ដើម្បីបន្តចូលរួមចំណែកជាមួយរាជរដ្ឋាភិបាលក្នុងការលើកកម្ពស់វិស័យអប់រំ និងបណ្ដុះបណ្ដាលធនធានមនុស្ស សហភាពសហព័ន្ធយុវជន​កម្ពុជា​រាជធានីភ្នំពេញ នឹង​ផ្តល់អាហារូបករណ៍​ថ្នាក់បរិញ្ញាបត្រ​ចំនយន៣កន្លែង​នៅ​សាកលវិទ្យាល័យ​ប៊ែលធីអន្តរជាតិ សម្រាប់ឆ្នាំ​សិក្សា​២០២៤-២០២៥។

ជំនាញដែលអាហារូបករណ៍ផ្ដល់ជូនរួមមាន ៖ បរិញ្ញាបត្រគ្រប់គ្រង់ពាណិជ្ជកម្ម, បរិញ្ញាបត្រហរិញ្ញាវត្ថុ និងធនាគារ, បរិញ្ញាបត្រសេដ្ឋកិច្ច, បរិញ្ញាបត្រច្បាប់, បរិញ្ញាបត្រអប់រំ សិល្បៈ និងមនុស្សរាស្ត្រ, បរិញ្ញាបត្រទេសចរណ៍ និងបដិសណ្ឋារកិច្ច, បរិញ្ញាបត្រព័ត៌មានវិទ្យា និងវិទ្យាសាស្ត្រ, បរិញ្ញាបត្របច្ចេកវិទ្យាឌីជីថល និងទូរគមនាគមន៍, បរិញ្ញាបត្រវិស្វកម្ម, បរិញ្ញាបត្រស្ថាបត្យកម្ម, បរិញ្ញាបត្រទំនាក់ទំនងអន្តរជាតិ និង បរិញ្ញាបត្រអាកាសចរណ៍ស៊ីវិល។ អាហារូបករណ៍ផ្ដល់ជូនការសិក្សាថ្នាក់បរិញ្ញាបត្ររយៈពេល៤ឆ្នាំ ដែលមានវេនសិក្សា ចន្ទ-សុក្រ (ព្រឹក-ល្ងាច) និង សៅរ៍-អាទិត្យ(ព្រឹក-ល្ងាច)។

លក្ខខណ្ឌក្នុងការជ្រើសរើស អាហារូបករណ៍សម្រាប់សិស្សានុសិស្ស និស្សិត និងយុវជន ផ្ដល់អាទិភាពសម្រាប់បេក្ខជនដែលមានជីវភាពខ្វះខាត បេក្ខជនទាំងពីរភេទត្រូវមានសញ្ញាបត្រមធ្យមសិក្សាទុតិយភូមិ ឬឯកសារបញ្ជាក់ដែលមានតម្លៃស្មើ។ បេក្ខជនត្រូវឆ្លងកាត់ការប្រកួតប្រជែងជ្រើសរើស ដែលបានរៀបចំដោយក្រុមការងារកម្មវិធីសាបព្រោះគ្រាប់ពូជ នៃសហភាពសហព័ន្ធយុវជនកម្ពុជា រាជធានីភ្នំពេញ។ បេក្ខជនជ័យលាភីអាហារូបករណ៍ ត្រូវទទួលបន្ទុកចំណាយដោយខ្លួនឯងលើថ្លៃចុះឈ្មោះចូលរៀន ថ្លៃកាតសិស្ស និងថ្លៃសៀវភៅសិក្សាប្រហែល៦០ដុល្លារក្នុងមួយឆមាស។

បេក្ខជនដែលមានចំណាប់អារម្មណ៍ក្នុងការដាក់ពាក្យ សូមភ្ជាប់ជាមួយឯកសារចាំបាច់មួយចំនួនដូចជា ពាក្យសុំអាហារូបករណ៍០១ច្បាប់, បង្កាន់ដៃទទួលពាក្យស្នើសុំអាហារូបករណ៍០១ច្បាប់, ជីវប្រវត្តិសង្ខេបដែលមាន (បិទរូបថតថ្មី ៤x៦ស.ម)០១ច្បាប់, សញ្ញាបត្រមធ្យមសិក្សាទុតិយភូមិ ឬឯកសារបញ្ជាក់ដែលមានតម្លៃស្មើសម្រាប់ការសិក្សាថ្នាក់បរិញ្ញាបត្រ ០១ច្បាប់, អត្តសញ្ញាណប័ណ្ណថតចម្លង ឬសេចក្ដីចម្លងសំបុត្រកំណើត ឬសំបុត្របញ្ជាក់កំណើត ០១ច្បាប់, រូបថតទំហំ(៤x៦) ថតថ្មីចំពីមុខគ្មានវែនតា និងមានផ្ទៃខាងក្រោយស០៣ច្បាប់។

ដើម្បីធ្វើការដាក់ពាក្យ បេក្ខជនអាចទាញយកពាក្យស្នើសុំអាហារូបករណ៍តាមរយៈ https://drive.google.com/drive/folders/1RyFu6ME2XhbEjoiv1H_7KYQIzLT0hIzd?usp=sharing និងដាក់ពាក្យស្នើសុំអាហារូបករណ៍តាមរយៈ https://forms.gle/edYU825ZCAPZdfTSA ។

គួរបញ្ចាក់ថា បេក្ខជនអាចជ្រើសរើសកម្មវិធីសិក្សាជាភាសាជាតិ ឬជាកម្មវិធីសិក្សាអន្តរជាតិ នៅទាំងពីរទីតាំងនៃសាកលវិទ្យាល័យប៊ែលធីអន្តរជាតិ។ សម្រាប់ព័ត៌មានបន្ថែមអាចទំនាក់ទំនងទៅកាន់ https://t.me/+0CwfOd4YB61jMWM1 ។ ចាប់ទទួលពាក្យពីថ្ងៃផ្សាយដំណឹងរហូតដល់ថ្ងៃទី៣១ ខែតុលា ឆ្នាំ២០២៤៕