ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាលាបឋមសិក្សាប្រាសាទគោល ស្ថិតនៅស្រុកបន្ទាយស្រី ខេត្តសៀមរាប ជាសាលាបានអនុវត្តន៍កម្មវិធីសិក្សាសួនសិក្សា និងផ្ទះបាយសិក្សាដែលជាកម្មវិធីរបស់ក្រសួងអប់រំ យុវជន និងកីឡា និងទទួលបានបន្ថែមអំពីបច្ចេកទេស និងសម្ភារៈពីអង្គការភ្លែនអន្តរជាតិកម្ពុជា។
លោក សុខ ស៊ី នាយកសាលាបឋមសិក្សាប្រាសាទគោល បានលើកឡើងថា សួនសិក្សាជាសួនដែលបង្កើតឡើងសម្រាប់សិស្សរៀនសូត្រដោយផ្សារភ្ជាប់មេរៀនពីក្នុងថ្នាក់ ទៅសួនសិក្សានិងផ្ទះបាយសិក្សា។ លោកបន្តថា កម្មវីធីបានចាប់ផ្ដើមនៅឆ្នាំ២០១៩ ពោលគឺមុនពេលកូវីដមកដល់ និងបន្តរហូតមកដល់ពេលបច្ចុប្បន្ន។ កម្មវិធីសួនសិក្សានេះ មានការអនុវត្តជាប់លាប់ពីសំណាក់លោកគ្រូអ្នកគ្រូ និងការចូលរួមរបស់សិស្សានុសិស្សជាបន្តបន្ទាប់ជារៀងរាល់ឆ្នាំ។
នាយកសាលាបឋមសិក្សារូបនេះបន្ថែមថា សួនសិក្សានេះក៏បានបន្ថែមចំណេះដឹងបែបរីករាយដល់សិស្សផងដែរ ព្រោះពួកគាត់អាចរៀនពីការដាំដុះ ការធ្វើការងារជាក្រុម ស្វែងយល់ពីសមភាពយេនឌ័រក្នុងការរស់នៅផងដែរ។
កុមារី សូរិយ៉ា ជាសិស្សថ្នាក់ទី៦ នៃសាលាបឋមសិក្សាប្រាសាទគោល បានប្រាប់ឱ្យដឹងថា ក្រៅពីនៅសាលារៀន នាងក៏បានជួយលោកតាដាំដំណាំផ្សេងៗនៅផ្ទះដូចជា ត្រកួន ម្ទេស ត្រប់ ស្លឹកគ្រៃ មើមល្មៀត និងននោង។ សូរិយ៉ា និយាយដោយទឹកមុខរីករាយថា ក្រោយពីមានការដាំបន្លែនៅផ្ទះ ពុកម៉ែរបស់ខ្លួនអាចសល់លុយពីការទិញបន្លែនៅផ្សារ ថែមទាំងទទួលបានអាហារពីបន្លែធម្មជាតិមិនមានជាតិគីមីផងដែរ។ លើសពីនេះ ចំណេញទាំងថវិការសម្រាប់ចំណាយលើម្ហូបអាហារ ការចេះធ្វើការងារផ្ទះច្រើន និងទទួលបានជីវជាតិពីបន្លែគ្រប់គ្រាន់ទៀតផង។
ជាមួយគ្នានេះដែរ កុមារី សក្ខណា ក៏បានឱ្យដឹងដែរថា នៅក្នុងការរៀនអំពីកម្មវិធីសួនសិក្សាមានអត្ថប្រយោជន៍ជាច្រើនដូចជា ការធ្វើការងារជាក្រុម ការចេះចំអិនម្ហូប និងបង្កើនទំនាក់ទំនងល្អរវាងសិស្ស និងគ្រូ។ សក្ខណា បន្ថែមថា ក្រៅពីចំណេះដឹងទាំងនោះ សក្ខណា និងសិស្សឯទៀតក៏បានស្វែងយល់បន្ថែមកាន់តែច្បាស់អំពីរូបធរណីមាត្រដែលធ្វើជាសួនបន្លែមានរូបរាងផ្សេងៗគ្នាផងដែរ។ សួនរូបធរណីមាត្រទាំងនោះរួមមាន ចតុកោណព្នាយ ការ៉េ ត្រីកោណ រង្វង់ជាដើមដោយមានបន្លែជាច្រើនមុខដូចជា ត្រកួន ត្រប់ ស្ពៃ ជីរណា ស្លឹកគ្រៃ ននោង ម្រះ ខ្ញី ល្ហុង និងបន្លែជាច្រើនទៀត។
ជារួមកុមារីទាំងពីរ បានលើកឡើងស្របគ្នាថា ពួកគេពិតជាសប្បាយរីករាយដែលបានទទួលទានបន្លែស្រស់ធម្មជាតិ និងដាំដោយខ្លួនឯងផ្ទាល់ និងអាចជួយឱ្យមានសុខភាពល្អ លូតកម្ពស់ ឆ្អឹងរឹងមាំ ស្មារតីរហ័សរហួន។ កុមារីទាំងពីរក៏ចង់ឃើញកុមារទាំងអស់នៅគ្រប់សាលារៀនមានចំណូលចិត្តក្នុងការដាំដុះ និងស្វែងយល់ឱ្យបានប្រសើរឡើងពីអត្ថប្រយោជន៍នៃកម្មវិធីសួនសិក្សា៕
