ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មានសកម្មភាពសម្រាប់មនុស្សទូទៅមួយចំនួនក្នុងការចាប់ផ្តើមបរិភោគអាហារដែលមានសុខភាពល្អ ដូចជាការចាត់ជាអាទិភាព នៃប្រភេទអាហារ ធ្វើម្ហូបខ្លួនឯង ស្វែងយល់ពីគ្រឿងទេស បន្ថយជាតិផ្អែម រក្សារាងកាយឱ្យមានជាតិទឹក និងសកម្មភាពផ្សេងៗទៀត។ គេហទំព័រ Healthline មានរៀបរាប់លម្អិតនូវចំណុចសំខាន់ៗទាំង១០នៅខាងក្រោម ៖
១.ផ្តល់អាទិភាពអាហារដែលមានប្រភពពីធម្មជាតិ ៖ អាហារធម្មជាតិមានប្រភពមកពីបន្លែផ្លែឈើ សណ្ដែក និងគ្រាប់ធញ្ញជាតិ ប្រភេទអាហារទាំងនេះងាយស្រួលរៀបចំសម្រាប់អាហារសម្រន់។
២. ធ្វើអាហារនៅផ្ទះ ៖ ការចម្អិនអាហារនៅផ្ទះរួមចំណែកជាច្រើនទៅកាន់ការទទួលបាននូវរបបអាហារមួយដែលត្រឹមត្រូវហើយក៏ស្របនឹងចំណូលចិត្ត។ ប្រសិនបើអ្នកមានទម្លាប់ទៅទិញអាហារនៅខាងក្រៅ ឬក៏ទៅពិសាអាហារនៅភោជនីយដ្ឋានក៏មិនចោទជាបញ្ហានោះទេ ដោយគ្រាន់តែធ្វើនៅផ្ទះម្តងទៅពីរដងក្នុងមួយសប្តាហ៍ក៏បាន។
៣. ទៅហាងទំនិញឱ្យបានញឹកញាប់ ៖ ប្រសិនបើបន្ទប់ចង្រ្កានបាយរបស់អ្នកស្តុកពោរពេញទៅដោយអាហារដែលល្អ នោះអ្នកនឹងកាន់តែបង្កើនបាននៅរបៀបរស់នៅប្រកបដោយបរិយាកាសសុខភាពល្អ និងអាហារល្អ។ ដោយគ្រាន់តែចំណាយពេលម្តងទៅពីរដងក្នុងការទៅផ្សារ ដើម្បីរើសយកអាហារល្អៗស្រស់ៗ និងមានសារធាតុចិញ្ចឹម នោះទម្លាប់នៃការរស់នៅដែលមានសុខភាពល្អក៏ត្រូវបានពង្រឹងដូចគ្នា។
៤. ស្វែងយល់អំពីរបបអាហារ ៖ ការស្វែងយល់អំពីប្រភេទអាហារ មិនមែនមានន័យថា ត្រូវធ្វើជាអ្នកជំនាញ ឬត្រូវមានចំណេះដឹងល្អឥតខ្ចោះត្រង់ផ្នែកចំណីអាហារនោះទេ! ប៉ុន្តែកាលដែលបានដឹងខ្លះៗអំពីប្រភេទអាហារដែលត្រូវទទួលទានរាល់ថ្ងៃ វាបង្កបាននៅភាពងាយស្រួលក្នុងទិញបន្ថែម និងស្គាល់ពីវេលាជាក់លាក់ដែលត្រូវទទួលទាន។ បន្ថែមពីនោះ វាជាគន្លឹះមួយជួយឱ្យទទួលបានប្រសិទ្ធភាពក្រោយបរិភោគ ហើយប្រសិនបើអ្នកតែងតែញាំអាហារនៅខាងក្រៅរៀងរាល់ល្ងាច នោះការធ្វើអាហារដោយដៃខ្លួនឯងមួយសប្តាហ៍ម្តង ក៏ចាត់ថាជារឿងប្រសើរដែរ។
៥. កុំកុហកខ្លួនឯង ៖ អ្នកមិនគួរកុហខ្លួនឯងនោះទេ ព្រោះអ្នកដឹងច្បាស់ហើយថា តើប្រភេទអាហារណាល្អ ហើយអាហារណាមិនល្អ ដូច្នេះគួរតែរក្សាជំហរការបរិភោគឱ្យបានទៀងទាត់ ជាជាងប្រាប់ខ្លួនឯងថាវាមិនអីនោះទេ ដែលញ៉ាំអាហាមិនល្អមួយថ្ងៃ ឬពីរថ្ងៃ។
៦. កាត់បន្ថយជាតិផ្អែម ៖ ការកាត់បន្ថយសារជាតិផ្អែមនៅក្នុងអាហារ ជាពិសេសនៅក្នុងប្រភេទភេសជ្ជៈ ហើយអ្វីដែលអាចធ្វើបាន គឺការកំណត់ជាតិស្ករនូវរាល់អ្វីដែលបានបរិភោគ មិនថាកាហ្វេ ឬអាហារ។
៧. ការជ្រើសរើសអាហារថាមពល ៖ នៅពេលដែលយើងឃ្លាន អ្វីដែលធ្វើមុនគេគឺព្យាយាមរកអ្វីមកបំពេញក្រពះឱ្យឆ្អែតសិន ដោយមិនបានចាប់អារម្មណ៍អំពីគុណភាពប៉ុន្មានឡើយ។ ប៉ុន្តែក៏គួរគិតអំពីអាហារដែលមានសារធាតុចិញ្ចឹម មិនមែនជ្រើសតែអាហារដែលមានកាឡូរីនោះទេ។ គួរមានការត្រៀមទុកនូវអាហារសម្រន់ដែលល្អនៅក្បែរខ្លួនឱ្យហើយ។
៨. ញាំអាហារគ្រប់សារធាតុ ៖ បើនិយាយអំពីរបបអាហារមានចម្រុះនិងមាននៅក្នុងប្រភពផ្សេងៗគ្នា ដែលមាននៅក្នុងបន្លែ ផ្លែឈើ គ្រាប់ធញ្ញជាតិនិងគ្រាប់សណ្តែក សាច់ស៊ុត និងត្រីជាដើម។ ដូច្នេះត្រូវសាកល្បងឱ្យមានភាពចម្រុះ។
៩. រក្សារាងកាយឱ្យមានជាតិទឹក ៖ ការធ្វើឱ្យរាងកាយមានផ្ទុកនូវសារជាតិទឹកគ្រប់គ្រាន់ គឺជាផ្នែកមួយជួយបំពេញនូវការពង្រឹងសុខភាពល្អ ហើយការពិសារទឹកគឺជាចំណែកសំខាន់ក្នុងការជួយឱ្យរាងកាយអាចរក្សាជាតិទឹកបានល្អ។ ប្រសិនបើអ្នកមិនសូវជាមានឱកាសទទួលទានទឹកធម្មតានោះទេ គួររកភេសជ្ជៈបំពេញជាតិទឹកដើម្បីជាជំនួយ។
១០. កុំបង្ខំខ្លួនឯងឱ្យបរិភោគអាហារមិនចូលចិត្ត ៖ ប្រសិនបើអ្នកបានរិះរកគ្រប់វិធី ក្នុងការទម្លាប់ខ្លួនឱ្យពិសាអាហារដែលមានគុណភាពល្អ មានសារធាតុចិញ្ចឹមហើយ ប៉ុន្តែប៉ះចំអាហារដែលអ្នកមិនចូលចិត្តនោះ សូមកុំបង្ខំបន្តញ៉ាំទៀតអី គឺជ្រើសអាហារផ្សេងជំនួសវិញ។ កុំបង្ខំខ្លួនឯងទៅបរិភោគដោយគ្រាន់តែកំណត់ថា វាជាប្រភេទអាហារមានសុខភាពល្អ គួរជ្រើសទាំងសុខភាព ចំណូលចិត្ត និងគុណភាពភ្ជាប់មកជាមួយ៕
