ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្មីៗនេះក្រុមប្រឹក្សានាយកប្រតិបត្តិរបស់ធនាគារពិភពលោកបានអនុម័តផ្តល់កញ្ចប់កម្ចីទំហំទឹកប្រាក់ ២៥៥,៥លានដុល្លារអាមេរិកដល់ប្រទេសឥណ្ឌា ដើម្បីពង្រឹងការអប់រំជំនាញបច្ចេកទេស និងពង្រឹងគុណភាពអប់រំក្នុងប្រទេសឆ្លើយតបទីផ្សារការងារ ។ គម្រោងនេះនឹងផ្តល់ប្រយោជន៍ដល់សិស្សានុសិស្សប្រមាណជាង ៣សែនប្រាំម៉ឺននាក់ក្នុងមួយឆ្នាំៗ សម្រាប់រយៈពេលប្រាំឆ្នាំទៅមុខ ។ នេះបើតាមការចុះផ្សាយដោយធនាគារពិភពលោក (WB) កាលនៅពាក់កណ្តាលឆ្នាំ២០២៣ ។
ការចុះផ្សាយដោយធនាគារពិភពលោក បានឱ្យដឹងទៀតថា ជារៀងរាល់ឆ្នាំអត្រាសិស្សចុះឈ្មោះចូលរៀននៅកម្រិតឧត្តមសិក្សារដ្ឋ និងឯកជនក្នុងប្រទេសឥណ្ឌាមានចន្លោះពី ២៦ ទៅ ៣៩លាននាក់ ។ គេមើលឃើញថា ឥណ្ឌាកំពុងមានចំនួនសិស្សបន្តការសិក្សាច្រើនជាងគេបង្អស់ក្នុងចំណោមបណ្តាប្រទេសដែលមានប្រជាជនច្រើន ។ ផ្ទុយទៅវិញ ប្រទេសឥណ្ឌាកំពុងខ្វះខាតធនធានមនុស្សផ្នែកជំនាញបច្ចេកទេស និងកើតមានវិសមភាពយេនឌ័រក្នុងវិស័យបច្ចេកទេស ខណៈនិស្សិតឥណ្ឌាជាច្រើន ត្រូវការចំណេះដឹងបន្ថែមលើជំនាញប្រាស្រ័យទាក់ទង និងជំនាញដោះស្រាយវិវាទការងារ ។
បន្ថែមពីលើនេះ គម្រោងកែលម្អនិងពង្រឹងការអប់រំបច្ចេកទេសដែលប្រើប្រាស់ថវិកាកម្ចីធនាគារពិភពលោករបស់ឥណ្ឌា ក៏នឹងជួយគាំទ្រដល់ការសម្រេចចិត្តចាប់ជំនាញសិក្សាបន្ត និងលទ្ធភាពធ្វើការងាររបស់និស្សិតឱ្យកាន់តែមានប្រសិទ្ធភាព ។ គេរំពឹងថា តាមរយៈកម្មវិធីផ្សេងៗរបស់គម្រោងនឹងជួយឱ្យនិស្សិតឥណ្ឌាមានលទ្ធភាពស្រាវជ្រាវលើជំនាញកាន់តែទូលាយ មានភាពជាសហគ្រិន និងបង្កើតគំនិតច្នៃប្រតិដ្ឋថ្មីលើជំនាញរបស់ពួកគេ ។ ជាងនេះទៅទៀត គម្រោងក៏ជួយ ផ្សព្វផ្សាយកាន់តែទូលាយអំពីបញ្ហាយេនឌ័រ និងការលើកកម្ពស់សមត្ថភាពស្ត្រីក្នុងមុខវិជ្ជាវិទ្យាសាស្ត្រ បច្ចេកវិទ្យា វិស្វរកម្ម និងគណិតវិទ្យា (STEM) ។
គួរបញ្ជាក់ថា ប្រទេសឥណ្ឌាមានប្រព័ន្ធអប់រំថ្នាក់ឧត្តមសិក្សាធំជាងគេ និងរីកចម្រើនគ្រាន់គួរសមនៅក្នុងពិភពលោក ។ បច្ចុប្បន្នប្រទេសឥណ្ឌាមានប្រជាជនសរុបប្រមាណជាង ១ពាន់បួនរយលាននាក់ ខណៈយុវជនកំពុងបន្តការសិក្សាអាយុចន្លោះពី ១៥ – ២៩ឆ្នាំ ប្រមាណជាង ២៦៥លាននាក់ត្រូវការការបណ្តុះបណ្តាលជំនាញបច្ចេកទេសកម្រិតខ្ពស់ ដើម្បីឱ្យពួកគេត្រៀមខ្លួនបម្រើការងារផ្សេងៗ និងធ្វើការងារនៅឧស្សាហកម្មក្នុងប្រទេស៕
