ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រុមហ៊ុនបច្ចេកវិទ្យាយក្ស Meta បានជំរុញឱ្យប្រទេសអូស្ត្រាលីនៅថ្ងៃចន្ទ ដើមសប្ដាហ៍នេះ ពិចារណាឡើងវិញនូវការហាមឃាត់កុមារអាយុក្រោម ១៦ឆ្នាំ ប្រើប្រាស់បណ្ដាញសង្គម ដំបូងគេលើពិភពលោក ខណៈរបាយការណ៍បានបង្ហាញថា មានគណនីជាង ៥៤៤,០០០ បានបិទ នៅក្រោមច្បាប់ថ្មីនេះ, នេះបើយោងតាម CNA។
ប្រទេសអូស្ត្រាលីបានទាមទារឱ្យវេទិកាធំៗ ដូចជា Meta, TikTok និង Youtube បញ្ឈប់អ្នកប្រើប្រាស់អនីតិជន ពីការកាន់កាប់គណនីចាប់តាំងពីច្បាប់នេះចូលជាធរមាននៅថ្ងៃទី១០ ខែធ្នូ ឆ្នាំមុន។
ក្រុមហ៊ុននានា ប្រឈមមុខនឹងការពិន័យជាប្រាក់ចំនួន ៤៩,៥ លានដុល្លារអូស្ត្រាលី (៣៣ លានដុល្លារអាម៉េរិក) ប្រសិនបើពួកគេ មិនបានចាត់វិធានការសមហេតុផល ដើម្បីអនុវត្តតាមការទាមទារនេះ។
ក្រុមហ៊ុន Meta របស់មហាសេដ្ឋី Mark Zurkerberg បាននិយាយថា ខ្លួនបានលុបគណនីអនីតិជនចំនួន ៣៣១,០០០ ចេញពី Instagram, ១៧៣,០០០ ពី Facebook និង ៤០,០០០ ពី Threads ក្នុងសប្តាហ៍ដល់ថ្ងៃទី១១ ខែធ្នូ។ លើសពីនេះ ក្រុមហ៊ុនបានបន្ថែមថា ខ្លួនប្ដេជ្ញាអនុវត្តតាមច្បាប់។
ក្រុមហ៊ុននេះប្រកាសនៅក្នុងសេចក្ដីថ្លែងការណ៍មួយថា « យើងសូមអំពាវនាវដល់រដ្ឋាភិបាលអូស្ត្រាលីឱ្យចូលរួមជាមួយឧស្សាហកម្ម ដោយស្ថាបនា ដើម្បីស្វែងរកមធ្យោបាយកាន់តែប្រសើរឡើង ដូចជា ការលើកទឹកចិត្តដល់ឧស្សាហកម្មទាំងអស់ឱ្យលើកកម្ពស់ស្ដង់ដា ក្នុងការផ្ដល់នូវបទពិសោធន៍អនឡាញ ដែលមានសុវត្ថិភាព រក្សាឯកជនភាព និងសមស្របតាមអាយុ ជំនួសឱ្យការហាមឃាត់ទាំងស្រុង។»
ក្រុមហ៊ុន Meta បានបន្តអំពាវនាវឱ្យកម្មវិធី App Store ត្រូវផ្ទៀងផ្ទាត់អាយុរបស់អ្នកប្រើប្រាស់ និងទទួលបានការយល់ព្រមពីឪពុកម្ដាយ មុនពេលអ្នកមានអាយុ ក្រោម ១៦ឆ្នាំ អាចទាញយកកម្មវិធីនេះបាន។
ក្រុមហ៊ុនបាននិយាយថា នេះជាមធ្យោបាយតែមួយគត់ ជៀសវាងការប្រណាំងប្រជែងគ្នា ដើម្បីបញ្ឈប់ក្មេងជំទង់ពីការទៅប្រើកម្មវិធីថ្មីៗ ដែលមិនមានការហាមឃាត់។
Meta បានបន្ថែមថា ឪពុកម្ដាយ និងអ្នកជំនាញមានការព្រួយបារម្ភអំពីការហាមឃាត់ ក្រុមមនុស្សវ័យក្មេង ពីសហគមន៍អនឡាញ និងការជំរុញឱ្យយុវជនមួយចំនួនប្រើប្រាស់កម្មវិធី ដែលមិនសូវមានការគ្រប់គ្រង។
ចាប់តាំងពីមានការហាមឃាត់មក ក្រុមហ៊ុន ដែលមូលដ្ឋាននៅរដ្ឋកាលីហ្វ័រញ៉ានេះ បាននិយាយថា ខ្លួនបានជួយបង្កើត OpenAge Initiative ជាក្រុមមិនស្វែងរកប្រាក់ចំណេញមួយ ដែលបានដាក់ឱ្យដំណើរការឧបករណ៍ផ្ទៀងផ្ទាត់អាយុមួយឈ្មោះថា Agekeys ដើម្បីប្រើប្រាស់ជាមួយវេទិកា ដែលចូលរួម៕
