ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាកលវិទ្យាល័យខេមតិច សហការជាមួយក្រសួងឧស្សាហកម្ម បច្ចេកវិទ្យា និងនវានុវត្តន៍ និងក្រសួងពាណិជ្ជកម្ម បានរៀបចំវគ្គបណ្តុះបណ្តាលស្តីពី «ប្រកាសនីយបត្រតក្កកម្ម និងចំណេះដឹងកម្មសិទ្ធិបញ្ញា» ដើម្បីបញ្ជ្រាបការយល់ដឹងគ្រឹះស្ថានឧត្តមសិក្សា វិទ្យាស្ថានស្រាវជ្រាវ និងវិស័យឯកជនក្នុងប្រទេសកម្ពុជា អំពីសារៈសំខាន់ និងដំណើរការក្នុងការស្នើសុំប្រកាសនីយបត្រតក្កកម្ម និងចំណេះដឹងកម្មសិទ្ធិបញ្ញាឱ្យកាន់តែមានប្រសិទ្ធភាព។
សាស្ត្រាចារ្យបណ្ឌិត ឡេង ភីរម្យ សាកលវិទ្យាធិការរងនៃសាកលវិទ្យាល័យខេមតិច បានថ្លែងថា កិច្ចសហប្រតិបត្តិការរវាងសាកលវិទ្យាល័យ រាជរដ្ឋាភិបាល និងក្រុមហ៊ុនសហគ្រាស គឺដើម្បីផ្សព្វផ្សាយពីច្បាប់ និងចំណេះដឹងទាំងឡាយទាក់ទងនឹងប្រកាសនីយបត្រតក្កកម្ម និងចំណេះដឹងកម្មសិទ្ធិបញ្ញាឱ្យកាន់តែទូលំទូលាយ ក៏ដូចជាលើកស្ទួយដល់ការស្រាវជ្រាវនិងនវានុវត្តន៍ ដែលនឹងដើរតួនាទីយ៉ាងសំខាន់ ក្នុងការជំរុញកំណើនសេដ្ឋកិច្ច ដើម្បីឱ្យរាជរដ្ឋាភិបាលសម្រេចបាននូវចក្ខុវិស័យកម្ពុជាឆ្នាំ២០៥០ក្លាយជាប្រទេសប្រាក់ចំណូលខ្ពស់។
លោកបណ្ឌិត សៀវ សុខលី អគ្គនាយករងនៃអគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ ក៏បានបញ្ជាក់ផងដែរ អំពីសារៈសំខាន់នៃការពង្រឹង ការផ្ទេរបច្ចេកវិទ្យារវាងសាកលវិទ្យាល័យ និងដៃគូឧស្សាហកម្ម ដើម្បីសម្រេចបាននូវទម្រង់សេដ្ឋកិច្ចផ្អែកលើចំណេះដឹង (knowledge-based economy) ឱ្យស្របតាមការវិវត្តន៍នៃបរិបទសេដ្ឋកិច្ចក្នុងតំបន់អាស៊ីអាគ្នេយ៍ក៏ដូចជាពិភពលោកទាំងមូល។
សាស្ត្រាចារ្យបណ្ឌិត ឡេង ភីរម្យ បានសង្កត់ធ្ងន់ថា ការស្នើសុំប្រកាសនីយបត្រតក្កកម្ម និងចំណេះដឹងកម្មសិទ្ធិបញ្ញា មានសារៈសំខាន់សម្រាប់អ្នកស្រាវជ្រាវ ឬសាកលវិទ្យាល័យក្នុងការជំរុញការផ្ទេរបច្ចេកវិទ្យា ឱ្យជោគជ័យដោយធានាបាន ថាលទ្ធផល និងគំនិតច្នៃប្រឌិត ដែលចេញពីអ្នកស្រាវជ្រាវ និងមហាវិទ្យាល័យ នឹងទទួលបានការការពារខាងកម្មសិទ្ធិបញ្ញា។
គួរជម្រាបជូនថា កម្មវិធីនេះ បានរៀបចំឡើង នាថ្ងៃសុក្រ ទី០៩ ខែឧសភា សប្ដាហ៍កន្លងទៅ ដោយមានការចូលរួមពីស្ថាប័នពាក់ព័ន្ធចំនួន២១ រួមមាន គ្រឹះស្ថានឧត្តមសិក្សា វិទ្យាស្ថានស្រាវជ្រាវ និងវិស័យឯកជន ជាពិសេស សហគ្រាសធុនតូចនិងមធ្យម៕
