នៅពេលរាងកាយចាប់ផ្តើមមានរោគសញ្ញាផ្តាសាយ ការជ្រើសរើស​របបអាហារ​ឱ្យបានត្រឹមត្រូវ​គឺជាគន្លឹះដ៏សំខាន់ក្នុង​ការជួយឱ្យសុខភាព​ឆាប់ត្រឡប់មកល្អប្រសើរវិញ។ ខាងក្រោមនេះ គឺជា​អាហារ និងភេសជ្ជៈ៥មុខ ដែល​លោកអ្នក​គួរ​ទទួលទាន ដើម្បី​កាត់បន្ថយ​រោគ​សញ្ញា និងពង្រឹងប្រព័ន្ធការពាររាងកាយពីជំងឺផ្តាសាយ។

១. ទឹកក្តៅឧណ្ហៗ និង​ទឹកខ្ញីជាមួយទឹកឃ្មុំ ៖ ការទទួលទានភេសជ្ជៈក្តៅៗគឺជាជំហានដំបូងដ៏សំខាន់ ដោយសារកម្តៅនៃទឹកជួយរំលាយស្លេស្ម និងធ្វើឱ្យច្រមុះដែលតឹងស្រឡះមកវិញ។ ក្នុងនោះ ទឹកខ្ញីដែលលាយជាមួយទឹកឃ្មុំ និងក្រូចឆ្មារ ត្រូវបានចាត់ទុកជាឱសថធម្មជាតិដ៏ពូកែស័ក្តិសិទ្ធិ ព្រោះខ្ញីមានសមត្ថភាពប្រឆាំងការរលាក និងបំបាត់អាការៈចង់ក្អួត ខណៈដែលទឹកឃ្មុំដើរតួជាភ្នាក់ងារជួយស្រោបបំពង់កដើម្បីកាត់បន្ថយការក្អក និងការឈឺចាប់។

២. ទឹកផ្លែឈើស្រស់ ៖ ការញ៉ាំទឹកផ្លែឈើស្រស់ដូចជាទឹកក្រូចពោធិ៍សាត់ ឬទឹកម្នាស់ នឹងផ្តល់នូវវីតាមីន C យ៉ាងច្រើន ដែលជួយឱ្យគ្រាប់ឈាមសក្នុងរាងកាយមានកម្លាំងក្នុងការកម្ចាត់វីរុសផ្តាសាយ។

៣. ស៊ុបមាន់ ៖ ចំពោះផ្នែកអាហារ ស៊ុបមាន់ក្តៅៗមិនត្រឹមតែផ្ដល់ភាពកក់ក្ដៅប៉ុណ្ណោះទេ ប៉ុន្តែអាស៊ីតអាមីណេដែលមាននៅក្នុងសាច់មាន់ ជួយរារាំងការកកស្ទះនៅក្នុងសួត និងផ្លូវដង្ហើម។

៤. បបរគ្រឿង ៖ បបរគ្រឿងប្រជាជន​កម្ពុជា​តែងទទួលទាន ព្រោះវាងាយស្រួលលេប និងផ្តល់ថាមពលបានរហ័ស, ប្រសិនបើអ្នកជ្រើសរើសទទួលទានបបរគ្រឿង អ្នកគួរបន្ថែមគ្រឿងទេសដូចជាខ្ទឹមស និងខ្ទឹមក្រហមឱ្យបានច្រើន ព្រោះខ្ទឹមសមានផ្ទុកសារធាតុម្យ៉ាងហៅថា Allicin ដែលមានសមត្ថភាពសម្លាប់មេរោគបាក់តេរី និងពង្រឹងភាពស៊ាំបានយ៉ាងរហ័ស។

៥. ផ្លែឈើស្រស់ ៖ សម្រាប់ផ្លែឈើវិញ អ្នកគួរជ្រើសរើសផ្លែឈើដែលមានសាច់ទន់ និងមានជាតិទឹកខ្ពស់ដូចជា ផ្លែគីវី ផ្លែស្ត្រប៊ឺរី ឬផ្លែក្រូច ព្រោះវាសម្បូរទៅដោយសារធាតុប្រឆាំងអុកស៊ីតកម្ម ដែលជួយជួសជុល​កោសិកាដែល​រងការខូច​ខាត​ដោយ​សារជំងឺ។

ទន្ទឹមនឹងការជ្រើសរើសអាហារល្អៗ អ្នកក៏ត្រូវប្រុងប្រយ័ត្នដោយចៀសវាងការទទួលទានទឹកកក អាហារបំពងដែលមានខ្លាញ់ច្រើន និងភេសជ្ជៈដែលមានជាតិអាល់កុល ឬកាហ្វេអ៊ីន ព្រោះវាអាចធ្វើឱ្យបំពង់ករឹតតែរលាក និងធ្វើឱ្យរាងកាយបាត់បង់ជាតិទឹកកាន់តែខ្លាំង។ ការអនុវត្តនូវទម្លាប់ទទួលទានដ៏ល្អនេះ រួមជាមួយការសម្រាកឱ្យបានគ្រប់គ្រាន់ និងការខ្ពុរមាត់ជាមួយទឹកអំបិល នឹងជួយឱ្យរោគសញ្ញាផ្តាសាយថយចុះយ៉ាងឆាប់រហ័ស៕