ក្នុងអំឡុងជំនួបកំពូលរវាង​សម្តេច​មហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា និង ឯកឧត្តម យូន ស៊កយ៉ល ប្រធានាធិបតី នៃសាធារណរដ្ឋកូរ៉េ កាលពីពេលថ្មីៗនេះ មេដឹកនាំប្រទេស​ទាំងពីរ បានបញ្ជាក់រួមគ្នា ពីសារសំខាន់ នៃការ​ជំរុញ​ការ​អភិវឌ្ឍមនុស្ស​ជំនាន់ក្រោយ ដែលបំពាក់ដោយជំនាញ​ឧស្សាហកម្ម និង​ឌីជីថល ដើម្បីជំរុញ​បរិវត្តកម្ម និង​នវានុវត្តន៍​ឧស្សាហកម្ម។

ក្នុងបរិការណ៍នេះ ភាគីទាំងពីរ​បានស្វាគមន៍ការ​ចាប់ផ្តើម​កម្មវិធី​ហិរញ្ញប្បទាន​ឥតសំណងថ្មីរបស់ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) ដែលមានគោលបំណងផ្តល់​ឱកាស​ដល់យុវជន​ទទួល​បាន​នូវ​ជំនាញ​ឧស្សាហកម្ម និង​បច្ចេកវិទ្យាគមនាគមន៍ និង​ព័ត៌មាន (ICT) តាមរយៈ​ការ​បណ្តុះបណ្តាល​បច្ចេកទេស និង​វិជ្ជាជីវៈ ការ​អប់រំផ្នែកវិទ្យាសាស្រ្ត បច្ចេកវិទ្យា វិស្វកម្ម និង​គណិតវិទ្យា (STEM) ប្រកបដោយ​គុណភាព និង​កម្មវិធី​អាហារូបករណ៍។

ដោយ​ទទួលស្គាល់ថា វិទ្យាសាស្រ្ត បច្ចេកវិទ្យា និង​នវានុវត្តន៍​ ជាវិស័យ​ដែលមានការវិវឌ្ឍ និង​មានសារៈសំខាន់ខ្លាំងសម្រាប់​ការ​អភិវឌ្ឍសង្គម-សេដ្ឋកិច្ច ភាគីទាំងពីរ​បានឯកភាពបង្កើតកិច្ច​សហប្រតិបត្តិការ​ក្នុងវិស័យនេះ ។ ជាពិសេស​ភាគីកម្ពុជាបានគូស​បញ្ជាក់អំពីសារសំខាន់ នៃការ​អភិវឌ្ឍហេដ្ឋារចនាសម្ព័ន្ធ​លើ​ការ​ស្រាវជ្រាវ សួន​វិទ្យាសាស្រ្ត បច្ចេកវិទ្យា និង​នវានុវត្តន៍ ការផ្តល់អាហារូបករណ៍​សម្រាប់​ការ​សិក្សា​ថ្នាក់​ក្រោយ​ឧត្តម​លើមុខវិជ្ជាវិទ្យាសាស្រ្ត បច្ចេកវិទ្យា វិស្វកម្ម និង​គណិតវិទ្យា កិច្ច​សហការ​លើ​ការ​ស្រាវជ្រាវ និង​អភិវឌ្ឍន៍ និង​ការ​ផ្ទេរបច្ចេកវិទ្យា។

ជាមួយគ្នានេះ ភាគីទាំងពីរ បានស្វាគមន៍គម្រោងរបស់ KOICA ដែល​កំពុង​ដំណើរ​ការ​នៅ​កម្ពុជា ដែលមានឈ្មោះថា «ការកសាងសមត្ថភាព និង​ការ​បង្កើតបរិយាកាស​ក្នុងជំនាញ ICT នៃការ​អប់រំបណ្តុះបណ្តាល​បច្ចេកទេស និង​វិជ្ជាជីវៈ (TVET)»។

គួរបញ្ជាក់ថា គម្រោងការកសាងសមត្ថភាព និងការបង្កើតបរិយាកាសក្នុងជំនាញ ICT នៃការអប់រំបណ្តុះបណ្តាលបច្ចេកទេសនិងវិជ្ជាជីវៈ (TVET) នៅកម្ពុជា គឺ​បានចាប់ផ្តើមកាល​ពីឆ្នាំ២០២៣ ​ដែលមានគោលបំណង ដើម្បីរួមចំណែកលើកកម្ពស់គុណភាព TVET តាមរយៈការកែលម្អកម្មវិធីសិក្សា និងបរិយាកាសបណ្តុះបណ្តាល និងការពង្រឹង សមត្ថភាពគ្រូបច្ចេកទេសក្នុងវិស័យ ICT។ ជាមួយគ្នានេះ កាលពីខែមីនា ឆ្នាំ២០២៤ KOICA ក៏បានផ្តល់ហិរញ្ញប្បទាន ក្នុងការ​បង្កើតមជ្ឈមណ្ឌលជាតិបណ្តុះបណ្តាលធុរកិច្ចថ្មី នៃកម្ពុជា ដែល​នឹង​រួមចំណែក​ដល់​ការ​ពន្លឿន​បរិវត្តកម្មឌីជីថល និង​សេដ្ឋកិច្ច​ឌីជីថល​របស់​កម្ពុជាផងដែរ៕