ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សួនកុមារ រួមចំណែកយ៉ាងសំខាន់ ក្នុងការពង្រឹងបញ្ញា ស្មារតី ភាពឈ្លាសវៃផ្នែកអារម្មណ៍ កាយសម្បទា និងជំរុញភាពរីករាយរបស់កុមារ។ តាមរយៈការលេងក្នុងសួនកម្សាន្ត ដែលមានបរិយាកាសល្អ អនាម័យ និងមានសុវត្ថិភាព កុមារនឹងទទួលបានបានឱកាសជាច្រើន ក្នុងការអភិវឌ្ឍខួរក្បាល ភាពក្លាហាន អត្តចរិត និងជំនាញសង្គមសំខាន់ៗ បន្ថែមពីលើការអប់រំក្នុងសាលារៀន។
លោក សុខ រីន ប្រធានគ្រប់គ្រងសួនកម្សាន្តកុមារ ឌូហ្ស៊ី (Doozii) មានប្រសាសន៍ថា ការសិក្សាដែលផ្សារភ្ជាប់នឹងការកម្សាន្ត ផ្ដល់នូវផលវិជ្ជមានច្រើនសម្រាប់ការលូតលាស់ និងបណ្ដុះស្មារតី ផ្នែកគំនិត ភាពក្លាហាន និងលំហាត់ប្រាណដល់កុមារ។ លោកបន្តថា លើសពីភាពរីករាយ ការកម្សាន្តក្នុងសួរកម្សាន្ត ដែលមានបរិយាកាសអំណោយផល និងមានឧបករណ៍ជំនួយគ្រប់គ្រាន់ នឹងជួយឱ្យកុមារ មានភាពឆ្លាតវៃ រឹងមាំ និងរហ័សរហួន។
ដោយមើលឃើញពីសារៈសំខាន់នេះ មជ្ឈមណ្ឌលកម្សាន្ត ឌូហ្ស៊ី ដែលជាសួនកម្សាន្តដ៏ធំមួយក្នុងប្រទេសកម្ពុជា បានចុះអនុស្សរណៈនៃការយោគយល់ជាមួយនឹងសាលាអន្តរជាតិចំនួន ៦ ដើម្បីជំរុញ និងបើកឱកាសបន្ថែមសម្រាប់កុមារ ឱ្យចូលលេងក្នុងសួរកម្សាន្តទំនើប បរិយាកាសល្អ និងមានលក្ខណៈសម្បូរបែប។
លោក សុខ រីន មានប្រសាសន៍បន្ថែមថា ការចុះអនុស្សរណៈនេះ ជាការផ្សាភ្ជាប់រវាង មជ្ឈមណ្ឌលកម្សាន្ត និងសាលារៀន ហើយគោលបំណងចម្បងនៃការចុះអនុស្សរណៈ គឺរួមចំណែកអភិវឌ្ឍ និងបណ្ដុះភាពរឹងមាំ សម្រាប់កុមារ ដែលជាទំពាំងស្នងឬស្សីរបស់កម្ពុជានាថ្ងៃអនាគត។
លោកស្រី ពៅ កន្និដ្ឋា នាយិការង និងជាប្រធានការិយាល័យ សាលាអន្តរជាតិអាស៊ាន មានប្រសាសន៍ថា អ្នកស្រីពិតជារំភើប ដែលសាលារៀនអន្តរជាតិ អាស៊ាន បានចុះអនុស្សរណៈជាមួយសួនកម្សាន្ត ឌូហ្ស៊ី។ លោកស្រីរំភើប ព្រោះនេះជាការនាំយកសិស្សានុសិស្សឱ្យមានឱកាស ទទួលបានការកម្សាន្តបែបថ្មី ខណៈសម្រាប់កុមារក្នុងសម័យឌីជីថល៤.០នេះ ដើម្បីជំរុញការលូតលាស់កុមារឱ្យបានឆាប់រហ័ស ការសិក្សា ត្រូវតែភ្ជាប់ជាមួយនឹងការកម្សាន្ត។
គួរជម្រាបជូនថា សួនកម្សាន្តឌូហ្ស៊ី ជាមជ្ឈមណ្ឌលកម្សាន្តដ៏ធំ និងទំនើបបំផុតមួយក្នុងប្រទេសកម្ពុជា ដែលមានទីធ្លាធំទូលាយ ឧបករណ៍បរិក្ខាទំនើប និងសម្ភារៈសម្រាប់កុមារសម្បូរបែប ដែលអាចជួយអភិវឌ្ឍសមត្ថភាព និងការលូតលាស់របស់កុមារបានឆាប់រហ័ស និងមានសុវត្ថិភាព។ មជ្ឈមណ្ឌលនេះសាខាចំនួន២ទីតាំង ទីតាំងទី១ គឺ ស៊ុបភ័រឌូហ្ស៊ី (Super Doozii) ស្ថិតនៅផ្សារទំនើបជីបម៉ង ២៧១មេហ្គាម៉ល និងទីតាំងទី២ស្ថិតនៅផ្សារទំនើបជីបម៉ុងសែនសុខ។
អនុស្សរណៈនៃការយោគយល់នេះ ធ្វើឡើងកាលពីថ្ងៃទី៤ ធ្នូ នៅផ្សារទំនើបជីបម៉ុងសែនសុខ ដោយមានសាលា ៦ចូលរួម ដូចជា សាលាអន្តរជាតិគ្រីនហ្វៀល, សាលាអន្តរជាតិ អាស៊ាន, មជ្ឍមណ្ឌលភាសាបរទេស AII, សាលាអន្តរជាតិ ផ្លេនីត, សាលាអាល់ប៊ីតអន្តរជាតិ និងសាលាអន្តរជាតិប៉េកាំង៕
