ក្រុមហ៊ុនអប្សរា មេឌា សឺវីស (AMS) និងក្រុមហ៊ុនវេសឡាញ អេឌ្យូខេសិន គ្រុប (WEG) នៅព្រឹក​ថ្ងៃទី១៦ ខែឧសភា ឆ្នាំ២០២៥ បានចុះអនុស្សរណៈ នៃការយោគយល់គ្នា ក្នុងការ​រួមគ្នា​បង្កើត​មាតិកាអប់រំ ដែលប្រកប​ដោយ​គុណតម្លៃពិត សំដៅ​ចូលរួម​អភិវឌ្ឍ​សង្គមជាមួយ​រាជរដ្ឋាភិបាល។

លោក លឹម ឃុនស្រ៊ុន នាយកប្រតិបត្តិ​ក្រុមហ៊ុនអប្សរា មេឌា សឺវីស មានប្រសាសន៍ថា នៅក្នុងយុគសម័យ​ឌីជីថល​ដែល​កំពុងតែវិវត្តយ៉ាងឆាប់រហ័សនេះ ព័ត៌មានក្លែងក្លាយ និង​ព័ត៌មាន​មិនល្អជាច្រើន​ត្រូវបានផ្សព្វផ្សាយ ដូច្នេះ​ប្រព័ន្ធផ្សព្វផ្សាយដែលមានវិជ្ជាជីវៈ កាន់តែដើរតួនាទីសំខាន់​នឡើង ដើម្បីជា​កម្លាំង​ចលករ​មួយ​ផ្តល់​នូវ​ព័ត៌មានពិត ក៏​ដូចជា​បង្កើនការយល់ដឹង និងភ្ជាប់ទំនាក់ទំនងសង្គម។

តាមប្រសាសន៍របស់លោក លឹម ឃុនស្រ៊ុន ស្ថាប័ន AMS តែងតែ​ប្រកាន់ភ្ជាប់នូវ​បេសកកម្ម​ផលិត និងផ្សព្វផ្សាយ​ព័ត៌មានដោយ​កា​រអប់រំ​ប្រកប​ដោយ​គុណតម្លៃពិត ហើយ​ពីមួយជំហានទៅមួយជំហាន AMS តែងតែ​ព្យាយាម​បង្កើតកិច្ច​សហប្រតិបត្តិការថ្មីៗ ឈ្នះៗ ជាមួយ​ដៃគូ​ស្ថាប័នជំនាញ​នានា ដើម្បី​បង្កើន​គុណតម្លៃ​គ្នា​ទៅវិញ​ទៅមក។

តាមរយៈ​ការ​រួម​បញ្ចូល​គ្នា នៃសមត្ថភាព​ផលិតមាតិកាផ្សព្វផ្សាយ​ទូលំទូលាយ​របស់ AMS ជាមួយ​នឹង​បទពិសោធន៍​យូរឆ្នាំរបស់ WEG ក្នុងវិស័យ​អប់រំ លោកជឿជាក់ថា ស្ថាប័នទាំងពីរនឹង​រួម​គ្នាបង្កើតមាតិកា​ដោយ​ផ្តោត​ការយក​ចិត្តទុកដាក់​លើ​ការ​អប់រំ​កុមារតូច មាតិកា​សុខភាពផ្លូវចិត្ត និង​ការគាំទ្រ​ដល់អាណាព្យាបាលជាដើម។

“ខ្ញុំមានជំនឿ​យ៉ាងមុតមាំថា ភាពជាដៃគូនេះ នឹងក្លាយជាកម្លាំងចលករយ៉ាងសំខាន់ ក្នុងការជំរុញ​ការច្នៃប្រឌិត បង្កើនគុណតម្លៃ ហើយ​នាំ​មក​នូវភាពជោគជ័យ​សម្រាប់ភាគីទាំងពីរ”

លោកឧកញ៉ា ប៉ិច បូឡែន នាយកប្រតិបត្តិ​បណ្តាញ​គ្រឹះស្ថាន​អប់រំ និងបណ្តុះបណ្តាល​ វេសឡាញ អេឌ្យូខេសិន គ្រុប មានប្រសាសន៍ថា សារព័ត៌មានគឺពិតជាមានសារៈសំខាន់ នៅក្នុងការផ្សព្វផ្សាយមាតិការចំណេះដឹង និងការអប់រំផ្សេងៗទៅដល់មហាជនបានយល់ដឹង ស្របទៅតាមក្រមសីលធម៌វិជ្ជាជីវៈ។ លោកបន្តថា សារព័ត៌មានបានជួយផ្លាស់ប្តូរឥរិយាបថមនុស្សរាប់សិបលាននាក់ នៅពេលធ្វើការផ្សព្វផ្សាយ ដែលនិងបានដឹងលឺទៅដល់អ្នកមើល ស្តាប់ និងទស្សនា។

យ៉ាងណាក៏ដោយលោកឧកញ៉ា ប៉ិច ប៉ូឡែន ក្នុងនាមស្ថាប័នអប់រំឈានមុខនៅកម្ពុជា បានបង្ហាញពីឆន្ទៈក្នុងការ​ចូលរួមចំណែកជាមួយនឹងក្រមហ៊ុន អប្សរា មេឌា សឺវីស ដើម្បី​ផ្តល់នូវគុណតម្លៃឱ្យកាន់តែប្រសើរដល់ ទៅដល់អ្នកមើល អ្នកអានទាំងអស់នៅក្នុងបណ្តាញ AMS ជាពិសេគឺជាការចូលរួមចំណែកលើកកម្ពស់តំលៃនៃវិជ្ជាជីវៈសារព័ត៌មាន។

សូមជំរាបជូនថា ក្រុមហ៊ុនវេសឡាញ អេឌ្យូខេសិនគ្រុប (WEG) គឺជា​បណ្តាញ​សាលា​រៀន​ដ៏​ធំមួយ​នៅ​ក្នុង​ប្រទេស​កម្ពុជា ដែលទទួលបានការ​គាំទ្រ ដោយ​បច្ចុប្បន្ន WEG កំពុង​ដំណើរការសេវាកម្មអប់រំចំណុះជាង ២៧សាខា ដោយមានសិស្សកំពុងសិក្សាសរុបប្រមាណ ១ម៉ឺន៥ពាន់នាក់។

ដោយឡែក ក្រុមហ៊ុន អប្សរា មេឌា សឺវីស (AMS) ជាស្ថាប័នផ្សព្វផ្សាយដែលមានសមត្ថភាពផលិតមាតិកា និងព័ត៌មាន ដែលផ្តោតសំខាន់លើប្រភេទមាតិកាអប់រំប្រកបដោយគុណតម្លៃពិតដើម្បីជំរុញការយល់ដឹងរបស់ប្រជាជនសំដៅចូលរួមចំណែកជាផ្នែកសំខាន់មួយសម្រាប់សម្រេចគោលដៅអភិវឌ្ឍជាមួយរាជរដ្ឋាភិបាល។ AMS មានប្រព័ន្ធផ្សព្វផ្សាយបែបចម្រុះ (multimedia) និងបង្កើតឡើងក្នុងគោលបំណងផ្សព្វផ្សាយឱ្យបានទូលំទូលាយ និងសំបូរបែបក្នុងទីផ្សារប្រព័ន្ធផ្សព្វផ្សាយឌីជីថលនាពេលបច្ចុប្បន្ន និងអនាគត៕