ឌិតសភាកម្ពុជា មានប្រសាសន៍ថា ពិធីបុណ្យចូលឆ្នាំចិន ជា​បុណ្យបែបប្រពៃណីទំនៀមទម្លាប់ចិន ដែលតែងតែប្រារព្ធធ្វើជារៀងរាល់ឆ្នាំ ដើម្បីជួបជុំក្រុមគ្រួសារ។ ចំណែកនៅប្រទេសកម្ពុជាក៏មានការប្រារព្ធពិធីបុណ្យចូលឆ្នាំខ្មែរ ហើយ​ក្នុងនោះ​ក៏មានប្រជាជនខ្មែរនៅក្រៅប្រទេស ដូចជា អាមេរិក កាណាដា អូស្រ្តាលី ចូលរួមប្រារព្ធពិធីបុណ្យចូលឆ្នាំខ្មែរដែរ។

លោកបណ្ឌិតបញ្ជាក់ថា ពិធីបុណ្យចូលឆ្នាំចិន មិនចំថ្ងៃឈប់សម្រាកជាផ្លូវការរបស់ប្រជាជនកម្ពុជានោះទេ ប៉ុន្តែប្រជាជនចិនដែលមកធ្វើការនៅប្រទេសកម្ពុជា អាចធ្វើពិធីបុណ្យចូលឆ្នាំចិនបាន ហើយប្រជាពលរដ្ឋខ្មែរកូនកាត់ចិន ក៏អាចចូលរួមប្រារព្ធពិធីបុណ្យចូលឆ្នាំចិនបានផងដែរ។

ប្រធានវិទ្យាស្ថាន​ ទំនាក់​វប្បធម៌ អប់រំ និងទេសចរណ៍​ នៃរាជបណ្ឌិតសភាកម្ពុជា បន្ថែមថា នាពេលបច្ចុប្បន្ននេះ ប្រជាជនចិនដែលមកប្រកបមុខរបររកស៊ីនៅប្រទេសកម្ពុជា ក៏ដូចជាប្រជាជនខ្មែរកាត់ចិន ច្រើនជាអ្នកមានជីវភាពធូរធារ បានប្រារព្ធពិធីបុណ្យចូលឆ្នាំចិនយ៉ាងអធិកអធម ហើយក៏បានទាក់ទាញប្រជាជនខ្មែរមួយចំនួនចូលរួមធ្វើពិធីបុណ្យចូលឆ្នាំចិននេះផងដែរ។ តែយ៉ាងណាប្រជាជនខ្មែរគួរ​កុំមានការយល់ច្រឡំថា ពិធីបុណ្យចូលឆ្នាំចិន ប្រជាពលរដ្ឋខ្មែរត្រូវរៀបចំសែនព្រេននោះទេ ពោលគឺអ្នកដែលរៀបចំធ្វើពិធីបុណ្យនេះ គួរតែជាប្រជាជនចិន ឬប្រជាជនខ្មែរជាប់សែស្រឡាយចិន ប៉ុន្តែប្រជាជនខ្មែរក៏អាចចូលរួមអបអរជាភ្ញៀវ នៅពេលមានការអញ្ជើញ។

សម្រាប់លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជ្យបណ្ឌិត្យសភាកម្ពុជា មានប្រសាសន៍ថា ប្រទេសកម្ពុជា ជាប្រទេសចម្រុះវប្បធម៌ដែលប្រជាពលរដ្ឋមានសែស្រឡាយកាត់ចិនជឿលើប្រពៃណី ទំនៀមទម្លាប់ សាសនារបស់ចិន ដោយពួកគាត់អាចប្រារព្ធពិធីនេះបាន ដែលបង្ហាញអំពីសិទ្ធសេរីភាពក្នុងការរស់នៅរបស់ប្រជាពលរដ្ឋ ។

ប្រធានវិទ្យាស្ថានសិក្សាចិននៃរាជ្យបណ្ឌិត្យសភាកម្ពុជា បន្ថែមថា ចំពោះប្រជាពលរដ្ឋខ្មែរដែលមិនជាប់សែស្រឡាយចិន ហើយចង់ចូលរួមធ្វើពិធីចូលឆ្នាំចិននេះ ជាលក្ខណៈគ្រួសារ គឺមិនមានបញ្ហាប្រឈមអ្វីនោះទេ ព្រោះជាសិទ្ធសេរីភាពរបស់មនុស្សម្នាក់ៗចូលរួមអបអរ សប្បាយរីករាយ ប៉ុន្តែអ្វីដែលជាកំហុស គឺការចូលរួមពិធីនេះដោយសុំច្បាប់សម្រាកពីការងារដោយគ្មានការអនុញ្ញាតិ។

«នៅថ្ងៃចូលឆ្នាំចិន ប្រជាពលរដ្ឋយើងទោះជាជាប់សែស្រឡាយចិន ឬមិនជាប់សែស្រឡាយចិនក៏ដោយ គឺមិនអាចសុំឈប់សម្រាកពីការងារទៅប្រារព្ធពិធីចូលឆ្នាំចិនដែរ ព្រោះនេះជាប្រទេសកម្ពុជា ហើយយើងជាប្រជាពលរដ្ឋប្រទេសកម្ពុជា ហើយត្រូវគោរពតាមច្បាប់នៃប្រទេសកម្ពុជា។»

លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជ្យបណ្ឌិត្យសភាកម្ពុជា

ពាក់ព័ន្ធនឹងការរៀបចំពិធីបុណ្យចូលឆ្នាំចិន នៅកម្ពុជានេះដែរ បើតាម​ប្រសាសន៍របស់ ឯកឧត្តម សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា ថា ជាគោលការណ៍រួម រាជរដ្ឋាភិបាលបានទទួលយកពហុវប្បធម៌ ពហុប្រពៃណី ពហុសាសនា តាមរដ្ឋធម្មនុញ្ញដែលមានចែងនៅក្នុងមាត្រា៤៣ ដែលថា ប្រជាពលរដ្ឋទាំងពីរភេទ មានសិទ្ធិពេញទីខាងជំនឿ និងការប្រតិបត្តិខាងផ្លូវសាសនា ពោលគឺរាជរដ្ឋាភិបាលទទួលយក និងបើកទូលាយសម្រាប់ជំនឿគ្រប់ជាតិសាសន៍ទាំងអស់។

គួរជម្រាបជូនថា ពិធី​បុណ្យចូលឆ្នាំ​ប្រពៃណីចិន ក្រៅពីមានប្រារព្ធធ្វើនៅកម្ពុជាដោយពលរដ្ឋខ្មែរជាប់សែស្រឡាយចិន គេក៏ឃើញមាន​ប្រារព្ធ​ធ្វើ​ផង​ដែរ​នៅ​ក្នុង​ប្រទេស​សិង្ហ​បុរី​, ឥណ្ឌូ​នេ​ស៊ី​, ម៉ា​ឡេ​ស៊ី​, ហ្វ៊ី​លី​ពី​ន​, ថៃ​ ក៏​ដូច​ជា​ប្រទេស​ដទៃ​ទៀតដែល​មាន​ប្រជាជន​ចិន​រស់នៅ​៕