ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប៉ារីស ៖ សភាបារាំងបានសម្តេចអនុម័តច្បាប់ហាមឃាត់កុមារ និងយុវជនដែលមានអាយុក្រោម ១៥ឆ្នាំ មិនឱ្យប្រើប្រាស់បណ្តាញសង្គម។ ការអនុម័តនេះធ្វើឱ្យបារាំងក្លាយជាប្រទេសដំបូងគេនៅក្នុងសហភាពអឺរ៉ុប (EU) ដែលអនុវត្តវិធានការបែបនេះ ដើម្បីការពារកុមារពីហានិភ័យលើប្រព័ន្ធអនឡាញ។
យោងតាមសារព័ត៌មាន BBC ច្បាប់ថ្មីតម្រូវឱ្យអ្នកប្រើប្រាស់បណ្តាញសង្គមទាំងអស់នៅប្រទេសបារាំង ត្រូវផ្ទៀងផ្ទាត់អាយុ មុនពេលបង្កើត ឬបន្តប្រើប្រាស់គណនី។ អ្នកដែលមានអាយុក្រោម ១៥ឆ្នាំ នឹងមិនអាចបង្កើតគណនីថ្មីបានឡើយ ខណៈគណនីដែលមានស្រាប់ក៏នឹងត្រូវឆ្លងកាត់ការផ្ទៀងផ្ទាត់អាយុផងដែរ។
ប្រធានាធិបតីបារាំង លោក Emmanuel Macron បានស្វាគមន៍ការអនុម័តច្បាប់នេះ ដោយចាត់ទុកថា វាជាជំហានដ៏សំខាន់ក្នុងការការពារសុខភាពផ្លូវចិត្ត និងសុវត្ថិភាពរបស់កុមារនៅលើបណ្តាញសង្គម។
ការអនុវត្តច្បាប់នឹងធ្វើឡើងជាពីរដំណាក់កាល។ ចាប់ពីថ្ងៃទី១ ខែកញ្ញា ឆ្នាំ២០២៦ តទៅ កុមារអាយុក្រោម ១៥ឆ្នាំ នឹងមិនអាចបង្កើតគណនីថ្មីបានទៀតទេ ហើយវេទិកាបណ្តាញសង្គមទាំងអស់ត្រូវដាក់ឱ្យប្រើប្រាស់ប្រព័ន្ធផ្ទៀងផ្ទាត់អាយុលើអ្នកប្រើប្រាស់ថ្មី។
បន្ទាប់មក ចាប់ពីថ្ងៃទី១ ខែមករា ឆ្នាំ២០២៧ វិធានការនេះនឹងពង្រីកទៅលើគណនីដែលមានស្រាប់ទាំងអស់ ដោយតម្រូវឱ្យអ្នកប្រើប្រាស់គ្រប់រូបបញ្ជាក់ថា មានអាយុលើសពី ១៥ឆ្នាំ ទើបអាចបន្តប្រើប្រាស់បណ្តាញសង្គមបាន។
វេទិកាបណ្តាញសង្គមទាំងអស់នឹងត្រូវប្រើប្រាស់ប្រព័ន្ធផ្ទៀងផ្ទាត់អាយុ ដែលទទួលបានការអនុម័តពីអាជ្ញាធរគ្រប់គ្រងការការពារទិន្នន័យ និងឯកជនភាពរបស់បារាំង។
ទោះជាយ៉ាងណា ច្បាប់នេះបានបង្កឱ្យមានការព្រួយបារម្ភពីអ្នកជំនាញ និងក្រុមការពារសិទ្ធិឌីជីថលមួយចំនួន ពាក់ព័ន្ធនឹងការការពារទិន្នន័យឯកជន ប្រសិទ្ធភាពនៃប្រព័ន្ធផ្ទៀងផ្ទាត់អាយុ និងលទ្ធភាពដែលយុវវ័យអាចរកវិធីគេចផុតពីការត្រួតពិនិត្យ។
រដ្ឋមន្ត្រីទទួលបន្ទុកកិច្ចការឌីជីថលរបស់បារាំង លោកស្រី Anne Le Hénanff បានការពារការអនុវត្តច្បាប់នេះ ដោយបញ្ជាក់ថា បច្ចេកវិទ្យាសម្រាប់ផ្ទៀងផ្ទាត់អាយុមានរួចជាស្រេច និងអាចអនុវត្តបានប្រកបដោយប្រសិទ្ធភាព។
សូមជម្រាបថា ក្រៅពីបារាំង ប្រទេសអូស្ត្រាលីក៏បានអនុម័តច្បាប់រឹតបន្តឹងការប្រើប្រាស់បណ្តាញសង្គមសម្រាប់កុមារផងដែរ ខណៈប្រទេសជាច្រើនផ្សេងទៀត រួមទាំងចក្រភពអង់គ្លេស និងសហភាពអឺរ៉ុប កំពុងពិចារណាដាក់ចេញវិធានការស្រដៀងគ្នា ដើម្បីកាត់បន្ថយផលប៉ះពាល់នៃបណ្តាញសង្គមលើកុមារ និងយុវជន៕
