ភ្នំពេញ – នាឱកាសតាំងបង្ហាញឧបករណ៍និងបច្ចេកវិទ្យានៃពិព័រណ៌ជាតិ-អន្តរជាតិ ស្តីពី “វិទ្យាសាស្ត្រ បច្ចេកវិទ្យា និងនវានុវត្តន៍” លើកទី១ មានបច្ចេកវិទ្យាថ្មីៗជាច្រើនបានដាក់បង្ហាញនៅតាមស្តង់ពិព័រណ៍នីមួយៗ ។ បច្ចេកវិទ្យា បរិក្ខាអេឡិចត្រូនិក និងសម្ភារៈទាំងនោះកើតឡើងដោយគំនិតច្នៃប្រតិដ្ឋថ្មីរបស់សិស្ស និស្សិត និងអ្នកស្រឡាញ់បច្ចេកវិទ្យានៅកម្ពុជា ។

យុវតី ខម ស្រីភាព និស្សិតជនជាតិដើមភាគតិចសិក្សាជំនាញអគ្គិសនីឆ្នាំទី២ នៅមជ្ឈមណ្ឌលបណ្តុះបណ្តាលវិជ្ជាជីវៈ ខេត្តរតនៈគីរី បានដាក់តាំងបង្ហាញស្នាដៃបង្កើតគ្រឿងបង្គុំអគ្គិសនីសម្រាប់តាំងលម្អនៅក្នុងពិព័រណ៌ជាតិ-អន្តរជាតិ ស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ ។ គ្រឿងបង្គុំអគ្គិសនីសម្រាប់តាំងលម្អជាសមិទ្ធផលកែច្នៃរួមគ្នារបស់ក្រុមនិស្សិតរួមជំនាន់សិក្សាជំនាញអគ្គិសនី ។

បរិក្ខាគ្រឿងបង្គុំអគ្គិសនីខាងលើប្រើប្រាស់សម្រាប់តាំងលម្អនៅតាមហាងកាហ្វេ សណ្ឋាគារ និងគេហដ្ឋានតាមចំណង់ចំណូលចិត្ត ។ បរិក្ខាគ្រឿងបង្គុំអគ្គិសនីដ៏ស្រស់ស្អាតនេះ បានផ្សំផ្គុំឡើងពីវត្ថុធាតុដើមចាស់ៗ យកមកកែច្នៃដើម្បីប្រើប្រាស់ឡើងវិញ មានដូចជា បំពង់ទុយោទឹក ក្បាលទុយោបូមទឹក ដើមឬស្សី អំពូលភ្លើងតូចធំ ខ្នងកង់ ខ្នងម៉ូតូ វិទ្យុ នាឡិកា ព្រមទាំងសម្ភារៈចាស់ៗផ្សេងទៀត ។

យុវតី ខម ស្រីភាព បាននិយាយថា ៖ “ខ្ញុំមានគំនិតបី ទីមួយចង់បង្ហាញស្នាដៃទាំងនេះទៅកាន់សិស្សប្អូនថា និស្សិតសិក្សាជំនាញអគ្គិសនីមិនមែនមានន័យថា ចេះតែតភ្លើងមួយមុខនោះទេ យើងអាចរៀបចំបរិក្ខាតាំងលម្អនានាដោយគំនិតច្នៃប្រតិដ្ឋផ្ទាល់ ។ ទីពីរខ្ញុំចង់កែច្នៃរបស់របរដែលបោះចោលឱ្យមានតម្លៃ ឬកែច្នៃសំរាមឱ្យជារបស់មានប្រយោជន៍  និងទី៣ ខ្ញុំចង់បង្ហាញទៅសាធារណជនឱ្យគិតដល់បរិស្ថាន និងស្រឡាញ់បរិស្ថានរស់នៅ” ។

និយាយពន្យល់ពីមូលហេតុបង្កើតស្នាដៃថ្មីរបស់ក្រុមផង និងបង្ហាញពីគោលបំណងផ្ទាល់ខ្លួនផង កញ្ញា ខម ស្រីភាព បានឱ្យដឹងទៀតថា បច្ចុប្បន្នជំនាញអគ្គិសនីពុំមានស្ត្រីសិក្សាច្រើននោះទេ ព្រោះជំនាញនេះភាគច្រើនអ្នកសិក្សាជាបុរស ។ សម្រាប់កញ្ញា ខម ស្រីភាព មានបំណងផ្លាស់ប្តូរទស្សនៈនេះដោយចាប់ផ្តើមជ្រើសរើសជំនាញអគ្គិសនីនៅមជ្ឈមណ្ឌលបណ្តុះបណ្តាលវិជ្ជាជីវៈ ខេត្តរតនៈគីរី កាលពីឆ្នាំ២០២១ ។

កញ្ញា ខម ស្រីភាព បាននិយាយអមដោយស្នាមញញឹមថា ៖

“ខ្ញុំមានបំណងបង្ហាញពីការចូលរួមរបស់ស្រ្តីក្នុងវិស័យបច្ចេកវិទ្យា និងទស្សនៈយេឌ័រនៅក្នុងសង្គម ព្រោះការងារអគ្គីសនីបុរសអាចធ្វើបាន យើងស្រ្តីក៏អាចធ្វើបានដូចគ្នា វាមិនសំខាន់ថា បុរសឬស្រ្តីទេ តែសំខាន់យើងជាអ្នកជ្រើសរើស”

ជំនាញអគ្គិសនី និងអេឡិចត្រូនិក ជាជំនាញមួយនៅក្នុងជំនាញបណ្តុះបណ្តាលបច្ចេកទេស និងវិជ្ជាជីវៈ (TVET) ។ ជំនាញអគ្គិសនី និងអេឡិចត្រូនិក គឺជាផ្នែកមួយនៃវិទ្យាសាស្រ្តដែលទាក់ទងនឹងការប្រើប្រាស់អគ្គិសនីអេឡិចត្រូនិក និងអេឡិចត្រូម៉ាញ៉េទិច ។ ជំនាញនេះពិតជាសំខាន់ ព្រមទាំងផ្តល់សារៈប្រយោជន៍ជាច្រើនដល់សង្គម និងប្រជាជន ។ បច្ចុប្បន្នរាជរដ្ឋាភិបាលតាមរយៈក្រសួងការងារ និងបណ្តុះបណ្តាលវិជ្ជាជីវៈ បានលើកទឹកចិត្តឱ្យយុវជនកម្ពុជាសិក្សាជំនាញនេះ ពិសេសជំនាញផ្សេងដែលស្ថិតនៅក្នុងចំណោមជំនាញបណ្តុះបណ្តាលបច្ចេកទេស និងវិជ្ជាជីវៈ (TVET) ។

មុននឹងបញ្ចប់កិច្ចសន្ទនាជាមួយ AMS Education កញ្ញា ខម ស្រីភាព បាននិយាយថា អនាគតបន្ទាប់ពីបញ្ចប់ការសិក្សាថ្នាក់សញ្ញាបត្រជំនាញបច្ចេកទេសអគ្គិសនី រូបគេមានបំណងបន្តការសិក្សាយកបរិញ្ញាបត្រជំនាញអគ្គិសនីនៅរាជធានីភ្នំពេញ ដោយយុវតីរូបនេះសម្លឹងឃើញថា កម្ពុជាកំពុងត្រូវការអ្នកជំនាញអគ្គីសនី និងអេឡិចត្រូនិក ។

“ខ្ញុំជឿថា ពេលរៀនចប់បើខ្ញុំមិនបានធ្វើការងារនៅស្ថាប័នណាមួយ ក៏មានការងារធ្វើដែរជំនាញនេះ ! ខ្ញុំចង់ចូលបម្រើការងារនៅអគ្គិសនីកម្ពុជា តែបើមិនបានធ្វើទេ ខ្ញុំអាចបើកកន្លែងលក់ដូរគ្រឿងអគ្គីសនីមួយក៏បាន” ។ នេះបើតាមការបញ្ជាប់របស់យុវតី ខម ស្រីភាព និស្សិតជនជាតិដើមភាគតិចសិក្សាជំនាញអគ្គិសនី នៅមជ្ឈមណ្ឌលបណ្តុះបណ្តាលវិជ្ជាជីវៈ ខេត្តរតនៈគីរី ៕