ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បញ្ញាសិប្បនិម្មិត (AI) មិនគ្រាន់តែជាបច្ចេកវិទ្យា ដែលឈានមុខគេក្នុងពេលបច្ចុប្បន្នប៉ុណ្ណោះទេ ប៉ុន្តែបច្ចេកវិទ្យានេះ ក៏កំពុងតែជំរុញឱ្យមានការផ្លាស់ប្ដូរ របៀបរស់នៅ ធ្វើការ និងសិក្សារៀនសូត្រផងដែរ។
របាយការណ៍ស្ដីពីអនាគតការងារឆ្នាំ២០២៥ របស់វេទិកាសេដ្ឋកិច្ចពិភពលោក បានគូសបញ្ជាក់ថា AI ត្រូវបានគេរំពឹងថា នឹងមានឥទ្ធិពលទៅលើស្ទើរគ្រប់ឧស្សាហកម្មទាំងអស់ ដោយនាំឱ្យមានការផ្លាស់ប្ដូរជំនាញ ដែលជាតម្រូវការនៅទូទាំងទីផ្សារការងារសកល។
ឥទ្ធិពលដ៏សំខាន់របស់ AI ស្ថិតនៅលើរបៀបប្រើប្រាស់ ដំណើរការ និងការស្នើសុំព័ត៌មានប្រកបដោយប្រសិទ្ធភាព។ ជុំវិញបញ្ហានេះ វេទិកាសេដ្ឋកិច្ចពិភពលោក បានបញ្ជាក់ថា ការកំណត់ឡើងវិញអំពីមូលដ្ឋាននៃការអប់រំ និងវិធីដែលយើងទទួលបានចំណេះដឹង អំពី AI ពិតជាសំខាន់ណាស់។
តាមរយៈទស្សនៈនេះ អក្ខរកម្ម AI មិនមែនគ្រាន់តែ ល្អសម្រាប់អ្នកជំនាញផ្នែកព័ត៌មានវិទ្យាប៉ុណ្ណោះទេ ប៉ុន្តែវាក៏មានសារៈសំខាន់សម្រាប់ការអភិវឌ្ឍបញ្ញារបស់មនុស្ស និងមានឥទ្ធិពលយ៉ាងខ្លាំង លើវិស័យអប់រំ។
ដោយសារតែឧបករណ៍ AI ជំនាន់ថ្មី បានបញ្ចូលនៅគ្រប់ទីកន្លែងក្នុងសាលារៀន កន្លែងធ្វើការ និងជីវិតឌីជីថលប្រចាំថ្ងៃ វាជារឿងសំខាន់ ក្នុងការបង្កើតទម្លាប់ប្រើប្រាស់ប្រកបដោយការទទួលខុសត្រូវតាំងពីក្មេង សម្រាប់កុមារសម័យទំនើប។ អ្នកសិក្សាមិនត្រឹមតែប្រើ AI ប៉ុណ្ណោះទេ ពួកគេក៏កំពុងធ្វើការពិសោធន៍ជាមួយវា, ជាញឹកញាប់ពួកគេប្រើដោយគ្មានការណែនាំជាផ្លូវការ អំពីដែនកំណត់ និងហានិភ័យរបស់បច្ចេកវិទ្យានេះឡើយ។
ជាក់ស្ដែង បើតាមការស្រាវជ្រាវបានបង្ហាញថា បច្ចុប្បន្ន GenZ ជាងពាក់កណ្ដាល គឺទទួលពិន្ទុមិនល្អនោះទេ លើការវាយតម្លៃអំពីកម្រិតនៃការយល់ដឹងអំពី AI និងការប្រើប្រាស់ AI ប្រកបដោយប្រសិទ្ធភាព និងទំនួលខុសត្រូវខ្ពស់។
វេទិកាអនាគតទីផ្សារការងារឆ្នាំ២០២៥ បង្ហាញថា គម្រោងជិត ៤០ភាគរយ នៃជំនាញដែលជាតម្រូវការសម្រាប់កម្លាំងពលកម្មសកលនឹងផ្លាស់ប្ដូរក្នុងរយៈពេល ៥ឆ្នាំខាងមុខ។
ហេតុនេះ ដើម្បីរៀបចំធនធានមនុស្សសម្រាប់ថ្ងៃអនាគតឱ្យបានល្អ ប្រព័ន្ធអប់រំ ត្រូវបង្រៀនសិស្សឱ្យយល់ពីអ្វីដែលលើសពីកម្មវិធីសិក្សាបែបប្រពៃណី តាមរយៈការរួមបញ្ចូលជំនាញ AI ជាក់លាក់ ដូចជា algorithmic thinking, វិស្វកម្ម prompt និងការយល់ដឹងពីភាពលំអៀងនៅក្នុងប្រព័ន្ធទិន្នន័យ។
ប៉ុន្តែលើសពីចំណេះដឹងផ្នែកបច្ចេកទេស អ្នកសិក្សានឹងត្រូវការជំនាញរបស់មនុស្ស ដែល AI មិនអាចជំនួសបាន ដូចជាការយល់ចិត្ត ការវិនិច្ឆ័យ ហេតុផលសីលធម៌ និងការសហការផងដែរ។
នៅពេលដែលល្បឿននៃការច្នៃប្រឌិត និងការបង្កើតថ្មី ក្នុងវិស័យ AI កើនឡើង កាន់តែខ្លាំងឡើង ទំនួសខុសត្រូវក្នុងការបណ្ដុះបណ្ដាល និងរៀបចំមនុស្សវ័យក្មេង មិនមែនអាស្រ័យលើតែក្រុមហ៊ុនបច្ចេកវិទ្យា ឬអ្នកបង្កើតគោលនយោបាយនោះទេ ប៉ុន្តែវាស្ថិតនៅលើយើងទាំងអស់គ្នា៕
