ក្នុងពិធីប្រគល់សញ្ញាបត្រជូនដល់និស្សិត នៃវិទ្យាស្ថានវ៉ាន់ដា កាលពីថ្ងៃទី១១ មីនា សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានលើកឡើងថា ប្រទេស​មួយខ្លាំងបាន លុះ​ត្រាតែ​មាន​មូលធន​មនុស្ស​ខ្លាំង ហើយ​ប្រទេស​មួយ​មានអារ្យធម៌រុងរឿងបាន លុះត្រាតែមាន​មូលធន​មនុស្ស​ខ្លាំងពូកែ។

ក្នុងនោះសម្តេចនាយករដ្ឋមន្ត្រី ក៏​បានគូសបញ្ជាក់ថា មូលធនមនុស្ស គឺជាកម្លាំង ដែលមិនអាចខ្វះបាន និងចាំបាច់បំផុត សម្រាប់ការអភិវឌ្ឍសង្គមជាតិមួយឱ្យរុងរឿង។ ដូច្នេះ តើអ្វីជាមូលធនមនុស្ស?

បើតាមនិយមន័យ ដែលកំណត់ដោយ ធនាគារពិភពលោក (World Bank) មូលធនមនុស្ស គឺសំដៅលើបុគ្គល ដែលមានទាំងចំណេះដឹង ជំនាញ និងសុខភាពមាំមួន ដែលគាត់បានវិនិយោគ និងទទួលបានតាមរយៈបទពិសោធន៍ជីវិត ដែលអាចឱ្យគាត់ដឹងអំពីសក្តានុពលរបស់ខ្លួន ក្នុងនាមជាសមាជិកផលិតភាពនៃសង្គម។

ធនាគារពិភពលោក បានគូសបញ្ជាក់ថា ការវិនិយោគលើមនុស្ស តាមរយៈអាហារូបត្ថម្ភ ការថែទាំសុខភាព ការអប់រំប្រកបដោយគុណភាព និងការទទួលបានឱកាសអភិវឌ្ឍជំនាញ និងការងារសមរម្យ គឺជាគន្លឹះនៃការអភិវឌ្ឍមូលធនមនុស្ស។ ខណៈការអភិវឌ្ឍមូលធនមនុស្ស គឺជាគន្លឹះនៃការបញ្ចប់ភាពក្រីក្រ និងធ្វើឱ្យសង្គមមួយ កាន់តែមានបរិយាប័ន្ន។

ធនធានមនុស្ស និងមូលធនមនុស្ស មានទំនាក់ទំនងគ្នាយ៉ាងជិតស្និទ្ធ ដែលពាក្យទាំងពីរនេះ អាចចាត់ទុកថា ជំនាញរបស់មនុស្សដែលអាចប្រើប្រាស់បាន ក្នុងការបង្កើនប្រសិទ្ធភាពការងារ និងប្រាក់ចំណេញ។ យ៉ាងណាក៏ដោយ ធនធានមនុស្ស ចាំបាច់ត្រូវឆ្លងកាត់ការបណ្ដុះបណ្ដាល អភិវឌ្ឍ ផ្ដល់ឱកាស និងការប្រកួតប្រជែង។ ធនធានមនុស្ស អាចអភិវឌ្ឍទៅជាមូលធនមនុស្សបាន គឺត្រូវការពេលវេលា ទើបពួកគេអាចទទួលបានបំណិនជីវិត សមត្ថភាពបំពេញការងារប្រកបដោយប្រសិទ្ធភាព និងការប្រកួតជែង។

ក្នុងបរិបទកម្ពុជា តាមរយៈយុទ្ធសាស្ត្របញ្ចកោណដំណាក់កាលទី១ រាជរដ្ឋាភិបាល ផ្ដោតសំខាន់លើការអភិវឌ្ឍមុំចំនួន ៥ រួមមាន មនុស្ស ផ្លូវ ទឹក ភ្លើង និងបច្ចេកវិទ្យា ដែលក្នុងនោះមូលធនមនុស្ស គឺជាអាទិភាពគន្លឹះទីមួយសម្រាប់រាជរដ្ឋាភិបាល ក្នុងការជំរុញសេដ្ឋកិច្ច ឱ្យសម្រេចបាននូវគោលដៅរបស់កម្ពុជានៅឆ្នាំ២០៣០ និងធ្វើឱ្យកម្ពុជាក្លាយជាប្រទេសមានចំណូលខ្ពស់នៅឆ្នាំ២០៥០។

ដោយផ្តោតលើចក្ខុវិស័យវែងឆ្ងាយដ៏សំខាន់នេះ សម្តេចមហាបវរធិបតី ហ៊ុន ម៉ាណែត បានប្រកាសដាក់ឱ្យអនុវត្ត “កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ” នាថ្ងៃទី១៤ វិច្ឆិកា ២០២៣ សម្រាប់យុវជនចំនួន ១លាន ៥សែននាក់ មកពីគ្រួសារក្រីក្រ និងគ្រួសារងាយរងហានិភ័យ ដើម្បីទទួលបាននូវចំណេះជំនាញច្បាស់លាស់ និងក្លាយជាផ្នែកមួយក្នុងការជំរុញសេដ្ឋកិច្ចជាតិ ដោយមានក្រសួងការងារ និងបណ្ដុះបណ្ដាលវិជ្ជាជីវៈជាសេនាធិការក្នុងការបណ្តុះបណ្តាលលើមុខជំនាញចំនួន៤៥ ក្នុង​វិស័យចំនួន១០ដែល​ឆ្លើយតប​តាមតម្រូវការ​ទីផ្សារ​ប្រកបដោយ​ចីភាព ភាពធន់ និង​បរិយាបន្ន៕