ម៉ាឡេស៊ី – លោកស្រី Michelle Yeoh តារាភាពយន្តជនជាតិម៉ាឡេស៊ីបានក្លាយជាតារាស្រីអាស៊ីដំបូងគេបង្អស់ដែលឈ្នះពានតារាស្រីល្អបំផុតនៅក្នុងព្រឹត្តឹការណ៍ Academy Awards ទទួលពាន Oscar តាមរយៈការសម្តែងជាតួអង្គ Evelyn Wang នៅក្នុងរឿង “Everything Everywhere All At Once” ។ ភាពយន្តនេះ បានឈ្នះពានសរុបចំនួន ៧ រួមទាំងពានរូបភាពល្អបំផុត (Best Picture) ។

តាមរយៈជ័យលាភីពាន Oscar ដែលលោកស្រីទទួលបាននេះ លោកស្រី Michelle Yeoh បានចាត់ទុកជ័យជម្នះអូស្ការរបស់ខ្លួនហាក់កំពុងផ្តល់ក្តីសង្ឃឹមឱ្យស្ត្រីនៅតំបន់អាស៊ី ។ តាមរយៈភាពយន្ត លោកស្រីមានបំណងលើកទឹកចិត្តឱ្យស្រ្តីគ្រប់រូបត្រូវមានស្មារតីប្រកួតប្រជែងជានិច្ច ដោយមិនបោះបង់ក្តីស្រមៃផ្ទាល់ខ្លួន ។ នេះបើតាមការចុះផ្សាយរបស់សារព័ត៌មាន NowThis ។

តើលោកស្រី Michelle Yeoh មានប្រវត្តិយ៉ាងដូចម្តេច? លោកស្រី Michelle Yeoh ឬអាចហៅថា Michelle Khan មានឈ្មោះដើម Yeoh Choo Kheng កើតថ្ងៃទី ០៦ ខែសីហា ឆ្នាំ១៩៦២ ទីក្រុង Ipoh ប្រទេសម៉ាឡេស៊ី ។ អ្នកគាំទ្របានចាត់ទុកលោកស្រីជាតារាភាពយន្តស្រីដ៏អស្ចារ្យបំផុត ពិសេសជាតួសម្តែងនៅក្នុងភាពយន្តគ្រោះថ្នាក់ញឹកញាប់ រហូតទទួលបានពានរង្វាន់ Academy Award របស់អូស្ការ ឆ្នាំ២០២៣ ។

ដោយសារលោកស្រី Michelle Yeoh កើតនៅក្នុងគ្រួសារមានជីវភាពធូរធាក្នុងប្រទេសម៉ាឡេស៊ី លោកស្រី Yeoh បានចាប់ផ្តើមភ្ជាប់ខ្លួនជាពន្លកក្នុងវិស័យសិល្បៈតាំងពីវ័យកុមារ ដូចជា ការហាត់របាំបាឡេ លេងបាល់បោះ និងហែលទឹក ។ វ័យជំទង់នាងបានចូលរៀន Royal Academy of Dance នៅទីក្រុងឡុងដ៍ និងបានចូលរួមប្រឡងបវរកញ្ញាម៉ាឡេស៊ីនៅឆ្នាំ ១៩៨៣ ។

លោកស្រី Michelle Yeoh បាននិយាយថា

 “ពិតណាស់ ! ក្មេងៗដែលកំពុងសំឡឹងមើលមកខ្ញុំ នេះគឺជាសញ្ញាណបង្ហាញពីក្តីសង្ឃឹមនិងអាចទៅរួច ។ សមិទ្ធិផលដែលខ្ញុំទទួលបាននេះ បង្ហាញថា យើងត្រូវតែមានក្តីសុបិន្តឱ្យធំ និងធ្វើឱ្យសុបិន្តរបស់យើងក្លាយជាការពិត ! សម្រាប់ស្រ្តី សុំឱ្យកុំឱ្យនរណាម្នាក់បង្អាក់គោលដៅធំបំផុតរបស់យើង។” 

ក្នុងឆ្នាំ១៩៨៤ លោកស្រី Yeoh បានបង្ហាញខ្លួនជាលើកដំបូងនៅក្នុងខ្សែភាពយន្តប្រយុទ្ធ Mao tou ying yu xiao fei xiang (The Owl vs. Bumbo) ។ ថ្វីត្បិតតែជាតួរងក៏ដោយ ប៉ុន្តែលោកស្រីបានធ្វើ​ឱ្យអ្នកគាំទ្រភាពយន្តចាប់អារម្មណ៍ខ្លាំងបំផុតនៅក្នុងវគ្គប្រយុទ្ធ (ក្បាច់គុន) ក្បាច់រាំដ៏ប៉ិនប្រសប់ ព្រមទាំងសិល្បៈសំដែងរស់រវ៉ើក ។ លោ​កស្រីក៏បានចូលរួមសំដែងភាពយន្តជាបន្តបន្ទាប់រហូតមកទល់បច្ចុប្បន្ន ។ អ្វីដែលសាធារណជនកត់សម្គាល់ខ្លាំងបំផុតទៅលើលោកស្រី Yeoh គឺជាតារាភាព​យន្ត​ដែលតស៊ូហ្វឹកហាត់ ជាបុគ្គលមានសេចក្តីអត់ធ្មត់ ក្លាហាន ព្រមទាំងបង្ហាញជំហរលើកទឹកចិត្តដល់ស្ត្រីជានិច្ច ។

ម្ចាស់ពានរង្វាន់ Academy Award របស់អូស្ការ អាយុ ៦០ឆ្នាំរូបនេះ បានបញ្ជាក់បន្ថែមថា ៖ “ក្នុងនាមជាតារាសម្តែងខ្ញុំពិតជាស្រឡាញ់និងពេញចិត្តអ្វីដែលខ្ញុំអាចធ្វើបាន ! អាជីពនេះខ្ញុំពិតជាសំណាងណាស់ ព្រោះវាមិនមែនជាការងារទេ តែវាពិតជាចំណង់ចំណូលចិត្ត។”

សម្រាប់ភាពយន្តបែបកំប្លែង Sci-Fi “Everything Everywhere All at Once” ជាខ្សែភាពយន្តហូលីវូដដំបូងដែលលោកស្រី Michelle Yeoh ដើរតួជាតួឯកស្រី Evelyn Wang សម្ដែងជាម្ចាស់ហាងបោកអ៊ុតសម្លៀកបំពាក់ ប៉ុន្តែបានប្រែខ្លួនជាតួអង្គផ្សេងៗជាច្រើនដើម្បីជួយសង្គ្រោះមនុស្សដោយប្រើភាពឆ្លាតវៃ (បែបកំប្លែងៗ) ព្រមទាំងក្បាច់គុនដោះស្រាយបញ្ហា ។

គួរបញ្ជាក់ថា នៅក្នុងភាពយន្ត “Everything Everywhere All At Once” លោក Ke Huy Quan ឈ្នះពានជាតួសម្តែងរងប្រុសល្អបំផុត និងតារាសម្តែងស្រី កញ្ញា Stephanie Hsu ឈ្នះពានតួសម្តែងរងស្រីល្អជាងគេបំផុតនៅក្នុងកម្មវិធីប្រគល់ពានអូស្ការ កាលពីថ្ងៃចន្ទ ទី១៣ ខែមីនាថ្មីៗនេះ នៅទឹកដីសហរដ្ឋអាម៉េរិក ។ ខ្សែភាពយន្តពានអូស្ការខាងលើនេះ បានចូលរួមប្រជែងពានរង្វាន់អូស្ការឆ្នាំនេះក្នុងចំណោម ១១ពាន រួមមានពានរង្វាន់ Best Picture, ពានរង្វាន់ Best Editing , ពានរង្វាន់ Best Director និងពានរង្វាន់ Best Original Screenplay ជាដើម ៕