ភាពតានតឹង និងអារម្មណ៍ភ័យខ្លាច ជាចំណុចចាប់ផ្ដើមនៃជំងឺថប់បារម្ភដែលកើតឡើងចំពោះកុមារ ខណៈពួកគេស្ថិតក្នុងដំណាក់កាលវិវត្តន៍ និងលូតលាស់។ ករណីនេះ គឺជារឿងធម្មតាសម្រាប់កុមារ ប៉ុន្តែប្រសិនបើអាការនេះកើតឡើងជាប្រចាំ មិនមែនជារឿងល្អនោះទេ។ ជំងឺថប់បារម្ភ អាចរំខានដល់ការសិក្សា ទំនាក់ទំនងក្នុងសង្គម និងទំនាក់ទំនងក្នុងគ្រួសារ។ យោងតាមមជ្ឈមណ្ឌលគ្រប់គ្រង និងការពារជំងឺ (CDC) បានបង្ហាញថា កុមារជាង៩ ភាគរយ កំពុងរស់នៅជាមួយជំងឺថប់បារម្ភ និងការបាក់ទឹកចិត្ត ហើយនេះ ជាចំនួនមួយច្រើនគួរឱ្យកត់សម្គាល់ ដែលតម្រូវឱ្យម្ដាយឪពុកត្រូវចូលរួមដោះស្រាយ។

យ៉ាងណាក៏ដោយ ខាងក្រោម​នេះ យើងនឹងលើកឡើងពីវិធីចំនួន៥ ដែលម្ដាយឪពុកអាចជួយកូនៗរបស់ខ្លួនការពារ និងចាកចេញបីវិបត្តិថប់បារម្ភ៖

១. ថែសុខភាពខ្លួនឯងឱ្យបានល្អ ៖ វេជ្ជបណ្ឌិត Deborah Vinall អ្នកជំនាញចិត្តសាស្ត្រ លើកឡើងថា ដើម្បីជួយកូនរបស់អ្នក គ្រ​​ប់គ្រងលើជំងឺថប់បារម្ភ ដំបូងអ្នកត្រូវថែរក្សាសុខភាពខ្លួន​ឯងឱ្យបានល្អ។ ប្រសិនបើអ្នកជាអាណាព្យាបាលកំពុងប្រឈមមុខនឹងបញ្ហាថប់បារម្ភដែរ អ្នកជំនាញណែនាំថា គួរស្វែងរកឬសគល់ ដែលនាំឱ្យមានវិបត្តិនេះ បន្ទាប់មកព្យាបាលខ្លួនឯងឱ្យបានលឿន។ អ្នកចិត្តសាស្ត្រ Vinall បានបញ្ជាក់ថា ការមានអាណាព្យាបាល ដែលយកចិត្តទុកដាក់ពីផ្លូវចិត្តកូន ចេះយល់អារម្មណ៍ និង​​ចិត្តទូលាយ គឺជាគន្លឹះយ៉ាងសំខាន់ ដែលអាចជួយកុមារជៀសផុតពីបញ្ហាថប់បារម្ភ។

២. បង្រៀនគេឱ្យដកដង្ហើមវែងៗ ៖ មធ្យោបាយល្អបំផុតមួយ ដែលអាចបញ្ឈប់បញ្ហាថប់បារម្ភ គឺការដកដង្ហើមវែងៗ។ វិធីនេះនឹងធ្វើឱ្យប្រព័ន្ធប្រសាទរបស់អ្នកស្ងប់ តាមបែបធម្មជាតិ។ ដូច្នេះ អ្នកអាចអនុវត្តបច្ចេកទេសដកដង្ហើមវែងៗជាមួយកូនរបស់អ្នក ខណៈពេលដែលអ្នកដឹងថាពួកគេមានបញ្ហាថប់បារម្ភ។ ប្រសិនបើចង់ឱ្យសកម្មភាពនេះ កាន់តែសប្បាយរីករាយ អ្នកអាចលេងផ្លុំពពុះសាប៊ូជាមួយគេ ព្រោះសកម្មភាពនេះជាការអនុវត្តចលនាដង្ហើមដ៏រីករាយ និងមានប្រសិទ្ធភាពសម្រាប់កុមារ។

៣. ជំរុញឱ្យរាងគេមានភាពសកម្ម ៖ វិធីសាស្ត្រដ៏ល្អបំផុតមួយ ដើម្បីគ្រប់គ្រងបញ្ហាថប់បារម្ភ គឺការធ្វើលំហាត់ប្រាណជាប្រចាំ ហើយវិធីសាស្ត្រអាចអនុវត្តបានចំពោះមនុស្សគ្រប់វ័យ។ សម្រាប់កុមារ មិនថាការហាត់យូហ្គាសម្រាប់កុមារ ការរត់លេង ឬលេងល្បែងកំសាន្តផ្សេងៗនោះទេ សុទ្ធតែអាចជួយគេឱ្យចេញពីបញ្ហាថប់បារម្ភបាន។

៤. ពន្យល់ពីភាពធន់របស់គេ ៖ ជួនកាលកូនរបស់អ្នក អាចគិតថាពួកគេមិនមានសមត្ថភាពទប់ទល់នឹងស្ថានភាពលំបាកក្នុងជីវិតនោះទេ។ ហេតុនេះ យើងជាឪពុកម្ដាយត្រូវពន្យល់ប្រាប់គេ អំពីចំណុចខ្លាំងដែលគេមាន។ អ្នកអាចប្រាប់ពួកគេថា ការធ្វើរឿងខ្លះ នឹងធ្វើឱ្យអ្នកមានអារម្មណ៍ថាពិបាក និងឈឺចាប់ ប៉ុន្តែរឿងទាំងនោះនឹងធ្វើ​ឱ្យពួកគេខ្លាំង និងធន់ជាងមុន។ បន្ទាប់មកអ្នកអាចលើកជាឧទារណ៍ ឬបង្ហាញពីភាពក្លាហានដែលគេធ្លាប់ធ្វើកន្លងមក។ លោកវេជ្ជបណ្ឌិត Lauren Cook លើកឡើងថា «អ្នកអាចរំឮកពួកគេថា ពួកគេកំពុងលូតលាស់ឆ្អឹង និងសាច់ដុំដ៏រឹងមាំ ហើយភាពធន់ផ្នែកអារម្មណ៍របស់គេក៏កំពុងតែវិវត្តន៍ដែរ។»

៥. លើកទឹកចិត្តឱ្យគេប្រឈមនឹងភាពភ័យខ្លាច ៖ ការអនុញ្ញាតឱ្យកូនរបស់អ្នកគេចវេះពីស្ថានភាព ដែលគេកំពុងភ័យខ្លាច នឹងធ្វើឱ្យពួកគេកាន់តែមានអារម្មណ៍ភ័យខ្លាច ហើយមិនហ៊ានប្រឈមនឹងស្ថានភាពលំបាកៗក្នុងជីវិត។ លោកវេជ្ជបណ្ឌិត Castro បានលើកឡើងថា ម្ដាយឪពុកគួរលើកទឹកចិត្តកូនៗ ដែលកំពុងមានបញ្ហាថប់បារម្ភ ធ្វើរឿងដែលពួកគេខ្លាច ក្នុងករណីដែលរឿងទាំងនោះមានសុវត្ថិភាព។ ឧទាហរណ៍៖ ការទៅសាលា ជិះជណ្ដើរយន្ត ឬនិយាយជាសាធារណៈជាដើម។

ប្រសិនបើការអនុវត្តវិធីទាំងនេះ មិនដំណើរការ អ្នកចាំបាច់ត្រូវនាំកូនរបស់អ្នក ទៅជួបអ្នកជំនាញ ដើម្បីពិគ្រោះយោបល់ និងព្យាបាលឱ្យបានរហ័ស។ ការនាំទៅជួបអ្នកជំនាញ គឺជាវិធីសាស្ត្រដែលគួរឱ្យទុកចិត្ត និងមានប្រសិទ្ធភាពបំផុត៕