ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គិតមកដល់ពេលបច្ចុប្បន្ននេះ រាជធានីខេត្តទាំង២៥ នៅទូទាំងប្រទេសកម្ពុជា បានសម្រេចបញ្ចប់ការបន្ទោបង់ពាសវាលពាសកាល (ODF) ក្នុងនោះមានភូមិចំនួន ១៤ ៥៧៦ ឃុំចំនួន ១៦៥២ ស្រុកចំនួន១៦៣ ក្រុងចំនួន៣៣ និងខណ្ឌចំនួន១៤, នេះបើតាមការលើកឡើងរបស់ប្រមុខរាជរដ្ឋាភិបាលកម្ពុជា ក្នុងសារលិខិតអបអរសាទរទិវាជាតិលើកកម្ពស់អនាម័យជនបទ លើកទី១៦។
សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ចាត់ទុកថា នេះជាសមិទ្ធផលជាប្រវត្តិសាស្រ្តបន្ថែមថ្មីមួយទៀតរបស់កម្ពុជា ខណអត្រាគ្របដណ្តប់អនាម័យជនបទបានកើនឡើងពី៩០ភាគរយ នៅឆ្នាំ២០២៤ ដល់៩៥ភាគរយ ក្នុងឆ្នាំ២០២៥នេះ នឹងឱ្យសម្រេចបាន១០០ភាគរយ នៅឆ្នាំ២០៣០។
សមិទ្ធផលដែលសម្រេចបាននេះ បញ្ជាក់ឱ្យឃើញយ៉ាងច្បាស់ថា រាជរដ្ឋាភិបាល ភាគីពាក់ព័ន្ធទាំងអស់ ព្រមទាំងប្រជាពលរដ្ឋទូទាំងប្រទេសផងដែរ បានរួមគ្នាខិតខំប្រឹងប្រែងអនុវត្តការងារលើកកម្ពស់អនាម័យជនបទប្រកបដោយការយកចិត្តទុកដាក់ខ្ពស់ ស្របតាមគោលនយោបាយយុទ្ធសាស្រ្ត ផែនការសកម្មភាព និងយន្តការដែលបានដាក់ចេញនាពេលកន្លងមក។ លទ្ធផលនេះ ក៏បានបង្ហាញឱ្យឃើញការប្រែប្រួលជាវិជ្ជមាននូវកម្រិតនៃការយល់ដឹងអំពីការប្រតិបត្តិអនាម័យល្អ។
សូមជំរាបជូនថា រាជរដ្ឋាភិបាលបានកំណត់យកថ្ងៃទី១៣ ខែវិច្ឆិកា ជាថ្ងៃប្រារព្ធទិវាជាតិលើកកម្ពស់អនាម័យជនបទ ក្នុងគោលបំណងដើម្បីផ្សព្វផ្សាយ និងបង្កើនការយល់ដឹងអំពីសារៈសំខាន់ នៃការលើកកម្ពស់អនាម័យជនបទ និងរួមគ្នាធ្វើឱ្យស្ថានភាពអាម័យនៅកម្ពុជាកាន់តែប្រសើរឡើង ដើម្បីឈានទៅសម្រេចបាននូវគោលដៅដែលបានកំណត់ក្នុងគោលនយោបាយជាតិស្តីពីការផ្គត់ផ្គង់ទឹកស្អាត និងអនាម័យ។
ប្រមុខរាជរដ្ឋាភិបាលបានលើកឡើងថា ការលើកកម្ពស់អនាម័យជនបទ នៅតែជាការងារអាទិភាពរបស់រាជរដ្ឋាភិបាល, ជាក់ស្តែង យុទ្ធសាស្រ្តបញ្ចកោណដំណាក់កាលទី១ និងកម្មវិធីនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភាសម្រាប់ការកសាង និងការការពារមាតុភូមិឆ្នាំ២០២៣-២០២៨ បានបញ្ជាក់យ៉ាងច្បាស់អំពីការបន្តជំរុញការអភិវឌ្ឍជនបទ តាមរយការកែលម្អលក្ខខណ្ឌនៃការរស់នៅរបស់សហគមន៍ជនបត ដោយផ្តោតជាសំខាន់លើការពង្រីកវិសាលភាព នៃការផ្តល់សេវាផ្គត់ផ្គង់ទឹកស្អាត និងអនាម័យជនបទឱ្យបាន១០០ភាគរយ នៅឆ្នាំ២០៣០៕
