រាល់ពេលមានថ្ងៃឈប់សម្រាក ពិធីបុណ្យទាន និងការជួបជុំ យុវជន និងអ្នកធ្វើការនៅទីក្រុង នឹងត្រូវត្រឡប់ទៅស្រុកកំណើត ដើម្បីសម្រាក ធ្វើបុណ្យ ជួបជុំគ្រួសារ និងសាច់ញាតិ។ នៅអំឡុងពេលនេះ យុវជនខ្មែរមួយចំនួន តែងទទួលបាននូវការសួរសំណួរផ្សេងៗពីអ្នកជិតខាង មិត្តភក្ដិ និងអ្នកស្គាល់គ្នា ជាពិសេស គឺការសួរអំពីប្រាក់ចំណូល គូស្រករ និងអាជីព ឬមុខរបរ។ ត្បិតជាការសួរនាំ ពេលជួបជុំ ឬពេលជួបគ្នា ប៉ុន្តែបើតាមអ្នកជំនាញចិត្តសាស្ត្រ ការសួរសំណួរទាំងនេះ អាចប៉ះពាល់អារម្មណ៍ អ្នកដែលមានផ្លូវចិត្តទន់ខ្សោយ។

លោក ស៊ាង លាប អ្នកជំនាញចិត្តសាស្រ្ត នៃអង្គការ TPO មានប្រសាសន៍ថា សម្រាប់យុវជន ការសួរសំណួរអំពី បញ្ហាផ្ទាល់ខ្លួន គឺជាសំណួរចាក់ដោត ដែលនាំឱ្យប៉ះពាល់អារម្មណ៍ និងអាចធ្វើឱ្យយុវជនមួយចំនួនមិនហ៊ានទៅស្រុកកំណើត ដើម្បីជួបជុំមិត្តភក្ដិ សាច់ញាតិ បងប្អូន ព្រោះមិនចង់ឮ និងឆ្លើយសំណួរ។

អ្នកជំនាញចិត្តសាស្ត្ររូបនេះ បញ្ជាក់ថា មានកត្តាចម្បង ៣ ដែលធ្វើឱ្យការសួរសំណួរអំពីបញ្ហាផ្ទាល់ខ្លួន នាំឱ្យប៉ះពាល់អារម្មណ៍យុវជន។ ទី១ សំណួរទាំងនោះ នាំឱ្យមានការប្រៀបធៀប, លោកបញ្ជាក់ថា ការប្រៀបធៀប គឺជាការប្រហារផ្លូវចិត្តខ្លាំងបំផុត ព្រោះនៅពេលដែលគេដឹងថា មនុស្សម្នាក់រៀបការ មានគូស្រករ ធ្វើការមានប្រាក់ខែ និងមានអាជីព គេតែងតែនិយាយប្រៀបធៀប ជាមួយបុគ្គលឯទៀត។ ទី២ សំណួរអំពីរឿងផ្ទាល់ខ្លួន ជាចំណុចរំញោច, ចំណុចនេះបានឆ្លុះបញ្ចាំងពីសមត្ថភាពផ្ទាល់ខ្លួនរបស់មនុស្ស ហើយជាធម្មតាសម្រាប់យុវជន គឺងាយមានការឱ្យតម្លៃខ្លួនទាប និងខ្វះការជឿជាក់លើខ្លួនឯង ប្រសិនបើបុគ្គលម្នាក់នោះមានផ្លូវចិត្តទន់ខ្សោយ និងទី៣ ដោយហេតុថា សង្គមខ្មែរ ឱ្យតម្លៃលើលុយ និងឋានៈខ្លាំង នៅពេលដែលយុវជនទទួលបានការសួរសំណួរនេះ គឺប៉ះពាល់ផ្លូវចិត្តរបស់គេខ្លាំងដូចគ្នា ប្រសិនបើសាម៉ីខ្លួនខ្វះវិធីដោះស្រាយ។

ដើម្បីត្រៀមខ្លួន ប្រឈមមុខនឹងការសួរសំណួរទាំងនេះ ពេលទៅស្រុកកំណើត លោក ស៊ាង លាប បានបង្ហាញនូវវិធីសាស្ត្រចំនួន ២ សំខាន់, ទី១ រក្សាភាពវិជ្ជមាន លោកបន្តថា ការរក្សាចិត្តគំនិតវិជ្ជមាន ពិតជាមានសារៈសំខាន់ណាស់ ព្រោះ ប្រសិនបើមនុស្សម្នាក់រក្សាភាពវិជ្ជមានបាន ហើយបើកចិត្តទទួលយក និងបន្តខិតខំប្រឹងប្រែងអភិវឌ្ឍខ្លួន នោះគាត់នឹងអាចប្រឈមនឹងការសួរនាំទាំងនេះ និងទី២ ពង្រឹងភាពជឿជាក់ និងឱ្យតម្លៃខ្លួនឯងខ្ពស់, បើតាមលោក ស៊ាង លាប ចំណុចនេះសំខាន់ ព្រោះចំណុចទាំងពីរនេះ អាចកំណត់ជោគវាសនារបស់មនុស្ស, ប្រសិនបើបុគ្គលម្នាក់ខ្វះចំណុចទាំង២នេះ នឹងអាចប៉ះពាល់ដល់ អនាគតរបស់គាត់ជាមិនខាន មិនថាក្នុងអាជីព ឬជីវិតផ្ទាល់ខ្លួននោះទេ។

ចំពោះយុវជន និងអ្នកដែលកំពុងមានសម្ពាធផ្លូវចិត្ត ដោយសារការសួរសំណួរទាំងនេះ លោកបានចែករំលែកនូវ ដំណោះស្រាយ ចំនួន ៥ សំខាន់ៗ ដើម្បីរំដោះខ្លួនចេញពីសម្ពាធ គឺ ទី១ ត្រូវស្គាល់ខ្លួនឯង, អ្នកជំនាញរូបនេះបានសង្កត់ធ្ងន់ថា ការស្គាល់ខ្លួនឯងនេះសំខាន់ណាស់ ព្រោះនៅពេលដែលយុវជនស្គាល់ខ្លួនឯងច្បាស់ នឹងធ្វើឱ្យយុវជនស្គាល់ពីគុណតម្លៃខ្លួនឯង ហើយនៅពេលដែលអាចកំណត់បាននូវអ្វី ដែលជាគុណតម្លៃរបស់ខ្លួនឯង វាជាមូលដ្ឋានគ្រឹះសំខាន់សម្រាប់ផ្លូវចិត្ត។ ទី២ បញ្ញាបេះដូង, លោកបានបញ្ជាក់ថា នេះជារឿងមួយ ដែលត្រូវគិតគូរ និងស្វែងយល់រៀនសូត្រ ដើម្បីច្បាស់ថាតើ យើងគួរធ្វើដូចម្ដេច ដើម្បីឱ្យបញ្ញាបេះដូងយើងខ្លាំង ព្រោះនៅក្នុងចិត្តសាស្ត្រ កត្តាកំណត់ភាពជោគជ័យ គឺបញ្ញាខួរក្បាល មានត្រឹមតែ ២០ភាគរយប៉ុណ្ណោះ ប៉ុន្តែបញ្ញាបេះដូង មានរហូតដល់ ៨០ភាគរយ។

ទី៣ បណ្ដុះផ្នត់គំនិតរីកចម្រើន ព្រោះជាធម្មតា មនុស្សដែលមានផ្លូវចិត្តទន់ខ្សោយ គឺជាមនុស្ស ដែលមានផ្នត់គំនិតអវិជ្ជមាន ឬក៏ផ្នត់គំនិតអន់ថយ។ ទី៤ បើកចិត្តទទួលស្គាល់ និងរៀនផ្លាស់ប្ដូរ នៅពេលដែលបុគ្គលម្នាក់អាចទទួលស្គាល់ការពិត ហើយរៀនផ្លាស់ប្ដូរចំណុចខ្សោយ និងផលិតគំនិតអវិជ្ជមានខ្លួនឯង នោះផ្លូវចិត្តគាត់នឹងរឹងមាំល្អ និងចំណុចទី៥ រៀនគិតវិជ្ជមាន លោកបានបញ្ជាក់ថា សម្ដីអ្នកដទៃ គឺមិនខុសអំពីគ្រាប់ភ្លៀងនោះទេ ប្រសិនបើបុគ្គលម្នាក់ផ្ដោតលើដំណោះស្រាយជាជម្រើស, គាត់នឹងអាចការពារខ្លួនយើងមិនឱ្យទទឹកបាន ហើយបុគ្គលម្នាក់នោះ នៅតែអាចចេញក្រៅ និងចេញទៅណា ដែលគាត់ចង់ធ្វើបានដដែល៕