មហាវិទ្យាល័យពាណិជ្ជសាស្រ្ត នៃសាកលវិទ្យាល័យវិទ្យាសាស្ត្រ និងបច្ចេកវិទ្យាហុងកុង (Hong Kong University of Science and Technology – Business School) ដែល​គេ​ស្គាល់ថា ជា​សាលា​សេដ្ឋកិច្ច​ដ៏ល្បីល្បាញ​មួយ​របស់ហុងកុង បានចុះអនុស្សរណៈនៃការយោគយល់គ្នា ជាមួយ​សាកលវិទ្យាល័យ​ខេមតិច របស់កម្ពុជា កាលពីដើមសប្តាហ៍នេះ ដើម្បី​ជំរុញកិច្ចសហប្រតិបត្តិលើកម្មវិធីសិក្សាផ្នែកអាជីវកម្ម ការសិក្សាស្រាវជ្រាវ និងការផ្លាស់ប្តូរការសិក្សានិស្សិត។

លោកសាស្ត្រាចារ្យបណ្ឌិត ឃៀង សុធី សាកលវិទ្យាលធិការនៃសាកលវិទ្យាល័យខេមតិចមានប្រសាសន៍ថា ការចុះអនុស្សរណៈយោគយល់នេះ គឺជាការផ្តល់ឱកាសឱ្យនិស្សិតកម្ពុជា និងនិស្សិតមកពីសាកលវិទ្យាល័យហុងកុង ទទួលបានបទពិសោធន៍សិក្សាក្នុងបរិយាកាសផ្សេងៗ បង្កើនចំណេះដឹង និងអភិវឌ្ឍជំនាញនៅក្រៅប្រទេស។

លោកសាស្ត្រាចារ្យបណ្ឌិត ឃៀង សុធី សង្កត់ធ្ងន់ថា សាកលវិទ្យាល័យទាំង ២ នឹងធ្វើការជាមួយគ្នា លើគម្រោងស្រាវជ្រាវផ្សេងៗ ដើម្បីដោះស្រាយបញ្ហាប្រឈម និងសិក្សាពីឱកាស ក្នុងបរិបទកម្ពុជា និងអាស៊ី។

លោកសាស្ត្រាចារ្យ Hui Kai Lung ព្រឹទ្ធិបុរស នៃមហាវិទ្យាល័យពាណិជ្ជសាស្រ្ត HKUST មានប្រសាសន៍បញ្ជាក់ថា តាមរយៈអនុស្សរណៈនេះ សាកលវិទ្យាល័យទាំងពីរនឹងរួមគ្នាជំរុញកិច្ចសហប្រតិបត្តិលើកម្មវិធីសិក្សាផ្នែកអាជីវកម្ម ការសិក្សាស្រាវជ្រាវ ការផ្លាស់ប្តូរការសិក្សានិស្សិត កម្មវិធីសិក្ខាសាលាលើប្រធានបទសហគ្រិនភាព នវានុវត្តន៍ បរិស្ថានប្រកបដោយចីរភាព និង នាំមកនូវបច្ចេកវិទ្យា និងវិទ្យាសាស្ត្រថ្មីៗ។​

គួរជម្រាបថា ការចុះអនុស្សរណៈនៃការយោគយល់គ្នា រវាងសាកលវិទ្យាល័យទាំង២ បានធ្វើឡើងកាលពីថ្ងៃចន្ទ ដើមសប្ដាហ៍នេះ នៅសាកលវិទ្យាល័យខេមតិច ដោយមានការចូលរួមពីអ្នកជំនាញមកពីក្រុមហ៊ុន និងសហគ្រាសធំៗនៅកម្ពុជា និងតំបន់អាស៊ីប៉ាស៊ីហ្វិច ក៏ដូចជានិស្សិត សាស្ត្រាចារ្យ និងអ្នកស្រាវជ្រាវនានា។

HKUST ជាសាកលវិទ្យាល័យឈានមុខគេ នៅក្នុងតំបន់ និងពិភពលោក ដោយសាកលវិទ្យាល័យមួយនេះ បានជាប់ចំណាត់ថ្នាក់ទី៦៦ នាឆ្នាំ២០២៥ តាមរយៈ Times Higher Education World University Rankings ។ HKUST Business School មាន គោលដៅក្នុងការបង្ហាត់និស្សិត ដើម្បីសម្រេចបាននូវអាជីពជោគជ័យជាសហគ្រិនលំដាប់ ពិភពលោក អ្នកស្រាវជ្រាវ និងអ្នកដឹកនាំនៅក្នុងសហគមន៍៕