ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ព្រះសីហនុ – មានប្រសាសន៍នៅក្នុងឱកាសចូលរួមពិធីបើកបវេសនកាលឆ្នាំសិក្សាថ្មី ២០២២-២០២៣ នៅសាលាមត្តេយ្យក្រុង នៅក្រុងព្រះសីហនុ លោកជំទាវ សេង សុមេត្តា តំណាង ឯកឧត្តម សាយ សំអាល់ ប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ បានលើកឡើងថា សាលារៀន មិនត្រឹមតែជាទីកន្លែងសុវត្ថិភាពសម្រាប់កុមាររៀនសូត្រប៉ុណ្ណោះទេ តែជាកន្លែងបណ្ដុះនូវប្រាជ្ញាស្មារតី និងជំនាញរបស់កុមារតូច ដែលជាមនុស្សវ័យក្មេងដំបូង ត្រូវបន្តវេនដឹកនាំសង្គមជាតិទៅអនាគត ដោយប្រៀបបាននឹងទំពាំងដែលស្នងឫស្សីដូចច្នោះដែរ។
លោកជំទាវបញ្ជាក់ថា ដើម្បីបានឬស្សីល្អ យើងត្រូតែថែទាំទំពាំងឱ្យបានល្អ ហើយដើម្បីឱ្យកុមារក្លាយជាយុវជន ក្លាយជាសសរទ្រូងប្រទេសជាតិបានល្អត្រឹមត្រូវពិតប្រាកដ យើងត្រូវតែផ្ដល់ឱ្យកុមារទទួលបានការថែទាំសុខភាព និងការអប់រំពេញលេញ ដោយត្រូវមានការចូលរួមពីស្ថាប័នពាក់ព័ន្ធទាំងអស់។
តាមប្រសាសន៍លើកឡើងរបស់លោកជំទាវ សេង សុមេត្តា បច្ចុប្បន្នកម្ពុជាមានកុមារ ដែលមានអាយុក្រោម១៥ឆ្នាំ ចំនួន៥លាននាក់ ចំនួននេះ ធ្វើឱ្យកម្ពុជាជាប្រទេសដែលមានសក្តានុពលយ៉ាងធំធេង ដើម្បីក្លាយទៅជាប្រជាពលរដ្ឋប្រកបដោយជំនាញ ដែលអាចជួយរុញច្រានអនាគតកម្ពុជាឱ្យកាន់តែល្អប្រសើរ។ លោកជំទាវបន្តថា ប្រជាជនវ័យក្មេងពោរពេញដោយភាពស្វាហាប់ និងងាយផ្លាស់ទីពីកន្លែងមួយទៅកន្លែងមួយនេះ កំពុងត្រៀមចូលមកក្នុងកម្លាំងពលកម្ម និងមានសក្តានុពល អាចរួមចំណែកយ៉ាងធំធេងដល់ការអភិវឌ្ឍ និង កំណើនសេដ្ឋកិច្ចប្រកបដោយចីរភាព។
នៅពេលនិយាយអំពីឥទ្ធិពលលើការអភិវឌ្ឍន៍របស់កុមារ ជាទូទៅគេយល់ថា តួនាទីសំខាន់បំផុតជារបស់ឪពុកម្តាយ ។ ឆ្លៀតក្នុងឱ្យកាសនោះ លោកជំទាវ សេង សុមេត្តា ក៏បានធ្វើការរំលឹក និងផ្ដាំផ្ញើដល់មាតាបិតា និងអាណាព្យាបាលគ្រប់រូបថា ឪពុកម្តាយគឺជាគំរូដ៏អស្ចារ្យបំផុត ដែលប៉ះពាល់ដល់តម្លៃ និងគំនិតរបស់កុមារ ការអភិវឌ្ឍន៍បុគ្គលិកលក្ខណៈរបស់កុមារ និងការទទួលបានទម្លាប់ល្អ។
លោកជំទាវ សេង សុមេត្តា
“ការខិតខំប្រឹងប្រែងរបស់មាតាបិតា កំណត់ថា តើសក្តានុពលរបស់កុមារនឹងត្រូវបានបង្ហាញយ៉ាងត្រឹមត្រូវឬយ៉ាងណា ហើយថាតើកុមារនឹងធំឡើងដោយរីករាយ និងជោគជ័យដែរឬទេ”
ជាមួយគ្នានេះដែរ លោកជំទាវ ក៏មិនភ្លេចធ្វើការកោតសរសើរ និងវាយតម្លៃខ្ពស់ ចំពោះលោកគ្រូអ្នកគ្រូទូទាំងប្រទេស ជាពិសេសលោកស្រីនាយិកា នាយិការរង និងអ្នកគ្រូ នៅសាលាមត្តេយ្យក្រុងទាំងអស់ ដែលបានលះបង់កំលាំងកាយចិត្ត បញ្ញាស្មារតី ប្រកបដោយទំនួលខុសត្រូវ បង្ហាត់បង្ហាញ និងអប់រំដល់កុមារតូចៗរបស់យើងឱ្យក្លាយជាក្មេងល្អ មានរបៀបរៀបរយ មានសុជីវធម៌ បន្ថែមពីលើចំណេះដឹងមូលដ្ឋាន។ លោកជំទាវបញ្ជាក់ថា មាតាបិតាអាចមានឥទ្ធិពលលើការអភិវឌ្ឍន៍របស់កុមារ ប៉ុន្តែទំនួលខុសត្រូវដ៏ធំបំផុតនៅតែស្ថិតនៅលើគ្រូបង្រៀន ពីព្រោះ សាលាមិនត្រឹមតែរួមបញ្ចូលអក្សរ និងលេខប៉ុណ្ណោះទេ ប៉ុន្តែក៏មានគ្រូបង្រៀន និងប្រព័ន្ធអប់រំទាំងមូលផងដែរ ដែលសិស្សត្រូវបានបង្រៀនពីការគិតប្រកបដោយការពិចារណា ភាពស្មោះត្រង់ និងមនុស្សធម៌៕
