ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អំពើហិង្សាលើស្រ្តី និងក្មេងស្រី ជាបញ្ហាសង្គមធ្ងន់ធ្ងរមួយ ដែលមានផលប៉ះពាល់ដល់ជីវិតរស់នៅ និងសិទ្ធិមនុស្ស។ ជាការសង្កេតរបស់លោកបណ្ឌិត ឌៀន សុផល សាស្រ្តាចារ្យប្រវត្តិសាស្រ្ត និងទំនាក់ទំនងអន្តរជាតិ ស្រ្តីនិងក្មេងស្រីនាពេលបច្ចុប្បន្ន អាចប្រទះនឹងអំពើហិង្សាច្រើនបែប ដោយអាចកើតមានតាមរយៈវាយដំ ដែលគេហៅថា ជាអំពើហិង្សាដោយផ្ទាល់ និងអំពើហិង្សាលើផ្លូវចិត្តដោយការផិតក្បត់ ឬមិនបង្ហាញភាពស្មោះត្រង់ក្នុងជីវិតជាគូរ។
មិនមែនតែចំពោះសេចក្ដីស្នេហានោះទេ សូម្បីតែការលាក់កំបាំងហិរញ្ញវត្ថុមួយចំនួនមិនឱ្យដៃគូដឹង ក៏ជាអំពើហិង្សាមួយដែរ។ លោកបណ្ឌិតបន្ថែមថា មូលហេតុដែលជំរុញឱ្យកើតមានអំពើហិង្សា បើនិយាយជារួម គឺបុគ្គលដែលប្រព្រឹត្តអំពើហិង្សា បណ្តាលមកពីធ្លាក់ចុះនៃភាពឧត្តុងឧត្តមជាមនុស្ស ព្រមជាមួយកត្តារួមផ្សំផ្សេងទៀតដូចជា ៖
១. សម្ពាធហិរញ្ញវត្ថុ ៖ ការធ្លាក់ចុះទាំងនេះ ជាប់ពាក់ព័ន្ធនឹងហិរញ្ញវត្ថុ ដោយសារតែមានទ្រព្យច្រើន ជំរុញឱ្យបុគ្គលមួយចំនួនអាងអំណាចទឹកប្រាក់ដែលមាននៅក្នុងដៃធ្វើឱ្យពួកគេកាន់តែក្លាហានប្រព្រ្តឹត្តអំពើហិង្សាដោយឥតកោតក្រែង។
២. មានសិទ្ធតួនាទី ៖ អាងខ្លួនឯងជាអ្នកធានារ៉ាប់រងចិញ្ចឹម ដែលធ្វើឱ្យសមាជិកនៅក្នុងបន្ទុក ឬក្រោមបង្គាប់មិនអាចទទួលតម្លៃក្នុងនាមជាមនុស្ស ហើយបង្កើនបាននូវការសម្រេចចិត្តប្រកបដោយភាពអត្តនោម័តិ។
៣.ប្រើប្រាស់គ្រឿងស្រវឹង ៖ តាមប្រសាសន៍លោកបណ្ឌិត ការជំរុញឱ្យមានហិង្សា អាចបណ្តាលមកពីគ្រឿងស្រវឹង ព្រោះនៅពេលដែលបរិភោគ ឬពិសាសារធាតុអាល់កុលចូលទៅក្នុងខ្លួន នោះឧត្តមភាពជាមនុស្ស នឹងបាត់បង់ទៅតាមហ្នឹងដែរ។
“មិនមែនមានតែសញ្ញាប័ត្រទេ ដែលបង្ហាញពីភាពឧត្តុងឧត្តមរបស់មនុស្ស តែការប្រព្រ្តឹត្តជាក់ស្ដែងក៏បានបង្ហាញឧត្តមភាពជាមនុស្សដែរ”
អំពើហិង្សាមានកត្តាជាច្រើនទៀតរួមផ្សំ ប៉ុន្តែនៅពេលដែលបុគ្គលណាម្នាក់បាត់បង់ឧត្តមភាពក្នុងនាមជាមនុស្ស នោះធម្មជាតិរបស់មនុស្ស ឬក៏ភាពអញនិយមកើនឡើង នោះអំពើហិង្សានឹងកើតឡើងជាមួយមិនខាន។ ក្នុងន័យនេះ ការពង្រឹងឧត្តមភាពជាមនុស្សជំរុញអ្នកទាំងអស់គ្នាស្គាល់ពីតម្លៃខ្លួនឯង និងតម្លៃរបស់អ្នកដែលរស់នៅជុំវិញខ្លួន ដើម្បីរួមចំណែកបង្កើនបរិយាកាសសុវត្ថិភាព ជាពិសេសចំពោះស្រ្តី និងក្មេងស្រី៕
