ពាក្យថាវិន័យមួយមាត់ ស្តាប់ទៅហាក់ដូចជាពិបាកខ្លាំង និងត្រូវការឆន្ទៈខ្ពស់ក្នុងការអនុវត្ត! ប៉ុន្តែជាលទ្ធផល បន្ទាប់ពីបង្កើតវិន័យទៅតាមសេចក្ដីប្រាថ្នារបស់ខ្លួនហើយ នោះវិន័យមិនមែនជាអ្វីដែលគួរជៀសវាងទេ ព្រោះវិន័យជាកត្តាជំរុញបាននូវភាពរីករាយ និងផលិតភាព។

វិន័យចំពោះខ្លួនឯង ចាំបាច់ត្រូវមានការចងក្រងជាចំណុចតូចៗ ជាពិសេសនៅពេលព្យាយាមដំបូងៗ ការ​អនុវត្ត​ឱ្យបាន​ទៀងទាត់ ក្នុងការសម្រេចបាននៅគោលដៅអ្វីមួយ តួយ៉ាងដូចជាការថែរក្សាសុខភាព គឺត្រូវការឱ្យខ្លួនឯង មានវិន័យហូបរបស់ដែលផ្តល់នូវសារធាតុចិញ្ចឹម ជាជាងគ្រាន់តែញ៉ាំអាហារបំពេញចំណូលចិត្តតែមួយមុខ។ អារម្មណ៍ល្អ ជាកត្តានាំឱ្យការងារមានផលិតភាពមួយផ្នែកហើយ ប៉ុន្តែអារម្មណ៍មនុស្សមិនស្ថិតស្ថេររហូតនោះទេ ម្តងរីករាយ ម្តងទុក្ខសោក ដែលជាហេតុត្រូវការកំណត់គោលដៅ​ និងត្រូវការរបៀបដាក់វិន័យដើម្បីបង្ខិតខ្លួនឯងឱ្យកាន់តែនៅជិតគោលដៅដែលខ្លួនប្រាថ្នា។

តាមរយៈគេហទំព័រ SavingAdvice បានបង្ហាញគន្លឹះមួយចំនួន ដើម្បីបង្វឹកខ្លួនឯងឱ្យមានវិន័យខ្ជាប់ខ្ជួន ដែលមានដូចជា ការសម្របខ្លួនបន្តិចម្តងៗ ការជ្រើសរើសអាទិភាពដោយបន្ថយសម្ពាធ រក្សាការអនុវត្តទោះបីជាពិបាកក្ដី ជ្រើសរើសកម្មវិធីណាមួយដើម្បីជំនួយ ហើយកត្តាសំខាន់ចុងក្រោយដែលមិនអាចមើលរំលង គឺ ការទុកចន្លោះឆ្លុះបញ្ចាំង និងកែលម្អ រួមទាំងបន្តអនុវត្តន៍អ្វីដែលជាចំណែកល្អៗទៅមុខទៀត ហើយចំណុចទាំងនោះក៏មានរៀបរាប់លម្អិតនៅខាងក្រោម ៖

១. គិតអំពីអាទិភាពច្រើនជាងសម្ពាធ ៖ ការរក្សាវិន័យមួយបានមាំមួន មិនគួរចាំដល់ពេលមានបញ្ហា ឬស្ថានភាពសស្លន់សស្លោខ្លាំង ទើបចាប់ផ្តើមគិតអំពីការងារណាសំខាន់នោះទេ ដើម្បីផ្តោតលើអាទិភាពច្រើនជាងសម្ពាធ គឺចាប់ផ្តើមផ្ទៀងផ្ទាត់ជារៀងរាល់ថ្ងៃ ឬតាមដានដោយការធ្វើផែនការសកម្មភាពនៅពេលព្រឹក ឬការឆ្លុះបញ្ចាំងជាប្រចាំជាដើម។ ផ្តល់អាទិភាពទៅបាន ត្រូវការដាក់សំណួរសួរខ្លួនឯងជារឿយៗថា​ តើថាមពលឬកម្លាំង ដែលខ្លួនមាននៅថ្ងៃនេះ គួរចំណាយលើការងារប្រភេទណាច្រើនជាងគេ? ហើយការងារណាខ្លះ ដែលអាចរង់ចាំពេលក្រោយបាន?

មួយវិញទៀតដើម្បីបញ្ចៀសការពិនិត្យរាល់ព័ត៌មាន ដែលមិនចាំបាច់ ​​មិនថាអ៊ីម៉ែល សារឆ្លើយឆ្លង ក៏ដូចជាសកម្មភាពដ៏ទៃទៀត ដែលមិនចាំបាច់ទាំងឡាយ។ អ្វីដែលគួរអនុវត្តន៍នោះ គឺការធ្វើផែនការសកម្មភាព តារាងបញ្ជីរាយនាមការងារ ឬក៏ប្រើប្រាស់កម្មវិធីឌីជីថលទាំងឡាយណា មានលទ្ធភាពជួយដាស់តឿនឱ្យធ្វើសកម្មភាពសំខាន់ៗប្រចាំថ្ងៃ។

២. ធ្វើឱ្យ​បានទៀងទាត់ទោះបីជាធុញទ្រាន់ ៖ ជាសក្ខីភាពមួយ ដែលគួរតែដឹងដែរ ទម្លាប់មួយចំនួនធំ មិនមែនសម្រេចបានក្នុងរយ:ពេលខ្លី ឬដោយភាពងាយស្រួលនោះទេ ឧទាហរណ៍ការញ៉ាំទឹកឱ្យបានគ្រប់គ្រាន់ កាត់បន្ថយការសម្លឹងអេក្រង់យូរៗមុនពេលចូលគេង ឬក៏ការធ្វើផែនការហិរញ្ញវត្ថុជាដើម ទាំងនេះសុទ្ធសឹងតែត្រូវការពេលវេលា និងភាពអត់ធ្មត់ក្នុងការបន្តអនុវត្តន៍។ យ៉ាងណាក៏ដោយ មិនថាធ្វើបានតិច ឬច្រើននោះទេ ​អ្វីដែលសំខាន់គឺការរក្សាវិន័យផ្ទាល់ខ្លួនបានទៀងទាត់ និងស្វែងយល់បន្ថែមអំពីអត្ថប្រយោជន៍នៃការប្រកាន់ភ្ជាប់នូវភាពទៀងទាត់។

ជំនួសឱ្យការស្វែងរកកម្លាំងចិត្តពីខាងក្រៅ គួរចាប់ផ្តើមគិតអំពីការកសាងភាពធន់នៃខ្លួនឯងតាមរយៈទម្លាប់ប្រចាំថ្ងៃ ដែលមិនចាំបាច់ទាល់តែមានអារម្មណ៍ល្អចាំធ្វើនោះទេ! ទម្លាប់ និងវិន័យ ជាការបន្តធ្វើទោះចិត្តចង់ឬមិនចង់ តែជាគោលដៅរួម គឺដើម្បីទទួលបាននូវលទ្ធផលវិជ្ជមាន ដែលជាទូទៅមានន័យថាធ្វើសកម្មភាពដែលមិនចង់ធ្វើ​ ដើម្បីលទ្ធផលដែលខ្លួនចង់បាន។

៣. ពឹងផ្អែកលើការរៀបចំជាប្រព័ន្ធ​ជំនួសឱ្យមជ្ឈដ្ឋានខាងក្រៅ ៖ កម្លាំងជំរុញចិត្ត ​ឬការទទួលបានថាមពលវិជ្ជមានពីខាងក្រៅបានរួមចំណែកដល់ការបង្កើនថាមពលមួយផ្នែកមែន ប៉ុន្តែបើពឹងផ្អែកលើកត្តាមួយនេះ​ទាំងស្រុងគឺជារឿងដែលមិនគួរឱ្យកើតមាននោះទេ ពីព្រោះស្ថានភាពផ្លូវចិត្តរបស់មនុស្សគឺមានការឡើងចុះជាប្រចាំ ដើម្បីរក្សាវិន័យទៅបាន គឺត្រូវទទួលស្គាល់ចំណុចនេះដូចគ្នា។ កសាងអនាគតខ្លួនឯង ដោយការរៀបចំជាប្រព័ន្ធ មិនមែនរំពឹងលើការលើកទឹកចិត្តពីខាងក្រៅទាំងស្រុងឡើយ។

ការរៀបចំទៀតសោត ចង់សំដៅលើការបង្កើតបរិយាកាសមួយដែលរុញច្រាញការប្រព្រឹត្តិប្រចាំថ្ងៃឱ្យកាន់តែឆ្លើយតបទៅនឹងអ្វីដែលខ្លួនចង់បាន ជាឧទាហរណ៍ចង់ងើបហាត់ប្រាណពេលព្រឹកព្រលឹម ដូចនេះគួរត្រៀមសម្លៀកបំពាក់កីឡាទុកពីល្ងាចឱ្យហើយ ឬចង់សន្សំលុយគួរបង្កើតគណនេយ្យ ដែលកាត់ប្រាក់ដោយស្វ័យប្រវត្តិទៅក្នុងកុងសន្សំ ឬក៏បង្កើនការផ្តោតដោយបិទរាល់គេហទំព័រដែលផ្តល់នូវការរំខានជាដើម៕