សម្រាប់យុវជន​ដែល​មាន​បំណងចង់ចូល​រួម​កម្មវិធី​នាវាយុវជន​អាស៊ីអាគ្នេយ៍ និង​ជប៉ុន ពេលនេះឱកាស​បាន​មក​ដល់​ហើយ ដោយក្រសួងអប់រំ យុវជន និងកីឡា កំពុង​តែប្រកាសជ្រើសរើសយុវជនកម្ពុជា ចំនួន១៦រូប ដើម្បីជាយុវទូតតំណាងកម្ពុជា ចូលរួមក្នុងកម្មវិធីនាវាយុវជនអាស៊ីអាគ្នេយ៍ និងជប៉ុន លើកទី៤៩ (SSEAYP) ឆ្នាំ២០២៦។

បើតាម​សេចក្តីប្រកាស​របស់ក្រសួងអប់រំ The Ship for Southeast Asian and Japanese Youth Program-SSEAYP នឹងធ្វើឡើងរយៈពេល៣២ថ្ងៃ ដោយចាប់ផ្ដើមពីថ្ងៃទី១៥ ខែមករា ដល់ថ្ងៃទី១៧ ខែកុម្ភៈ ឆ្នាំ២០២៦ ដោយ​មានទិសដៅចូលចតនៅប្រទេសជប៉ុន សិង្ហបុរី និងប្រទេសថៃ។

យុវជនដែលតំណាងកម្ពុជានឹងពិភាក្សាក្នុងប្រធានបទជាច្រើនជាមួយនឹងយុវជនតំណាងមកពីប្រទេសដទៃដូចជា ការអប់រំប្រកបដោយគុណភាព, កំណើនសេដ្ឋកិច្ច និងទេសចរណ៍ដែលមានចីរភាព និងមានទំនួលខុសត្រូវ, បរិស្ថានសកល និងការប្រែប្រួលអាកាសធាតុ, ការកាត់បន្ថយហានិភ័យ គ្រោះមហន្តរាយ និងការស្ដារឡើងវិញ, សុខុមាលភាពសង្គម និងបរិយាប័ន្ន, និង សង្គមឌីជីថល និងបញ្ញាសិប្បនិម្មិត។

លក្ខខណ្ឌនៃការដាក់ពាក្យ ៖ បេក្ខជន បេក្ខនារី ត្រូវមានអាយុចាប់ពី១៨ឆ្នាំ ដល់៣០ឆ្នាំ មានចំណេះដឹងភាសាអង់គ្លេសល្អ មានចំណាប់អារម្មណ៍ និងចំណេះដឹងជ្រៅជ្រះទាក់ទងនឹងអាស៊ាន និងជប៉ុន និងមានសុខភាពល្អទាំងផ្លូវកាយ និងផ្លូវចិត្ត។

បេក្ខជន បេក្ខនារី ដែលមានចំណាប់អារម្មណ៍ អាចចុះឈ្មោះតាមរយៈ https://forms.gle/Qkc9TC84mTQkxtik7 ចាប់ពីថ្ងៃនេះ រហូត​ដល់ថ្ងៃទី២៦ ខែមិថុនា ឆ្នាំ២០២៥ វេលាម៉ោង ៥រសៀល។

សម្រាប់ព័ត៌មានបន្ថែមអាចទំនាក់ទំនងទៅកាន់ tuy.chansopanha@moeys.gov.kh ឬទៅកាន់ការិយាល័យក្រុមការងារក្រសួងអប់រំ យុវជន និងកីឡា ដែលមានអាស័យដ្ឋាន នៅជាន់ទី៥ អគាររដ្ឋបាលថ្មី នៃក្រសួងអប់រំ។

សូមជំរាបជូនថា កម្មវិធី​នាវាយុវជនអាស៊ីអាគ្នេយ៍ និងជប៉ុន (SSEAYP) ត្រូវបានបង្កើតឡើងតាំងពីឆ្នាំ១៩៧៤ ដោយរដ្ឋាភិបាលជប៉ុន និងរដ្ឋាភិបាលនៃប្រទេសសមាជិកអាស៊ាន ក្នុងគោលបំណងពង្រឹងសមត្ថភាព សាមគ្គីភាព និងការយោគយល់គ្នារវាងយុវជនអាស៊ាន និងជប៉ុន និងឱកាសក្នុងការផ្លាស់ប្ដូរបទពិសោធន៍ និងចំណេះដឹង។ សម្រាប់ប្រទេសកម្ពុជាបានចូលរួមជាមួយកម្មវិធីនាវាយុវជននេះជាផ្លូវការក្នុងឆ្នាំ២០០០ ហើយគិតត្រឹមឆ្នាំ២០២៤ មានយុវជនកម្ពុជាប្រមាណ ៦៦៤រូប បានចូលរួម និងទទួលបានបទពិសោធន៍ពីកម្មវិធីនេះ៕