ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ស្នាដៃចម្លាក់ស្បែក បង្កើតឡើងដោយសិស្សមួយក្រុមមកពី សាលារៀនជំនាន់ថ្មី នៃវិទ្យាល័យព្រែកលៀប បានទាក់ទាញចំណាប់អារម្មណ៍អ្នកចូលរួមទស្សនា ក្នុងឱកាសទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៧ កន្លងទៅនេះ ។ អ្វីដែលគេចាប់អារម្មណ៍ គឺពួកគេមានគំនិតច្នៃប្រឌិតក្នុងការបង្កើតជាចម្លាក់ស្បែករួមចំណែករក្សាសម្បត្តិវប្បធម៌ខ្មែរ។
យុវតី រស់ ភាវី សិស្សថ្នាក់ទី១០ សាលារៀនជំនាន់ថ្មី នៃវិទ្យាល័យព្រែកលៀប និងតំណាងក្រុមសិស្ស បានប្រាប់ឱ្យដឹងថា ការបង្កើតស្នាដៃចម្លាក់ស្បែកនេះឡើង ដើម្បីបង្ហាញអំពីវប្បធម៌របស់ខ្មែរ និងចង់ថែរក្សាចម្លាក់ស្បែកដែលដូនតាខ្មែរបានបន្សល់ទុកបន្តទៅអ្នកជំនាន់ក្រោយ។ ភាវី បន្តថា ចម្លាក់ស្បែកនេះ ត្រូវដាប់ដោយដៃផ្ទាល់ ទាមទារករអត់ធ្មត់ ផ្ចិតផ្ចង់ យកចិត្តទុកដាក់ ទើបអាចរចនាចេញជារូបរាង។
តំណាងក្រុមសិស្ស រូបនេះ បញ្ជាក់បន្ថែមថា ក្រៅពីស្នាដៃចម្លាក់ស្បែក ក៏មានស្នាដៃគំនូរអង្ករ និងស្នាដៃតែងនិពន្ធរបស់ក្រុមសិស្ស សាលារៀនជំនាន់ថ្មី នៃវិទ្យាល័យព្រែកលៀបផងដែរ ដោយសារដៃទាំងនេះ ធ្វើឡើងដោយក្តីស្រឡាញ់ និងចង់ស្វែងយល់ពីវប្បធម៌ខ្មែរ។
យុវតី រស់ ភាវី បញ្ជាក់ថា ទម្រាំបង្កើតស្នាដៃចម្លាក់ស្បែកឱ្យចេញជារូបរាង គឺក្រុមរបស់ខ្លួនឆ្លងកាត់ការលំបាកជាច្រើន ដោយសារមិនមានក្រុមជំនាញជួយណែនាំ ទើបធ្វើឡើងតាមរយៈការសិក្សាស្រាវជ្រាវតាមប្រព័ន្ធអ៊ីនធឺណិត យូធូប ហើយក៏មានការពន្យល់ណែនាំពីលោកគ្រូដឹកនាំផងដែរ។ ភាវី បន្តថា ដោយសារការជួយណែនាំ បង្ហាត់បង្រៀន និងការជំរុញលើកទឹកចិត្តរបស់លោកគ្រូ អ្នកគ្រូនៅសាលា ទើបធ្វើឱ្យស្នាដៃនេះអាចសម្រេចជារូបរាងបាន។
សិស្សថ្នាក់ទី១០ សាលារៀនជំនាន់ថ្មី នៃវិទ្យាល័យព្រែកលៀប រូបនេះ លើកឡើងថា ការបង្កើតស្នាដៃចម្លាក់ស្បែកនេះ នឹងចូលរួមចំណែកជួយបណ្ដុះស្មារតីយុវជន សិស្សានុសិស្សទាំងអស់ស្វែងយល់ឱ្យច្បាស់ពីវប្បធម៌ខ្មែរ ស្រឡាញ់វប្បធម៌ខ្មែរ និងចូលរួមថែរក្សាសម្បត្តិវប្បធម៌ខ្មែរកុំឱ្យបាត់បង់។ លើសពីនេះ តាមរយៈស្នាដៃចម្លាក់ស្បែកនេះ ក៏បានជួយសិស្សឱ្យមានគំនិតច្នៃប្រឌិត និងមានការអភិវឌ្ឍសមត្ថភាពផងដែរ៕
