ផ្លែទំពាំងបាយជូ មិនត្រឹមតែមានឱជារសឆ្លើយតបនឹងចំណូលចិត្តមនុស្សប៉ុណ្ណោះទេ ប៉ុន្តែគឺជាប្រភេទផ្លែឈើម្យ៉ាងដែលអាចប្រើប្រាស់ជាអាហារូបត្ថម្ភ សម្រាប់ទ្រទ្រង់សុខភាព។ នៅក្នុងពូជនៃផ្លែនេះទៀតសោតគឺមានភាពខុសៗគ្នា និងភាពសម្បូរបែបទៅតាមរដូវកាល តែយ៉ាងណាសារធាតុទូទៅពីក្នុងទំពាំងបាយជូគឺ សារធាតុប្រឆាំងអុកស៊ីតកម្ម វីតាមីន និងសារធាតុរ៉ែ ដែលសារធាតុទាំងនេះ ដើរតួនាទីចិញ្ចឹមទៅកាន់សុខភាពរាងកាយមនុស្ស។

តាមរយៈគេហទំព័រ GRAZIA បានប្រាប់ពីគុណសម្បត្តិប្រាំចំណុចរបស់ផ្លែទំពាំងបាយជូ និងមានរៀបរាប់លម្អិតជូននៅខាងក្រោម ៖

១. កាត់បន្ថយការប្រែប្រួលរាងកាយទៅកាន់វ័យជរា ៖ មូលហេតុដែលទំពាំងបាយជូ មានសមត្ថភាពក្នុងការកាត់បន្ថយ ការប្រែប្រួលរាងកាយលឿនទៅកាន់វ័យជរាបាន ពីព្រោះផ្លែឈើប្រភេទនេះ​ មានផ្ទុកសារធាតុប្រឆាំងអុកស៊ីតកម្មខ្ពស់ និងរួមចំណែកកាត់បន្ថយភាពតានតឹង។

២. ការពារសុខភាពបេះដូង ៖ ទំពាំងបាយជូ ល្អសម្រាប់សុខភាពបេះដូងនៅត្រង់ថា ក្នុងផ្លែឈើមានសារធាតុប្រឆាំងអុកស៊ីតកម្មខ្ពស់ដូចដែលបានប្រាប់ក្នុងចំណុចទីមួយ ក្រៅពីនោះគឺនៅមានផ្ទុកវីតាមីនស៊ី (C) និងមាននាទីជួយការពារសរសៃឈាម និងធ្វើឱ្យឈាមរត់បានល្អ។ បន្ថែមពីនោះ ក៏រួមចំណែកក្នុងការកាត់បន្ថយការរលាក និងបន្ថយហានិភ័យនៃជំងឺលើសឈាម ក៏ដូចជាសុខភាពសរសៃឈាមបេះដូង គ្រប់គ្រងកម្រិតកូឡេស្តេរ៉ុល និងកាត់បន្ថយកូលេស្តេរ៉ុលមិនល្អចេញពីរាងកាយ។

៣. សម្រួលប្រព័ន្ធរំលាយអាហារ ៖ ទំពាំងបាយជូ មានរសជាតិជូៗ ដែលងាយស្រួលក្នុងការដឹងថាមានវីតាមីនស៊ី ( C ) ខណៈផ្លែឈើប្រភេទនេះ ក៏មានជាតិសរសៃ ដែល​ជួយ​ដល់​ការ​រំលាយ​អាហារ​បាន​ល្អ និងសុខភាពពោះវៀនផងដែរ។ កាលដែលទទួលទានអាហារសម្បូរដោយជាតិសសៃជួយគ្រប់គ្រងចលនាពោះវៀន និងការពារអាការទល់លាមក។

៤. សុខភាពភ្នែក ៖ ការទទួលទានទំពាំងបាយជូ បានជាប្រចាំ អាចជួយកាត់បន្ថយហានិភ័យ នៃជំងឺភ្នែកដែលទាក់ទងនឹងភាពស្រវាំងពេលមានអាយុកើនឡើង និងជំងឺភ្នែកឡើងបាយជាដើម ទាំងនេះក៏ដោយសារតែផ្លែឈើមានសារធាតុប្រឆាំងអុកស៊ីតកម្ម។

៥. សុខភាពស្បែក ៖​ ដោយសារតែវីតាមីនស៊ី ( C ) និងសារធាតុប្រឆាំងអុកស៊ីតកម្ម ទើបមានការជឿជាក់ថា ទំពាំងបាយជូ ជួយរក្សាស្បែកឱ្យក្មេងជាងវ័យ និងភ្លឺថ្លា។ បន្ថែមពីនោះ វីតាមីនស៊ី ( C ) ក៏ជំរុញឱ្យមានការផលិតកូឡាជែន ជួយការពារភាពជ្រីវជ្រួញ និងសញ្ញានៃភាពចាស់ រួមទាំងការពារកាំរស្មីយូវីចំពោះស្បែក៕