ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អង្គភាពប្រឆាំងអំពើពុករលួយ (ACU) បានប្រកាសថា ខ្លួននឹងចូលរួមសង្កេតការណ៍ ក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥ខាងមុខ។ សម្រាប់ការចូលរួមសង្កេតការណ៍នេះ ACU ប្រកាសជ្រើសរើសអ្នកស្ម័គ្រចិត្តសរុបចំនួន ៣៧០០នាក់ ដើម្បីចូលរួមសង្កេតការណ៍តាមមណ្ឌលប្រឡងរាជធានី-ខេត្ត ទាំង២៥។
បើតាមសេចក្តីជូនដំណឹងរបស់ ACU អ្នកដែលអាចស្នើសុំធ្វើជាអ្នកសង្កេតការណ៍ស្ម័គ្រចិត្ត សម្រាប់ការប្រឡងសញ្ញាបត្រមធ្យមសិក្សាទុតិយភូមិនាពេលខាងមុខ ចាំបាច់ត្រូវមានលក្ខខណ្ឌដូចជា ៖ មានអាយុចាប់ពី ២១ឆ្នាំឡើងទៅ, ជានិស្សិត ឬបុគ្គលផ្សេងទៀតក្រៅពីព្រះសង្ឃ (កំពុងគង់ចាំព្រះវស្សា) គ្រូបង្រៀន មន្រ្តីរាជការសាធារណៈ និងអ្នកសារព័ត៌មាន, មិនត្រូវចូលសង្កេតការណ៍ក្នុងមណ្ឌលប្រឡងដែលមានបងប្អូន សាច់ញាតិ ឬមិត្តភក្តិជាបេក្ខជនប្រឡង ដែលនេះជាទំនាស់ផលប្រយោជន៍, ត្រូវចូលរួមវគ្គបណ្តុះបណ្តាល ឬកិច្ចប្រជុំផ្សព្វផ្សាយ ស្តីពីការងារសង្កេតការណ៍ការប្រឡងសញ្ញាបត្រមធ្យមសិក្សាទុតិយភូមិ, មានអាស័យដ្ឋានស្នាក់នៅរាជធានី ឬខេត្តដែលខ្លួនសុំចុះឈ្មោះជាអ្នកសង្កេតការណ៍ស្ម័គ្រចិត្ត ហើយចំពោះអ្នកស្ម័គ្រចិត្តចូលរួមសង្កេតការណ៍ការប្រឡងនៅខេត្តឧត្តរមានជ័យ ត្រូវមកសង្កេតការណ៍ការប្រឡងនៅក្នុងភូមិសាស្រ្តស្រុកពួក នៃខេត្តសៀមរាបវិញ, មានមធ្យោបាយ ធនធាន ពេលវេលាគ្រប់គ្រាន់សម្រាប់បំពេញការងារសង្កេតការណ៍ស្ម័គ្រចិត្តដោយខ្លួនឯង រួមទាំងមធ្យោបាយធ្វើដំណើរ, ត្រូវគោរពច្បាប់ បទប្បញ្ញាត្តិ លិខិតបទដ្ឋានគតិយុត្តជាធរមាន ការចាត់តាំង ដឹកនាំ ប្រគល់ភារកិច្ចរបស់ក្រុមដឹកនាំសង្កេតការណ៍ថ្នាក់កណ្តាល ថ្នាក់រាជធានី-ខេត្ត និងថ្នាក់មណ្ឌល ជាពិសេសគោរពបានយ៉ាងខ្ជាប់ខ្ជួនបទប្បញ្ញត្តិ សេចក្តីណែនាំ យល់តួនាទីភារកិច្ចអ្នកសង្កេតការណ៍ស្ម័គ្រចិត្ត។
កាលបរិច្ឆេទ នៃការចុះឈ្មោះធ្វើអ្នកសង្កេតការណ៍ស្ម័គ្រចិត្ត គឺចាប់ពីថ្ងៃជូនដំណឹងនេះ រហូតដល់ថ្ងៃសុក្រ ទី១៥ ខែសីហា ឆ្នាំ២០២៥ វេលាម៉ោង ២៤:០០នាទី។
សម្រាប់ការចុះឈ្មោះ សូមចូលទៅកាន់តំណភ្ជាប់ Link: https://tinyurl.com/ybne437n ដើម្បីបំពេញព័ត៌មាន ដោយបំពេញពាក្យសុំភ្ជាប់មកជាមួយនូវ អត្តសញ្ញាណច្បាស់លាស់ ដូចជា អត្តសញ្ញាណបណ្ណ ឬបណ្ណសម្គាល់ខ្លួន (និស្សិត បុគ្គលិកឯកជន) និង រូបថត៕
