ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សិស្សឆ្នើមកម្ពុជាចំនួន៧៤៣នាក់ ទទួលបានជ័យលាភីក្នុងការប្រកួតគណិតវិទ្យាអូឡាំព្យាដ សិង្ហបុរី-អាស៊ី និងគណិតវិទ្យាអូឡាំព្យាដសិង្ហបុរីវគ្គផ្តាច់ព្រ័ត្រ (SMGF) ឆ្នាំ២០២៥ កាលពីពេលថ្មីៗនេះ។
លោក យ៉ែម សុភ័ណ្ឌ ប្រធានមជ្ឈមណ្ឌល ដឺ ប្រ៊េននីអេក ហ្វេកធើរី (The Brainiac Factory) មានប្រសាសន៍ថា ក្នុងរយៈពេលបីខែដើមឆ្នាំ២០២៥នេះ មានសិស្សកម្ពុជា ដែលបានចូលរួមក្នុងការប្រឡងការប្រកួតគណិតវិទ្យាអូឡាំព្យាដ សិង្ហបុរី-អាស៊ី និងគណិតវិទ្យាអូឡាំព្យាដ សិង្ហបុរីវគ្គផ្តាច់ព្រ័ត្រ មានចំនួនច្រើនគួរឱ្យកត់សម្គាល់។ ដោយក្នុងនោះ មានបេក្ខជនសរុបចំនួន ២,០៥៣នាក់ (ប្រុស១២១៥នាក់ និងស្រី៨៣៨នាក់) ដែលជាសិស្សានុសិស្សកម្ពុជាមកពីបណ្តាគ្រឹះស្ថានអប់រំសាធារណៈ និងឯកជននានានៅទូទាំងប្រទេសកម្ពុជា ចូលរួមប្រឡងប្រកួតប្រជែងជាមួយសិស្សមកពីប្រទេសដទៃទៀតចំនួន៣៨ប្រទេស។
ប្រធានមជ្ឈមណ្ឌល ដឺ ប្រ៊េននីអេក ហ្វេកធើរី បន្ថែមថា បេក្ខជនកម្ពុជាទទួលបានជ័យលាភី មេដាយមាស ចំនួន១៥៩, មេដាយប្រាក់ ចំនួន២៥០ និងមេដាយសំរឹទ្ធ ចំនួន៤១៩ ដោយសរុបចំនួនមេដាយមានរហូតដល់ ៨២៨មេដាយ ខណៈសិស្សជ័យលាភីមានចំនួន ៧៤៣នាក់។
ជាការកត់សម្គាល់របស់លោក យ៉ែម សុភ័ណ្ឌ សិស្សានុសិស្ស និងអាណាព្យាបាលជាច្រើនបានបង្ហាញនូវការចាប់អារម្មណ៍ខ្ពស់ចំពោះការចូលរួមការប្រកួតប្រជែងនានា។ លោកបន្តថា នៅក្នុងរយៈពេល៦ឆ្នាំមកនេះ លោកបានសង្កេតឃើញថា សមត្ថភាពរបស់បេក្ខជនពីមួយឆ្នាំទៅមួយឆ្នាំមានការរីកចម្រើនគួរឱ្យកត់សម្គាល់។
“បេក្ខជន របស់យើង មានសមត្ថភាពឈរនៅលើឆាកអន្តរជាតិ ប្រកួតប្រជែងជាមួយបេក្ខជន មកពីបណ្ដាប្រទេសដទៃៗទៀតនៅលើពិភពលោកទាំងជាង៥០ប្រទេស ហើយថែមទាំងនាំយកមកនូវលទ្ធផលល្អជូនប្រទេសជាតិថែមទៀត”
បើតាម លោក យ៉ែម សុភ័ណ្ឌ ដើម្បីពង្រឹងសមត្ថភាពសិស្សានុសិស្សឈានទៅរកការប្រកួតលំដាប់ថ្នាក់ពិភពលោក បេក្ខជនគួរមានការស្រាវជ្រាវ និងអនុវត្តន៍ទៅលើលំហាត់បន្ថែម ដោយត្រូវមានឯកសារគណិតវិទ្យាច្រើនសម្រាប់អនុវត្ត។
លោក យ៉ែម សុភ័ណ្ឌ ក៏លើកទឹកចិត្តឱ្យបេក្ខជនដែលស្រលាញ់មុខវិជ្ជាគណិតវិទ្យា ដាក់ពាក្យចូលរួមការប្រឡងកម្មវិធីផ្សេងៗដើម្បីពង្រឹងសមត្ថភាព និងភាពក្លាហានរបស់ខ្លួន។ ចំពោះកម្មវិធីប្រឡងក្នុងស្រុក សម្រាប់បេក្ខជនពិការភាព ឬក្រីក្រ តែស្រលាញ់លើមុខវិជ្ជាគណិតវិទ្យា ចង់ចូលរួមសាកល្បងសមត្ថភាព យើងនឹងផ្តល់អាហារូបករណ៍ឱ្យចូលរួមការប្រឡងដោយមិនគិតថ្លៃ។
គួរជំរាបជូនថា ការប្រកួតគណិតវិទ្យាអូឡាំព្យាដ សិង្ហបុរី-អាស៊ី (SASMO) គឺជាការប្រកួតគណិតវិទ្យាដ៏ធំ និងមានកិត្យានុភាពបំផុតមួយនៅអាស៊ី។ SASMO បានបង្កើតឡើងក្នុងឆ្នាំ២០០៦ មានគោលបំណងពង្រីកសមត្ថភាពវែកញែកឡូជីខល ភាពច្នៃប្រឌិត និងការដោះស្រាយបញ្ហារបស់សិស្សលើសពីកម្មវិធីសិក្សាស្តង់ដា៕
