ការឈានជើងចូលកម្រិតថ្មីក្នុងអាជីព អាចជារឿងដ៏គួរឱ្យរំភើប ប៉ុន្តែវាក៏អាចនាំមកជាមួយនឹងអារម្មណ៍តានតឹង និងការថប់បារម្ភមួយ មកជាមួយដូចគ្នាដែរ ហើយប្រសិនបើអាការៈនេះនៅតែបន្តមិនឈប់ នោះនឹងនាំឱ្យមានបញ្ហាអស់ថាមពលទាំងផ្លូវកាយ និងផ្លូវចិត្ត (Burn Out)។

បញ្ហាអស់ថាមពលទាំងផ្លូវកាយ និងផ្លូវចិត្ត ត្រូវបានគេទទួលស្គាល់ថា ជាបាតុភូតដែលងាយកើតឡើងនៅកន្លែងធ្វើការ នេះបើយោងតាមអង្គការសុខភាពពិភពលោក។ អ្នកជំនាញបាននិយាយថា អ្នកដែលជួបប្រទះនឹងអារម្មណ៍អស់ថាមពលទាំងផ្លូវកាយ និងផ្លូវចិត្ត (Burn Out) អាចនឹងមានអារម្មណ៍ថា គ្មានកម្លាំងសូម្បីតែមុនពេលថ្ងៃធ្វើការមកដល់។ ពួកគេក៏ប្រហែលជាមានអារម្មណ៍មិនល្អចំពោះការងារ ហើយគិតថា ខ្លួនឯងធ្វើការមិនបានល្អ។ ជួនកាលបញ្ហានេះ អាចមានលក្ខណៈដូចគ្នានឹងជំងឺបាក់ទឹកចិត្តដែរ ដែលធ្វើឱ្យពិបាករីករាយក្នុងជីវិតប្រចាំថ្ងៃ។

លោកស្រីវេជ្ជបណ្ឌិត Luana Marques សាស្ត្រាចារ្យរងផ្នែកចិត្តវិទ្យានៅសាលាវេជ្ជសាស្ត្រ Harvard លើកឡើងថា បញ្ហាអស់ថាមពលទាំងផ្លូវកាយ និងផ្លូវចិត្ត ធ្វើឱ្យអ្នកកំពុងមានបញ្ហាទទួលអារម្មណ៍ថា ខ្លួនកំពុងស្ពាយបន្ទុកដ៏ធ្ងន់អ៊ីចឹងដែរ។

មូលហេតុនាំឱ្យមានបញ្ហាអស់ថាមពលទាំងផ្លូវកាយ និងផ្លូវចិត្ត

លោក Michael P Leiter សាស្ត្រាចារ្យផ្នែកចិត្តវិទ្យានៅសាកលវិទ្យាល័យ Acadia ក្នុងប្រទេសកាណាដា និងជាសហអ្នកនិពន្ធសៀវភៅ The Burnout Challenge បាននិយាយថា មូលហេតុដែលនាំឱ្យមានបញ្ហាអស់ថាមពលទាំងផ្លូវកាយ និងផ្លូវចិត្ត គឺប្រែប្រួលទៅតាមស្ថានភាព និងចរិតលក្ខណៈរបស់មនុស្សម្នាក់ៗ។ គាត់បន្ថែមថា ប៉ុន្តែជារឿយៗ វាកើតឡើងនៅពេលដែលការរំពឹងទុករបស់យើងមិនស្របគ្នាទៅនឹងស្ថានភាព និងលទ្ធផលជាក់ស្ដែង។

ខណៈពេលដែលមានទិដ្ឋភាពជាច្រើនដែលរួមចំណែកនាំឱ្យបុគ្គលម្នាក់ មានបញ្ហាអស់ថាមពលទាំងផ្លូវកាយ និងផ្លូវចិត្ត មូលហេតុចម្បងមួយគឺបន្ទុក និងការទទួលការងារលើសសមត្ថភាពឆ្ងាយពេក ជាមូលហេតុចម្បង។ អ្នកជំនាញបាននិយាយថា ប្រសិនបើអ្នកត្រូវបានគេស្នើឱ្យធ្វើការច្រើន លើសពីសមត្ថភាព ដែលអ្នកអាចដោះស្រាយបាន នោះអ្នកទំនងជានឹងមានអារម្មណ៍ថា អស់កម្លាំង។

របៀបបង្ការខ្លួនពីវិបត្តិអស់ថាមពលទាំងផ្លូវកាយ និងផ្លូវចិត្ត

វេជ្ជបណ្ឌិត Leiter បាននិយាយថា ផ្នែកជាច្រើន នៃការងាររបស់អ្នក មិនស្ថិតក្នុងការគ្រប់គ្រងរបស់អ្នកទេ។ លោកបន្ថែមថា ដូច្នេះ វាជារឿងសំខាន់ ក្នុងការទទួលស្គាល់ថា ការបង្កើតបរិយាកាសការងារដែលអាចកាត់បន្ថយបញ្ហាអស់ថាមពលទាំងផ្លូវកាយ និងផ្លូវចិត្ត មិនមែនអាស្រ័យតែលើអ្នកម្នាក់ឯងនោះទេ។

លោកស្រីបណ្ឌិត Mindy Shoss សាស្ត្រាចារ្យផ្នែកចិត្តវិទ្យានៅសាកលវិទ្យាល័យ Central Florida បាននិយាយថា ប្រសិនបើអ្នកចង់មានភាពសកម្មនៅពេលចាប់ផ្តើមការងារ ចូរទទួលយក និងចង់ធ្វើកិច្ចការថ្មីៗ ដោយចាត់ទុកជាការរៀនសូត្រ និងសួរសំណួរឱ្យបានច្រើន។

វេជ្ជបណ្ឌិត Leiter បាននិយាយថា អ្នកអាចពិចារណាប្រាប់ចៅហ្វាយរបស់អ្នកនូវអ្វី ដែលធ្វើឱ្យអ្នកមានអារម្មណ៍រំភើបបំផុតអំពីតួនាទីថ្មីរបស់អ្នក ហើយសួរពីរបៀប ដែលអ្នកអាចបញ្ចូលកិច្ចការទាំងនោះ ទៅក្នុងការបំពេញការងារប្រចាំថ្ងៃ។ យុទ្ធសាស្ត្រនេះ អាចផ្ដល់ឱ្យអ្នកនូវអារម្មណ៍ថា មានអំណាច និងធ្វើឱ្យអ្នកយល់ថា ការងារដែលខ្លួនបំពេញ គឺជាការងារ មានន័យ។ ម្យ៉ាងទៀត ការរៀបចំកាលវិភាគ និងការងារអាទិភាព ក៏ជាវិធីសាស្ត្រ ដ៏មានប្រសិទ្ធភាព សម្រាប់ការកាត់បន្ថយហានិភ័យ នៃអារម្មណ៍អស់ថាមពលទាំងផ្លូវកាយ និងផ្លូវចិត្តដែរ។

Ron Z Goetzel នាយកវិទ្យាស្ថានសម្រាប់ការសិក្សាសុខភាព និងផលិតភាពនៅសាលា Johns Hopkins Bloomberg School of Public Health បាននិយាយថា ការនិយាយចេញនូវអារម្មណ៍ធុញថប់នឹងបន្ទុកការងាររបស់អ្នក គឺជាវិធីសាស្ត្រមួយផ្សេងទៀត ដើម្បីការងារ Burn Out ។

វេជ្ជបណ្ឌិត Marques បាននិយាយថា ការពង្រឹងទំនាក់ទំនងជាមួយមិត្តរួមការងារ ក៏អាចជួយទប់ទល់ការអស់ថាមពលផ្លូវកាយ និងផ្លូវចិត្តផងដែរ៕