ប្រទេសជប៉ុនបានទាក់ទាញនិស្សិតបរទេសរាប់ពាន់នាក់ ឱ្យទៅសិក្សានៅទីនោះ ពីព្រោះប្រទេសជប៉ុនមិនមែនផ្តល់តែការអប់រំប៉ុណ្ណោះទេ ប៉ុន្តែប្រទេសមួយនេះមានលក្ខណៈពិសេសមួយនៅត្រង់ថា កំឡុងជាមួយគ្នានឹងសិក្សានិស្សិតមានឱកាសទទួលបានបទពិសោធន៍ នៃការគិត ជំនាញ និងការសម្រួចអនាគតដែលសិស្សប្រាថ្នាផងដែរ។

នៅជប៉ុនមានសាកលវិទ្យាល័យរាប់រយ បានបើកដំណើរការ ត្បិតមើលទៅមានជម្រើសច្រើន! តែជម្រើសដ៏ច្រើននេះ! អាចជាហេតុធ្វើឱ្យសិស្សមានភាពមន្ទិល និងពិបាកក្នុងការសម្រេចចិត្តថា តើសាលាមួយណាដែលគួរតែជ្រើសរើស? ហើយការសម្រេចចិត្តនេះ កាន់តែហ្មត់ចត់ចំពោះនិស្សិតបរទេស ព្រោះនិស្សិតអន្តរជាតិ មិនត្រឹមតែត្រូវការសាលាដែលមានគុណភាពខ្ពស់ មានកម្មវិធីសិក្សាល្អ ឬមានកន្លែងស្រាវជ្រាវនិងអនុវត្តន៍ប៉ុណ្ណោះទេ ប៉ុន្តែក៏ត្រូវការបរិយាកាសមួយដែលផ្តល់ការគាំទ្រគ្នាទៅវិញទៅមកក្នុងនាមជានិស្សិតបរទេស។

តាមរយៈគេហទំព័រ Scholarship Region បានបង្ហាញពីសាកលវិទ្យាល័យកំពូលៗ ក្នុងប្រទេសជប៉ុនមួយចំនួន ដែល​មានលក្ខណៈពិសេសរៀងៗខ្លួនសម្រាប់និស្សិតអន្តរជាតិយកទៅពិចារណា, ប្រៀបធៀប ដែលជាការ​រួចចំណែកមួយជួយក្នុងការសម្រេចចិត្តជ្រើសរើសសាលាឱ្យស្របតាមគោលដៅផ្ទាល់ខ្លួន។

តស់! មកដឹងអំពីសកលលវិទ្យាល័យលំដាប់ៗនៅជប៉ុន ក្នុងឆ្នាំ២០២៥នេះ ៖

University of Tokyo ៖ សកលវិទ្យាល័យតូក្យូ មានភាពលេចធ្លោរទៅលើការសិក្សាស្រាវជ្រាវ ហើយក៏បានជាប់ ចំណាត់ថ្នាក់ក្នុងចំណោមសកលវិទ្យាល័យកំពូលៗទូទាំងពិភពលោក ចំពោះកម្មវិធីសិក្សាពាក់ព័ន្ធនឹងវិទ្យាសាស្រ្ត មនុស្សសាស្រ្ត និងវិស្វកម្ម។ ជាងនេះទៅទៀត ក៏មានសាស្រ្តាចារ្យលំដាប់ពិភពលោក មានគម្រោងសិក្សាស្រាវជ្រាវបែបសកល ដែលផ្តល់ឱកាសក្នុងការពង្រីកខ្លួនក្នុងឆាកអន្តរជាតិ។

Kyoto University ៖ សាលាមួយនេះ មានឯកទេសលើមុខវិជ្ជា ដូចជា រូបវិទ្យា គីមីវិទ្យា និងការសិក្សាអំពីបរិស្ថាន និងការសិក្សាបែបស៊ីជម្រៅ។ ក្រៅពីការសិក្សា សាកលវិទ្យាល័យក្យូតូ ក៏បានបណ្តុះនូវភាពឯករាជ្យទៅកាន់សិស្ស ទាំងការគិត និងការសិក្សាស្រាវជ្រាវ និងការអនុវត្តលើគម្រោងសិក្សាស្រាវជ្រាវដោយផ្ទាល់ផងដែរ។

Tohoku University​ ៖ ជាសាកលវិទ្យាលដំបូងគេបំផុត ដែលបានលើកកម្ពស់ភាពចម្រុះក្នុងការអប់រំ តាមរយៈការទទួលស្វាគមន៍និស្សិតអន្តរជាតិ និងស្រ្តី ឱ្យទទួលបានឱកាសមកបន្តការសិក្សានៅទីនេះ។ ហើយឯកទេសនៃសាកលវិទ្យាល័យ Tohoku គឺពាក់ព័ន្ធនឹងវិទ្យាសាស្រ្ត ដែលមានដូចជា វិស្វកម្ម និងបច្ចេកវិទ្យា។ ចំណែកឯបរិយាកាសសិក្សាវិញ ផ្តល់ភាពងាយស្រួលសម្រាប់និស្សិតបរទេស ដោយក្នុងសាលាប្រើប្រាស់ភាសាអង់គ្លេសដើម្បីទំនាក់ទំនង, មានសម្ភារៈសិក្សា, និងការផ្តល់អាហាររូបករណ៍ពីសាលាផ្ទាល់តែម្តង។ ហើយលក្ខណៈពិសេស នៃសាលា Tohoku អំឡុងពេលសិក្សា មិនត្រឹមតែមានសម្ភារៈបែបវិទ្យាសាស្រ្តទេ គឺនៅមានមនុស្សយន្ត និងការស្រាវជ្រាវបែបជីវសាស្ត្រ។

Tokyo Institute of Technology (Tokyo Tech) ៖ វិទ្យាស្ថាន Tokyo Tech ជាសាលាវិទ្យាសាស្ត្រអន្តរជាតិសំខាន់បំផុតមួយនៅក្នុងប្រទេសជប៉ុន ដែលមានសមត្ថភាពបណ្តុះបណ្តាលនិស្សិតដែលចង់ក្លាយជាវិស្វករ និងអ្នកវិទ្យាសាស្រ្ត។ វិទ្យាស្ថាន Tokyo Tech បានទាក់ទាញនិស្សិតបរទេសចំនួន ១៣ ភាគរយ បើប្រៀបធៀបទៅនឹងនិស្សិតដែលមករៀនស្រាប់នៅក្នុងស្រុក។ ហើយបើផ្អែកទៅតាមប្រវត្ថិសាស្រ្តជាក់ស្តែង នៃវិទ្យាស្ថាននេះ មានសិស្សដែលបញ្ចប់ការសិក្សាកន្លងមក ពួកគេបានចូលធ្វើការនៅក្រុមហ៊ុនលំដាប់ពិភពលោក និងមន្ទីរពិសោធន៍ស្រាវជ្រាវផងដែរ។

នៅមានសកលវិទ្យាល័យលំដាប់ៗចំនួនប្រាំពីរ បន្ថែមទៀតដូចជា Osaka University, Kyushu University, Nagoya University , Hokkaido University , Keio University , Ritsumeikan Asia Pacific University (APU) ដោយសាកលវិទ្យាល័យទាំងនេះផ្តល់កម្មវិធីសិក្សាទាំងថ្នាក់វិទ្យាសាស្រ្ត មនុស្សសាស្រ្ត ភាសាវិទ្យា និងមុខជំនាញដទៃៗទៀត៕