កាលពីចុងសប្តាហ៍​កន្លងទៅនេះ យុទ្ធនាការ​ភ្នំពេញស្អាត បានរៀបចំកម្មវិធីវិបស្សនា​ដ៏ធំមួយ ដោយ​មានការ​ចូលរួមពី​សិស្ស និស្សិត និង​សាធារណៈជន​ទូទៅ​ប្រមាណ​ជិត៤ពាន់នាក់ នៅ​ពហុកីឡដ្ឋានជាតិអូឡាំពិក ក្រោម​ប្រធាន « ចិត្តស្អាត ខ្មែរស្អាត ដើម្បីសន្តិភាព» ក្នុង​ការ​ជំរុញបណ្ដុះចិត្តស្អាតតាមរយៈសមាធិ ដើម្បីបង្ហាញស្មាតីរួមគ្នារបស់ប្រជាពលរដ្ឋកម្ពុជាដែល​ចង់រក្សាសន្តិភាព។

ឯកឧត្ដម ហ៊ុន ម៉ានី ឧបនាយករដ្ឋមន្រ្ដី រដ្ឋមន្រ្ដីក្រសួងមុខងារសាធារណៈ និងជាប្រធានក្រុមប្រឹក្សាភិបាលគម្រោងស្អាត មានប្រសាសន៍ថា យុទ្ធនាការភ្នំពេញស្អាតឆ្នាំនេះ រៀបចំឡើងក្នុងគោលបំណងមកជួបជុំគ្នាផ្ដល់សំឡេងមួយដល់រាជរដ្ឋាភិបាល ក៏ដូចជាផ្ដល់កម្លាំងចិត្ត និងការគោរពដល់វីរកងទ័ពជួរមុខ។

ឯកឧត្ដមឧបនាយករដ្ឋមន្រ្ដី លើកឡើងថា ពេលប្រទេសជួបបញ្ហាប្រឈម​ គេ​ឃើញថា ប្រព័ន្ធផ្សព្វផ្សាយ ក៏ដូចជាសារព័ត៌មានក្នុងប្រទេស ក្រៅប្រទេស មានការលាបពណ៌ ប្រមាថមកលើសង្គមជាតិ ធ្វើ​ឱ្យ​យើងមានភាពតានតឹង ឈឺចាប់ និងមានកំហឹង ប៉ុន្តែពេលនេះយើងមករួបរួមគ្នា បង្ហាញថា​ ពិបាកយ៉ាងណាក៏ដោយ យើងមិនទៅណាចោលគ្នាទេ។

ប្រធានក្រុមប្រឹក្សាភិបាលគម្រោងស្អាត បញ្ជាក់ថា បុគ្គលនីមួយៗតែងតែមានសម្ពាធចេញពីការរៀនសូត្រ ការងារ និងជួបប្រទះកត្តាផ្សេងៗ ក្នុងនោះ សម្ពាធដែលជួបប្រទះ នឹង​នាំឱ្យមានភាពតានតឹង មានអារម្មណ៍ស្មុគស្មាញ ឬមានការធុញថប់ ហើយ​ប្រសិនបើយើងនៅម្នាក់ឯថែមទៀត ប្រាកដជាកាន់តែធ្ងន់ធ្ងរទៅៗ, ប៉ុន្តែបើយើងជួបជុំគ្នា ដោយការធ្វើសមាធិ បញ្ជាក់ថា ទោះជួបប្រទះបញ្ហាប្រឈមបែបណាក៏ដោយ ក៏​យើង​មិននៅ​ម្នាក់ឯងទេ ដូច្នេះធ្វើឱ្យអារម្មណ៍យើងស្រស់ស្រាយឡើងវិញ។ ឯកឧត្ដម ហ៊ុន ម៉ានី បន្តថា ការមកជួបជុំគ្នាផង ការធ្វើសមាធិផង សង្ឃឹមថា អ្នកដែលបានចូលរួម បានបន្ធូរភាពតានតឹងសម្ពាធផ្សេងៗឱ្យមានភាពធូរស្រាល។

ក្នុងឱកាសនោះ សម្តេចព្រះឧត្តមវង្សាបណ្ឌិត គូ សុភាព សមាជិកថេរភាពសភា នៃព្រះពុទ្ធសាសនានៅព្រះរាជាណាចក្រកម្ពុជា មានសង្ឃដីកាថា សីល សំដៅលើ ការរៀបចំឥរិយាបថឱ្យត្រឹមត្រូវ មានសណ្ដាប់ធ្នាប់រស់នៅល្អ។ ដូច្នេះ មនុស្សមានសីល គឺជាមនុស្សដែលរស់នៅមានសណ្ដាប់ធ្នាប់ល្អ ចិត្តខាងក្នុងល្អ ដោយមិនសំដៅលើការស្លៀកសពាក់ស ចូលវត្តអារាមនោះទេ។ មិនត្រឹមតែមនុស្សទេ សូម្បីប្រទេសមានសីល ក៏ត្រូវរៀបចំសណ្ដាប់ធ្នាប់ឱ្យបានល្អដែរ។

សម្តេចព្រះឧត្តមវង្សាបណ្ឌិត គូ សុភាព មានសង្ឃដីកាដោយ​បញ្ជាក់ថា ទោះប្រទេសមានសង្រ្គាម ប៉ុន្តែយើងអាចរួមគ្នាសមាធិ ប្រមូលស្មារតី រៀនធ្វើចិត្តជ្រះថ្លា ត្រេកអរ ព្រោះមនុស្សមានប្រាជ្ញា មិនខឹងច្រើន។

ជាមួយគ្នានេះ លោក នឹម ឈុន្នី ដែល​ស្ថាបនិកក្រុមហ៊ុនវិបស្សា ក៏​បាន​មានប្រសាសន៍ដែរថា ចិត្តស្អាត ទើបយើងអាចរួមចំណែកកសាងសន្តិភាព សុភមង្គលសម្រាប់ខ្លួនឯង និងក្រុមគ្រួសារ។ លោកថា ការធ្វើសមាធិ អាចធ្វើឱ្យយើងបាត់បង់អារម្មណ៍ខឹង ការប្រកាន់ច្រើន ការថប់បារម្ភ ចិត្តមួរម៉ៅ ក៏ដូចជាជួយឱ្យបាត់បង់ទឹកមុខដែលមិនសប្បាយចិត្តជាដើម។ លោក នឹម ឈុន្នី បន្ថែមថា ពេលដែលយើងបណ្ដុះចិត្តស្អាត ទើបអាចឱ្យឈ្មោះថា ពលរដ្ឋដ៏ល្អរបស់កម្ពុជា ព្រោះប្រជាពលរដ្ឋកម្ពុជា តែងប្រកាន់ភ្ជាប់នូវមាគ៌ាអហិង្សា។

ស្ថាបនិកក្រុមហ៊ុន វិបស្សា បន្ថែមថា កម្មវិធីសមាធិ នៃយុទ្ធនាការភ្នំពេញស្អាត ក្រោមប្រធានបទ « ចិត្តស្អាត ខ្មែរស្អាត ដើម្បីសន្តិភាព» ជាព្រឹត្តិការណ៍ដ៏អស្ចារ្យមួយ ក្នុង​ការ​ជួបជុំគ្នាធ្វើសមាធិបណ្ដុះចិត្តស្អាត ដែលបង្ហាញថា ប្រជាពលរដ្ឋកម្ពុជាប្រកាន់យកនូវសុខសន្តិភាពទាំងអស់គ្នា។

បើតាម​លោក នឹម ឈុន្នី តាមរយៈការស្រាវជ្រាវរបស់សាកលវិទ្យាល័យធំៗមួយចំនួន ក្នុងនោះសាកលវិទ្យាល័យ Harvard និងសាកលវិទ្យាល័យ Yale បានបង្ហាញថា តំបន់ដែលបដិបត្តិសមាធិជាប្រចាំ បីគីឡូបួនជ្រុង អាចទទួលផលពីក្រុមអ្នកបដិបត្តិសមាធិ។ ដូច្នេះ សាកស្រមៃថា មនុស្សរាប់ពាន់នាក់បានអង្គុយសមាធិ ហើយយើងអាចយកផលពីសមាធិនេះ បង្កើនសន្តិភាពផ្លូវចិត្ត ភាពស្អាតពីខាងក្នុង ទៅចែករំលែកជាមួយគ្រួសារ ក៏ដូចជាអ្នកជិតខាងបាន។

សូមជំរាបជូនថា កម្មវិធីសមាធិ នៃយុទ្ធនាការភ្នំពេញស្អាត ក្រោម​ប្រធានបទ «ចិត្តស្អាត ខ្មែរស្អាត ដើម្បីសន្តិភាព» ដែលបាន​ប្រាព្ធធ្វើ​កាលពីល្ងាចថ្ងៃទី២៩ ខែវិច្ឆិកា មិនត្រឹម​តែជា​ការ​ជំរុញបណ្ដុះចិត្តស្អាតតាមរយៈសមាធិ ដើម្បីបង្ហាញស្មាតីរួមគ្នារបស់ប្រជាពលរដ្ឋកម្ពុជាដែល​ចង់រក្សាសន្តិភាព ប៉ុន្តែកម្មវិធីនេះ ក៏ដើម្បីបណ្ដុះចិត្ដគំនិតវិជ្ជមាន ប្រកបដោយសីលធម៌ សុជីវធម៌ និងព្រហ្មវិហារធម៌​ដល់សិស្ស និស្សិត និង​សាធារណៈជនទូទៅ ក្នុងការប្រកបការងារ និងការរស់នៅប្រចាំថៃ្ង ក្នុងនាមជាខ្មែរស្អាត៕