ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទីក្រុងប៉ារីស គ្រោងនឹងពង្រីកប្រព័ន្ធបំលែងទឹកទន្លេជាម៉ាស៊ីនត្រជាក់ក្នុងទីក្រុង (urban cooling system) ដោយទាញយកទឹកពីទឹកទន្លេ Seine ខណៈដែលទីក្រុងនេះកំពុងកើនឡើងនូវតម្រូវការប្រើប្រាស់ម៉ាស៊ីនត្រជាក់ ស្របពេលមានការទប់ស្កាត់ការបញ្ចេញកាបូន។ នេះជាការលើកឡើង របស់លោកស្រី Raphaelle Nayral អគ្គលេខាធិការ Paris Fraicheur ដែលជាក្រុមហ៊ុនថាមពលមួយរបស់បារាំង។
បច្ចុប្បន្ន ប្រព័ន្ធបម្លែងទឹកទន្លេជាម៉ាស៊ីនត្រជាក់ដ៏ធំបំផុតក្នុងទ្វីបអឺរ៉ុបកំពុងពង្រាយស្ទើរពេញទីក្រុងប៉ារីស រួមទាំងអគារ ដែលនឹងប្រើសម្រាប់កីឡាអូឡាំពិកទីក្រុងប៉ារីសនារដូវក្ដៅខាងមុខផងដែរ។ លោកស្រី Nayral បានបញ្ជាក់ថា ប្រព័ន្ធបម្លែងទឹកទន្លេជាម៉ាស៊ីនត្រជាក់ ត្រូវបានដំណើរការដោយ Paris Fraicheur ដែលគ្រប់គ្រងដោយក្រុមហ៊ុនថាមពលបារាំង Engie ចំនួន ៨៥ ភាគរយ និងក្រុមហ៊ុនដឹងជញ្ជូន RATP ចំនួន ១៥ ភាគរយ។
លោកស្រី អគ្គលេខាធិការ បានសង្កត់ធ្ងន់ថា «បច្ចេកវិទ្យាប្រព័ន្ធបម្លែងទឹកទន្លេជាម៉ាស៊ីនត្រជាក់ នឹងទាញយកទឹកពីទន្លេ ដើម្បីប្រើជំនួសម៉ាស៊ីនត្រជាក់ក្នុងអាគារ។ ហេតុនេះ យើងអាចគ្រប់គ្រងកម្រិតនៃការបំភាយកាបូនរបស់ម៉ាស៊ីនត្រជាក់នៅទីក្រុងប៉ារីស។»
លោកស្រីបន្តថា បើតាមផែនការ គេនឹងអភិវឌ្ឍប្រព័ន្ធនេះទៅកាន់ភាគខាងត្បូងនៃទីក្រុង ដោយបំពាក់បច្ចេកវិទ្យានេះ នៅតាមមន្ទីរពេទ្យ មជ្ឈមណ្ឌលថែទាំមនុស្សចាស់ និងផ្ទះសម្រាប់អ្នកចូលនិវត្តន៍។ លើសពីនេះ គេមានគោលដៅ ពង្រីកបណ្ដាញនេះឱ្យបានបីដងនាពេលបច្ចុប្បន្ន ប្រហែល២៥០គីឡូម៉ែត្រ ពីទីក្រុងប៉ារីស នៅឆ្នាំ ២០៤២។
លោក Ghislain Tezenas Du Montcel ម្ចាស់អគារការិយាល័យ ដែលបានប្រើប្រាស់ប្រព័ន្ធនេះ បាននិយាយថា «ប្រព័ន្ធថ្មីនេះមាននិរន្តរភាពជាងការប្រើម៉ាស៊ីនត្រជាក់ ហើយថែមទាំងផ្តល់អត្ថប្រយោជន៍ផ្នែកហិរញ្ញវត្ថុទៀតផង។»
ចំណែកលោក Tezenas du Montcel បានលើកឡើងថា «ដោយសារតម្លៃអគ្គិសនីបានកើនឡើង យើងគិតថា ការប្រើប្រព័ន្ធបម្លែងទឹកទន្លេជាម៉ាស៊ីនត្រជាក់ អាចសន្សំសំចៃបានច្រើន»។
គួរបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ ទីក្រុងនៅតំបន់អឺរ៉ុបជាច្រើន បានឡើងកម្ដៅគួរឱ្យកត់សម្គាល់ ខណៈកាលពីខែកក្កដា ឆ្នាំ ២០២២ សីតុណ្ហភាពបានឡើងរហូតដល់ ៤៣អង្សាសេ (១០៩ អង្សាហ្វារិនហៃ) ក្នុងទីក្រុងប៉ារីស៕
