បច្ចុប្បន្នមានមនុស្សមួយចំនួនមើលឃើញថា មុននឹងប្រតិបត្តិការងារ ឬក៏ការចាប់ផ្តើមថ្ងៃថ្មី គឺត្រូវស្រវាយកកែវកាហ្វេ១ពែងសិន! ដែលសកម្មភាពនេះ ហាក់ក្លាយជាទម្លាប់ ​​​​​​ឬ​​​​​​​​​​​​​​​​​​​​​​​​​​​​​​​​​​ស្តង់​​​ដាក្នុងការស់នៅប្រចាំថ្ងៃទៅហើយ ពីព្រោះវាជំរុញបាននូវផលិតភាពបន្ថែម។ យ៉ាងណាមិញ សម្រាប់មនុស្សមួយចំនួនទៀត មិនបានចាត់ទុកភេសជ្ជៈបែបនេះជាជម្រើសនោះទេ ដោយស្ថិតក្រោមហេតុផលខុសៗគ្នា។ ដូច្នេះតើមានភេសជ្ជៈណាផ្សេងអាចជំនួសកាហ្វេបានទេ? ពិតណាស់គឺមាន បើតាមគេហទំព័រ cleanplates បានឱ្យដឹងថា តែបៃតង ក៏ជាជម្រើសល្អមួយ សម្រាប់យកទៅ ឆុងឬចម្រាញជាភេសជ្ជៈដើម្បីទទួលទានបានដែរ ហើយវាក៏មានប្រជាប្រិយភាពខ្ចរខ្ចាយ ជុំវិញពិភពលោក រួមទាំងទ្រទ្រង់នូវសុខភាពទៀតផង។

បន្ថែមពីនោះ តែបៃតង មិនត្រឹមតែជំរុញស្មារតី ឬកម្លាំងថាមពលឱ្យស្រស់ថ្លា ។ ខាងក្រោមនេះ ជាអត្ថប្រយោន៍ទាំង៥ ចំពោះការទទួលទានតែបៃតង ៖​

១. សម្រួលប្រព័ន្ធដំណើរការខួរក្បាល ៖ ដោយហេតុថា តែឬក៏តែបៃតង មានលទ្ធភាពជួយកាត់បន្ថយការថប់បារម្ភ និងពង្រឹងបាននូវស្មារតី ពង្រឹងការយល់ដឹង ការយកចិត្តទុកដាក់ចំពោះអ្វីមួយ ការផ្តោត និងការចងចាំជាដើម។

២. កាត់បន្ថយមហារីកមួយចំនួន ៖ មូលហេតុដែល តែបៃតង មានសមត្ថភាពអាចកាត់បន្ថយជំងឺមហារីកមួយចំនួន គឺដោយសារ ភេសជ្ជៈបែបនេះ មានសារធាតុប្រឆាំងអុកស៊ីតកម្ម ព្រមទាំងមានតួនាទីកាត់បន្ថយភាពតានតឹង ឬបញ្ចៀសការរលាកក្នុងរាងកាយនៃផ្នែកណាមួយ។

៣. បញ្ចៀសឬការពារពីជំងឺទឹកនោមផ្អែមប្រភេទទី២ ៖ គួរជម្រាបជូនថា ជំងឺទឹកនោមផ្អែមប្រភេទទី២ គឺជាជំងឺរ៉ាំរ៉ៃដែលប៉ះពាល់ដល់ការរំលាយអាហារ ជាពិសេសការបំប្លែងអាហារដែលបរិភោគឱ្យបង្កើននូវថាមពលដល់រាងកាយ ហើយការទទួលទាន តែបៃតង ជាចំណែកក្នុងការដោះស្រាយបញ្ហានេះ ព្រមទាំងអាចកាត់បន្ថយកម្រិតជាតិស្ករក្នុងឈាមបាន។ ទន្ទឹមគ្នានោះ ការស្រាវជ្រាវក៏បានរកឃើញដែរថា ការទទួលទានតែបៃតង ចំនួនបួនពែង ក្នុងមួយថ្ងៃ ជួយដោះស្រាយបញ្ហាលើសទម្ងន់ ជួយបញ្ចុះសម្ពាធឈាម ដែលមានអត្ថប្រយោជន៍ ជាពិសេសសម្រាប់អ្នកមានជំងឺទឹកនោមផ្អែម។

៤. តែបៃតងជួយសម្រកទម្ងន់ ៖ ជាតិកាហ្វេអ៊ីន នៅក្នុងតែបៃតង គឺជាភ្នាក់ងារដែលមានសារធាតុរំញោច ហើយការស្រាវជ្រាវបានរកឃើញថា វាមានតួនាទីដុតបំផ្លាញជាតិខ្លាញ់ផងដែរ ដោយកត្តានេះជួយសម្រួលដល់ អ្នកដែលមានបំណងចង់សម្រកទម្ងន់ ឬចង់កាត់បន្ថយជាតិខ្លាញ់ក្នុងខ្លួនជាដើម។

៥. តែបៃតងជួយបញ្ចៀសបញ្ហាបេះដូង ៖ តែបៃតង ក៏មានតួនាទីជួយជំរុញសុខភាពបេះដូងឱ្យមានភាពល្អប្រសើរ និងកាត់បន្ថយការរលាក ព្រមទាំងកាត់បន្ថយកម្រិតកូឡេស្តេរ៉ុលក្នុងឈាម៕