ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសិក្សារបស់ក្រុមហ៊ុន PwC បានបង្ហាញថា បញ្ញាសិប្បនិម្មិត (AI) អាចជំរុញការបង្កើតតម្លៃសម្រាប់ស្ថាប័ន បុគ្គលិក និងសេដ្ឋកិច្ច ។ បច្ចុប្បន្ន បច្ចេកវិទ្យានេះ កំពុងជួយបុគ្គលិក និងស្ថាប័ននានា ក្នុងការបង្កើតឱកាសថ្មីៗ និងសម្រេចកិច្ចការឱ្យបានច្រើនជាងមុន។ លើសពីនេះ ការវិវឌ្ឍនេះ មិនធ្វើឱ្យតម្រូវការការងារថយចុះនោះទេ ប៉ុន្តែមនុស្សប្រហែលជាមានតម្រូវការកាន់តែខ្លាំង ក្នុងយុគសម័យបញ្ញាសិប្បនិម្មិត (AI)។
ការស្ទង់មតិនាយកប្រតិបត្តិប្រចាំឆ្នាំចុងក្រោយបំផុតរបស់ Pwc បង្ហាញថា CEO ភាគច្រើន (៧០ភាគរយ) រំពឹងថា បញ្ញាសិប្បនិម្មិត (AI) នឹងផ្លាស់ប្ដូររបៀប ដែលក្រុមហ៊ុនរបស់គេបង្កើតតម្លៃ។ ទន្ទឹមនឹងនេះ ៨២ភាគរយ និយាយថា បញ្ញាសិប្បនិម្មិត (AI) បានកើនឡើង ឬមិនបានធ្វើឱ្យផ្លាស់ប្ដូរចំនួនបុគ្គលិក ក្នុងរយៈពេលប៉ុន្មានឆ្នាំចុងក្រោយនេះទេ។
ផ្ទុយទៅវិញ បញ្ញាសិប្បនិម្មិត (AI) កំពុងអភិវឌ្ឍសមត្ថភាពក្រុមហ៊ុន ក្នុងការអនុវត្តការងារប្រកបដោយភាពឆ្លាតវៃ និងទទួលបានព័ត៌មានច្រើន លឿនរហ័ស ព្រមទាំងជួយឱ្យស្ថាប័ន អាចកសាងអាជីវកម្មក្នុងទម្រង់ថ្មី ជាមួយនឹងគុណតម្លៃជាច្រើន។ បច្ចេកវិទ្យាបញ្ញាសិប្បនិម្មិត (AI) គឺលើសពី Chatbot វាអាចធ្វើបដិវត្តន៍សកម្មភាពណាមួយ ដែលទាក់ទងនឹងគំនិត ឬការសម្រេចចិត្ត, ជួយឱ្យអាជីវកម្មអាចផ្ដល់នូវផលិតផល និងសេវាកម្មដែលមានគុណតម្លៃខ្ពស់ ហើយមនុស្សមិនអាចធ្វើបាន នៅដំណាក់កាលគ្មានបញ្ញសិប្បនិម្មិត (AI)។
វិនិយោគិនក៏បានឃើញពីសក្តានុពលរបស់ បញ្ញាសិប្បនិម្មិត (AI)។ វិនិយោគិន ២ ភាគ ៣រំពឹងថា AI នឹងជំរុញផលិតភាពការងារបុគ្គលិករបស់ខ្លួន ក្នុងរយៈពេល ១២ខែបន្ទាប់ពីពួកគេវិនិយោគទៅលើបច្ចេកវិទ្យានេះ។
ងាកទៅមើលទស្សនៈរបស់និយោជិត បុគ្គលិក ៤នាក់ ក្នុងចំណោម៥នាក់ ដែលប្រើ បញ្ញាសិប្បនិម្មិត (AI) ប្រចាំថ្ងៃរំពឹងថា បច្ចេកវិទ្យានេះ នឹងជួយពួកគេគ្រប់គ្រងពេលវេលានៅកន្លែងធ្វើការបានល្អជាងមុន។
ការស្រាវជ្រាវបានបង្ហាញថា បុគ្គលិកកាន់តែច្រើនរំពឹងថា AI នឹងមានផលវិជ្ជមាន ច្រើនជាងផលអវិជ្ជមានលើតួនាទីរបស់ពួកគេ ព្រោះបច្ចេកវិទ្យានេះ ជួយពួកគេបានច្រើន រាប់ចាប់តាំងពីការរៀនជំនាញថ្មី រហូតដល់ការគិតអំពីការងារច្នៃប្រឌិត។ ពាក់កណ្ដាលនៃបុគ្គលិក ដែលប្រើបច្ចេកវិទ្យា AI រំពឹងថា បច្ចេកវិទ្យានេះ នឹងជួយពួកគេឱ្យទទួលបានប្រាក់ខែខ្ពស់ជាងមុន។ បុគ្គលិក ដែលបានចូលរួមស្ទង់មតិបង្ហាញការយល់ឃើញថា AI បានជួយលើកកម្ពស់តម្លៃរបស់ពួកគេ ព្រោះផលិតភាពការងារល្អប្រសើរ និងមានគុណភាព។
យ៉ាងណាក៏ដោយ ដើម្បីពង្រឹងសមត្ថភាពប្រើប្រាស់បច្ចេកវិទ្យានេះ មនុស្សត្រូវមានទម្លាប់ចង់ចេះ ចង់ដឹង ចូលចិត្តពិសោធន៍អ្វីដែលថ្មី មានចំណូលចិត្តលើការបង្កើតថ្មី បើកចិត្តទទួលស្គាល់ថា AI អាចធ្វើឱ្យការងាររីករាយជាងមុន និងអាចជួយឱ្យពួកគេឆ្ពោះទៅរកគោលដៅ ដែលខ្លួនចង់សម្រេចបានឆាប់រហ័ស៕
