កម្ពុជាទទួលធ្វើជាម្ចាស់ផ្ទះសន្និសីទអន្តរជាតិ ASIP ជាលើកទី១ ក្នុងគោលដៅស្វែងរកដំណោះស្រាយបញ្ហាប្រឈមជាសាកលក្នុងការប្រើប្រាស់ និងគ្រប់គ្រងបញ្ញាសិប្បនិមិ្មត (AI) រ៉ូបូត ស្វ័យប្រវត្តិកម្ម និងប្រព័ន្ធឌីជីថលប្រកបដោយទំនួលខុសត្រូវ ដើម្បីធានាដល់ដំណើរការនវានុវត្តន៍ ភ្ជាប់ទៅនឹងក្រមសីលធម៌ ពិចារណាដល់បញ្ហាសង្គម និងការដាក់នូវការអនុវត្តគោលការណ៍។

ក្នុងសុន្ទរកថាបើកកម្មវិធីកាលពីថ្ងៃព្រហស្បត្តិ៍ ឯកឧត្តមរដ្ឋមន្ត្រី ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងថា បច្ចុប្បន្ន កម្ពុជាកំពុងខិតខំប្រឹងប្រែងក្នុងការពង្រឹងប្រព័ន្ធអេកូឡូស៊ីនវានុវត្តន៍ តាមរយៈផែនទីបង្ហាញផ្លូវវិទ្យាសាស្ត្រ បច្ចេកវិទ្យា និងនវានុវត្តន៍២០៣០ និងបានសង្កត់ធ្ងន់លើសារៈសំខាន់ នៃការវិនិយោគលើមូលធនមនុស្ស និងសមត្ថភាពផ្នែក STEM ។

ឯកឧត្តមសង្កត់ធ្ងន់ថា វាមិនមែនជារឿងដែលថា តើបច្ចេកវិទ្យាទាំងនេះនឹងកំណត់អនាគតរបស់យើង ឬអត់នោះទេ។ សំណួរពិតប្រាកដគឺថា តើយើងនឹងដឹកនាំការអភិវឌ្ឍបច្ចេកវិទ្យាទាំងនេះយ៉ាងណា ដោយភាពត្រឹមត្រូវ។

“វាមិនមែនជារឿងដែលថា តើបច្ចេកវិទ្យាទាំងនេះនឹងកំណត់អនាគតរបស់យើង ឬអត់នោះទេ។ សំណួរពិតប្រាកដគឺថា តើយើងនឹងដឹកនាំការអភិវឌ្ឍបច្ចេកវិទ្យាទាំងនេះយ៉ាងណា ប្រកបដោយភាពឆ្លាតវៃ និងមានទំនួលខុសត្រូវ ដើម្បីបម្រើគោលដៅបង្កើនវឌ្ឍនភាពសម្រាប់មនុស្សជាតិ”

លោកស្រីបណ្ឌិត Angelina ជានាយករងនៃ ASIP មានប្រសាសន៍ថា ការធ្វើសន្និសីទនេះឡើង គឺពិតជាមានសារៈសំខាន់ សម្រាប់បណ្ដាប្រទេសទាំងអស់ ដើម្បីចូលរួមគ្នាបង្កើតគោលនយោបាយ និងធ្វើឱ្យការស្រាវជ្រាវ ប្រព្រឹត្តិទៅដោយរលូន។

លោកស្រី ណ ឆវិន ជាអ្នកស្របសម្រួល លើកឡើងថា សន្និសីទនេះ មានគោលបំណងចម្បង ជំរុញឱ្យ​សាស្ត្រាចារ្យ និស្សិត និងស្រាវជ្រាវទាំងអស់ ធ្វើបទបង្ហាញ ពីការស្វែងរករបស់ខ្លួន ពាក់ព័ន្ធជាមួយនឹង បច្ចេកវិទ្យា នវានុវត្តន៍ គោលនយោបាយ និងបញ្ញាសិប្បនិម្មិត (AI) នៅក្នុងពេលបច្ចុប្បន្ន ក្នុងគោលដៅជំរុញការអភិវឌ្ឍការស្រាវជ្រាវ និងអភិវឌ្ឍ (R&D) ប្រកបដោយចីរភាព។

បើតាម លោកស្រី ឆវិន សន្និសីទនេះ មានការចូលរួម ពីសាកលវិទ្យាល័យចំនួន ២២, ហើយឯកសារ ដែលបានស្រាវជ្រាវ និងធ្វើបទបង្ហាញទាំង ៧៥ អត្ថបទ នឹងបោះពុម្ពផ្សាយលើអត្ថបទស្រាជ្រាវនឹងបោះពុម្ភផ្សព្វផ្សាយក្នុងទិនានុប្បវត្តិ (Journal) របស់វិទ្យាស្ថាន ASIP (Asian Journal of Innovation and Policy) និងមានឱកាសបោះពុម្ភផ្សាយនៅលើ CamTech University Press, Electronic Journal of Business and Management (EJBM), Journal of Applied Technology and Innovation (JATI) និងJournal of Scientometric Research។

គួរជម្រាបជូនថា សន្និសីទអន្តរជាតិសង្គមអាស៊ីស្ថាននវានុវត្តន៍ និងគោលនយោបាយ (ASIP) ត្រូវបានរៀបចំឡើងជាលើកដំបូងក្នុងប្រទេសកម្ពុជា ដោយមានកិច្ចសហការរវាងសាកលវិទ្យាល័យខេមតិច និងសង្គមអាស៊ីសម្រាប់នវានុវត្តន៍ និងគោលនយោបាយ(Asian Society for Innovation and Policy- ហៅកាត់ថា ASIP) ដែលប្រព្រឹត្តិទៅនៅថ្ងៃទី៣-៤ ខែធ្នូ ឆ្នាំ២០២៥។

នេះមិនត្រឹមតែជាសន្និសីទអប់រំប៉ុណ្ណោះទេ តែជាជួបជុំរវាងអ្នកស្រាវជ្រាវ សហគ្រិន អ្នកបង្កើតគោលនយោបាយ និងនិស្សិតក្នុងការផ្លាស់ប្តូរគំនិត ដើម្បីទប់ស្កាត់បញ្ហាប្រឈមមុខនានាលើផ្នែកបច្ចេកវិទ្យា និងវិទ្យាសាស្ត្រដែលកំពុងដាក់ប្រើប្រាស់ជាទូទៅដូចជាAI រ៉ូបូត និងវិស័យផ្សេងៗទៀត៕