បច្ចេកវិទ្យាកាន់តែរីកចម្រើន គេមើលឃើញថា ការសិក្សាជំនាញបច្ចេកទេស និងវិជ្ជាជីវៈពិតជាមានសារៈសំខាន់ណាស់ក្នុងជីវភាពរស់ប្រចាំថ្ងៃ ។ ជំនាញបច្ចេកទេស និងវិជ្ជាជីវៈ មិនត្រឹមតែកំពុងមានតម្រូវការទីផ្សារការងារខ្ពស់ប៉ុណ្ណោះទេ តែអ្នកសិក្សា​ថែមទាំងអាចយកមកប្រកបមុខរបរបានយ៉ាងល្អប្រសើរថែមទៀត។

លោក រស់ ប៉ែត នាយកវិទ្យាស្ថានអភិវឌ្ឍន៍​មុខជំនាញកម្ពុជា-ថៃ លើកឡើងថា ជាការសង្កេតរបស់លោក សិស្សដែលបញ្ចប់ការសិក្សាជំនាញបច្ចេកទេស និង​វិជ្ជាជីវៈ ពេលចូលទៅកាន់ទីផ្សារការងារ គឺពិតជាមានតម្រូវការខ្ពស់។ លោកថា សូម្បីតែសិស្ស​ដែលកំពុងសិក្សា ក៏​ទទួលបានការងារធ្វើដែរ តាមរយៈ​ការ​ធ្វើ​កម្មសិក្សា ដោយសារការបណ្តុះបណ្តាល​ TVET មានគោលដៅសំខាន់បំផុត គឺបណ្តុះបណ្តាលផ្សារភ្ជាប់​ទៅនឹង​វិស័យ​ឯកជន ក៏​ដូចជា​ឧស្សាហកម្ម។

ក្នុងនោះលោក រស់ ប៉ែត ក៏​បានអំពាវនាវ​ដល់យុវជនទាំងអស់ ដែល​ពុំ​ទាន់មានជំនាញ និង​មានជំនាញតិចតួច សូម​ចាប់អារម្មណ៍ទៅលើជំនាញ​បច្ចេកទេស និងវិជ្ជាជីវៈ (TVET) ព្រោះតែជំនាញទាំងអស់នេះ ជាឱកាសធ្វើឱ្យ​យុវជន​មានការផ្លាស់ប្តូរទាំងចំណេះដឹង ចំណេះធ្វើ និង​ឱកាស​ការងារ ពិសេស​គឺផ្លាស់ប្តូរជីវភាពគ្រួសាររបស់យុវជនតែម្តង។

ការអប់រំបណ្តុះបណ្តាលបច្ចេកទេស និង​វិជ្ជាជីវៈ គឺជាកត្តាមិនអាចខ្វះបានក្នុងការ​អភិវឌ្ឍសេដ្ឋកិច្ចសង្គម និង​ជំរុញ​ឱ្យ​អ្នកសិក្សា​ទទួល​បាននូវចំណេះដឹង ជំនាញបច្ចេកទេស​ជាមួយ​សមត្ថភាពពិតប្រាកដ ដើម្បីក្លាយ​ខ្លួនជា​ពលករ​ជំនាញ អ្នក​បច្ចេកទេស ព្រមទាំង​ចូលរួមចំណែកយ៉ាងសំខាន់​ក្នុង​ការ​អភិវឌ្ឍសង្គម និង​សេដ្ឋកិច្ចជាតិ។ ដោយមើលឃើញពីកត្តានេះ រាជរដ្ឋាភិបាលកម្ពុជា បានចាត់ទុកការអភិវឌ្ឍប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ ជាអាទិភាពខ្ពស់បំផុតក្នុងគ្រប់ក្របខណ្ឌគោលនយោបាយជាតិ។ ជាក់ស្តែង ដើម្បីជំរុញកម្លាំងពលកម្មប្រកបដោយសមត្ថភាព គុណភាព និងផលិតភាពខ្ពស់ រាជរដ្ឋាភិបាលបានដាក់ចេញក្នុងយុទ្ធសាស្ត្របញ្ចកោណ និងបានប្រកាសធ្វើការបណ្តុះបណ្តាលជំនាញវិជ្ជាជីវៈនិងបច្ចេកទេសដល់យុវជនមកពីគ្រួសារក្រីក្រ និងគ្រួសារក្រីក្រចំនួន ១លាន៥សែននាក់។

ឯកឧត្តម ហេង សួរ រដ្ឋមន្រ្តីក្រសួងការងារ និង​បណ្តុះបណ្តាលវិជ្ជាជីវៈ មានប្រសាសន៍ថា បច្ចុប្បន្ន​នៅគ្រប់សាលាបណ្តុះបណ្តាល​បច្ចេកទេស និងវិជ្ជាជីវៈ សុទ្ធតែមានមេរៀន, មានគ្រូ, មានថ្នាក់ និង​មានរោងជាង។ ជាមួយ​គ្នានេះ ក្រសួងការងារ ក៏​បានចុះកិច្ចព្រមព្រៀង MoU ជាមួយ​វិស័យ​ឯកជន ដើម្បីធ្វើយ៉ាងណាឱ្យ​សិស្ស​ដែល​រៀនជំនាញបច្ចេកទេស មានកន្លែងហាត់ការ មានកន្លែង​ចុះ​ធ្វើ​កម្មសិក្សា ដើម្បីធានាថា សិស្សពេលដែលរៀនចប់ គឺអាចធ្វើការងារបាន។

ពេលដែលគាត់ទៅហាត់ការនេះ គឺម្ចាស់រោងចក្រ ម្ចាស់ក្រុមហ៊ុន គេអាចសម្លឹងមើលឥរិយាបទរបស់គាត់ គេអាចសម្លឹងមើលជំនាញរបស់គាត់ ហើយបើសិនជាគេយល់ថា គាត់ជាមនុស្សដែលមានឥរិយាបទ មានជំនាញទន់ មានសមត្ថភាព នោះគេនឹងកំណត់ដើម្បីទទួលយកគាត់ធ្វើជាបុគ្គលិកតែម្តង

ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ

បើតាម​ប្រសាសន៍របស់ ឯកឧត្តម ហេង សួរ យន្តការនេះ នឹងធ្វើ​ឱ្យយុវជនរបស់យើងដែលរៀនចប់ គឺអាចនឹងមានការងារធ្វើភ្លាមៗតែម្តង ។ ហើយចំណែកអ្នកដែលមិនទាន់បានការងារធ្វើភ្លាមៗ យើងមានទីភ្នាក់ងារជាតិមុខរបរនិងការងារ ដើម្បីចុះឈ្មោះបងប្អូនដែលកំពុងរៀនទៅស្វែងរកការងារ ពោលគឺនៅពេលដែលសិស្សនិស្សិតរៀនជិតចប់ គឺទីភ្នាក់ងារជាតិ និងមុខរបរ នឹងជួយផ្គូរផ្គងការងារដែលមាន ជាមួយ​នឹងអ្នកដែលកំពុងរៀន ដើម្បីធានាថា ពេលរៀនចប់ ពួកគេមានការងារធ្វើភ្លាម៕