ការអានសៀវភៅមានអត្ថប្រយោជន៍ជាច្រើន រួមទាំងបង្កើនការចងចាំ និងវាក្យសព្ទរបស់អ្នក ជួយឱ្យអ្នករៀនអ្វីថ្មីៗ និងធ្វើឱ្យប្រសើរឡើងនូវការផ្តោតអារម្មណ៍។ មនុស្សជាច្រើននិយាយថាចង់បង្កើតទម្លាប់អាន ប៉ុន្តែមិនអាចធ្វើបានដោយសារគ្មានពេល។ ទោះជាយ៉ាងនេះក្ដី ប្រសិនបើអ្នកចង់ត្រឡប់ទៅមានទម្លាប់អានសៀវភៅវិញ មានគន្លឹះមួយចំនួនដែលអាចជួយអ្នកឱ្យចាប់ផ្ដើមទម្លាប់ល្អនេះបាន។

ទី១. កំណត់គោលដៅ ៖ គំនិតល្អក្នុងការលើកទឹកចិត្តខ្លួនឯងឱ្យអានបន្ថែម គឺត្រូវកំណត់គោលដៅ។ ជាឧទាហរណ៍ អ្នកអាចកំណត់គោលដៅអានសៀវភៅមួយចំនួនក្នុងឆ្នាំនេះ ឬចំនួនទំព័រជាក់លាក់ជារៀងរាល់ថ្ងៃ ហើយបន្ទាប់មកអនុវត្តការអានដើម្បីសម្រេចគោលដៅនោះ ។ ទន្ទឹមគ្នានេះ ឧបករណ៍មួយចំនួនដែលអ្នកអាចប្រើដើម្បីជួយអ្នកសម្រេចបាននូវគោលដៅនៃការអានរបស់អ្នករួមមាន កម្មវិធី Bookly, GoodReads.com ឬ Reading Challenge ជាដើម។

ទី២. កំណត់ពេលវេលាសម្រាប់ការអាន ៖ ដើម្បីប្រាកដថាអ្នកនឹងអានជារៀងរាល់ថ្ងៃ អ្នកត្រូវកំណត់ពេលអានប្រចាំថ្ងៃរបស់អ្នក ដូចជា ១០នាទី ឬ១៥នាទីក្នុងមួយថ្ងៃ ឬច្រើនជាងនេះតាមដែលអាចធ្វើទៅបាន។ លើសពីនេះ អ្នកអាចអានសៀវភៅនៅពេលព្រឹក អំឡុងពេលធ្វើដំណើរ មុនពេលចូលគេង ឬសូម្បីតែពេលអាហារថ្ងៃត្រង់ជាដើម។ ម៉្យាងវិញទៀត អ្វីមួយដែលនឹងជួយអ្នកឱ្យអានកាន់តែច្រើនគឺការស្វែងរកកន្លែងល្អដើម្បីអាន។ កន្លែងនេះគួរតែជាកន្លែងស្ងប់ស្ងាត់ ដោយគ្មានការរំខាន។

ទី៣. ស្វែងរកសៀវភៅល្អ ៖ ការស្វែងរកសៀវភៅល្អអាចជាបញ្ហាប្រឈមមួយ។ នៅពេលចាប់ផ្តើមអាន អ្នកនឹងងាយមានអារម្មណ៍ធុញទ្រាន់ ដោយសារតែមានសៀវភៅជាច្រើន ប៉ុន្តែមិនដឹងត្រូវអានសៀវភៅមួយណាទើបល្អ។ ដើម្បីកាត់បន្ថយការខិតខំប្រឹងប្រែងក្នុងការជ្រើសរើសសៀវភៅ អ្នកអាចស្វែងរកបញ្ជីជ្រើសរើសដែលចងក្រងដោយអ្នកចូលចិត្ត។

ទី៤. យកសៀវភៅតាមខ្លួនគ្រប់ទីកន្លែង ៖ ដើម្បីបង្កើតទម្លាប់អានអ្នកត្រូវយកសម្ភារៈអានមួយចំនួនជាមួយអ្នក មិនថាក្នុងទម្រង់ជាសៀវភៅ ឬសៀវភៅអេឡិចត្រូនិចនៅលើស្មាតហ្វូន ឬកម្មវិធីអានសៀវភៅអេឡិចត្រូនិចរបស់អ្នក។ វិធីទាំងនោះ អ្នកអាចអាននៅពេលណាដែលអ្នកមានឱកាសចំណាយពេលសម្រាកតិចតួចក្នុងការអានប្រចាំថ្ងៃជំនួសឱ្យមើល Facebook ឬ Instagram របស់អ្នក។

ទី៥. ចាប់ផ្តើមចូលរួមក្លឹបសៀវភៅ ៖ ការចូលរួមក្នុងក្លឹបសៀវភៅពិតជាមានសារៈសំខាន់ណាស់ក្នុងការចាប់ផ្ដើមបណ្ដុះទម្លាប់អានសៀវភៅ ព្រោះមានមនុស្សដែលមានចំណូលចិត្តអានសៀវភៅស្រាប់។ ទន្ទឹមគ្នានេះ អ្នកអាចសួរមិត្តភក្តិ មិត្តរួមការងារ នូវអ្វីដែលពួកគេកំពុងអាន ហើយធ្វើតាមការណែនាំណាដែលធ្វើឱ្យអ្នកចាប់អារម្មណ៍។ លើសពីនេះ មានក្លឹបសៀវភៅដែលអ្នកអាចស្វែងរកតាមអ៊ីនធឺណិត និងចូលរួមបានផងដែរ ៕