ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ចំពោះបុគ្គលដែលស្រឡាញ់សៀវភៅខ្លាំង តែងប្រទះនូវបទពិសោធន៍មួយគឺ មានសៀវភៅចាស់ៗ ឬលែងត្រូវការអានជាច្រើនក្បាលតាំងទុកក្នុងទូ ។ ត្បិតថាសៀវភៅខ្លះចាស់ៗហើយអត្ថន័យក្នុងសៀវភៅទាំងនោះប្រើការមិនបានក៏ពិតមែន ប៉ុន្តែបើបោះចោលគឺគួរឱ្យស្តាយជាពន់ពេក។ ដូច្នេះមកដឹងពីគន្លឹះ នៃការកែច្នៃសៀវភៅចាស់ៗឡើងវិញតាមរយៈគេហទំព័រ Wealthofgeeks ដូចតទៅ ៖
១. បង្កើតទៅជាបណ្ណាល័យសម្រាប់មនុស្សទូទៅអាន ៖ កាលដែលប្រមូលសៀវភៅចាស់ៗ ធ្វើជាបណ្ណាល័យតូចមួយដាក់នៅក្រៅផ្ទះ ឬក្បែរផ្ទះ ដើម្បីឱ្យអ្នកដទៃមានឱកាសបានអានដែរ គឺជាការប្រើប្រាស់សៀវភៅចាស់ៗយ៉ាងមានប្រសិទ្ធភាព ដោយហេតុថា យើងបានចូលរួមចំណែក្នុងការជំរុញឱ្យមនុស្សជុំវិញខ្លួនចូលចិត្តអំណាន ជាពិសេសនោះគឺអ្នកជិតខាងតែម្តង។
២. បរិច្ចាគ ៖ ការរៀបសៀវភៅដើម្បីបរិច្ចាគទៅកាន់បុគ្គលដទៃ មិនថានៅបណ្ណាល័យ ហាងសៀវភៅ ឬក៏ទីតំបន់ដែលមានតម្រូវការនោះទេ គឺបានផ្តល់គុណសម្បត្តិជាងយកទៅទុកចោល ហើយថែមទាំងក្លាយជាចំណែកនៃការផ្លាស់ប្តូរជាវិជ្ជមានក្នុងសង្គមទៀតផង។
៣. ផ្លាស់ប្តូរសៀវភៅជាមួយមិត្តភក្តិ ៖ រៀបចំជាកម្មវិធីផ្លាស់ប្តូរសៀវភៅអាន ជាពិសេសជាមួយមិត្តដែលស្រឡាញ់សៀវភៅដែរ ។ ការផ្លាស់ប្តូរសៀវភៅគឺជាវិធីដ៏ល្អក្នុងការផ្តល់សៀវភៅចាស់ៗរបស់អ្នកឱ្យមានផ្ទះថ្មី និងទទួលបានសៀវភៅថ្មីមួយចំនួនមកវិញ។
៤. បង្កើតការតុបតែងដោយប្រើសៀវភៅ ៖ សៀវភៅដែលដាក់តម្រៀបគ្នានៅលើតុ គឺកំពុងតែពេញនិយមនៅក្នុងការតុបតែងផ្ទះ។ សម្រាប់សៀវភៅដែលនៅក្នុងសភាពល្អ លោកអ្នកអាចបន្សំដាក់លើតុដើម្បីធ្វើឱ្យកន្លែងរបស់អ្នកកាន់តែស្រស់ស្អាត។ ប្រសិនបើអ្នកមានសៀវភៅដែលមិនសូវល្អ អាចលាបពណ៌លើវា និងបន្សំគ្នាដើម្បីបង្កើតជាផ្នែកតុបតែងដែលទាន់សម័យ ហើយដាក់វាលើតុ ជាដើម។
៥. លក់សៀវភៅរបស់អ្នកតាមអនឡាញ ៖ ប្រសិនបើអ្នកមានសំណាង អ្នកអាចរកបានលុយពីការលក់សៀវភៅចាស់របស់អ្នកតាមអនឡាញ។ អ្នកអាចផ្សព្វផ្សាយលក់សៀវភៅចាស់នោះនៅលើបណ្តាញសង្គម ឬគេហទំព័រផ្សេងទៀតដែលអ្នកអាចដាក់ការផ្សាយដោយសេរី។ ដើម្បីឱ្យវាបានប្រសិទ្ធភាព សូមលក់សៀវភៅដែលមានសភាពល្អ និងមានតម្លៃសមរម្យ។ អ្នកក៏អាចផ្តល់ជូននូវតម្លៃបញ្ចុះសម្រាប់កញ្ចប់សៀវភៅ ឬផ្លាស់ប្តូរសៀវភៅរបស់អ្នកជាមួយវត្ថុផ្សេងទៀត។
៦. ផ្តល់សៀវភៅជាអំណោយ ៖ ការស្វែងរកអំណោយដ៏ល្អសម្រាប់មិត្តភក្តិ និងអ្នកជាទីស្រឡាញ់ គឺមានការលំបាកណាស់ ។ ដូច្នេះប្រសិនបើអ្នកមានសៀវភៅចាស់ៗណាដែលនៅមានសភាពល្អ អ្នកអាចធ្វើជាអំណោយបាន។ អំណោយជាសៀវភៅរបស់អ្នក គឺមានតម្លៃបំផុត ប្រសិនបើអ្នកទទួលអំណោយជាអ្នកចូលចិត្តការអាន៕
