តាមរយៈ​ស្ថានទូត​ចិន​ប្រចាំ​ព្រះរាជាណាចក្រ​កម្ពុជា សហការជាមួយ​សហភាពសហព័ន្ធ​យុវជន​កម្ពុជា នឹងផ្តល់​អាហារូបករណ៍​ដល់​យុវជន​កម្ពុជា​ដើម្បី​បន្ត​ការសិក្សា​ថ្នាក់​ឧត្តមសិក្សា​នៅ​ប្រទេសចិនសម្រាប់ឆ្នាំសិក្សា​២០២៥។

អាហារូបករណ៍ផ្តល់ជូន​សម្រាប់ការសិក្សា​គ្រប់មុខជំនាញ នៃកម្រិតសិក្សា ថ្នាក់បរិញ្ញាបត្រ (សិក្សា​ជាភាសាចិន), ថ្នាក់បរិញ្ញាបត្រជាន់ខ្ពស់ (សិក្សា​ជាភាសាចិន ឬអង់គ្លេស) និងថ្នាក់បណ្ឌិត (សិក្សា​ជាភាសាចិន ឬអង់គ្លេស)។

អត្ថប្រយោជន៍ ៖ និស្សិតជ័យលាភី​អាហារូបករណ៍​គ្រប់កម្រិត​នឹងទទួល​បានអត្ថប្រយោជន៍​ដូចជា ថ្លៃសិក្សា ប្រាក់​ឧបត្ថម្ភ​ប្រចាំខែ និង​ការស្នាក់​នៅ​ឥតគិតថ្លៃ​រហូត​ចប់​ការ​សិក្សា​នៅ​សាធារណរដ្ឋប្រជាមានិតចិន (ថ្លៃសំបុត្រ​យន្តហោះ​ជា​បន្ទុក​របស់បេក្ខជន)។

លក្ខខណ្ឌ​ចាំបាច់​ដើម្បីដាក់ពាក្យ​ប្រកួត​ប្រជែង ៖ ថ្នាក់បរិញ្ញាបត្រ ត្រូវ​មានអាយុក្រោម២៥ឆ្នាំ, ថ្នាក់បរិញ្ញាបត្រជាន់ខ្ពស់ មានអាយុក្រោម៣៥ឆ្នាំ និង​ថ្នាក់បណ្ឌិត​ត្រូវ​មានអាយុ​ក្រោម៤០ឆ្នាំ, លិខិតឆ្លងដែនដែលមានសុពលភាពយូរជាង​ថ្ងៃទី០១ ខែមីនា ឆ្នាំ២០២៦, សញ្ញាបត្របាក់ឌុប ឬសមមូល (សម្រាប់ថ្នាក់បរិញ្ញាបត្រ), សញ្ញាបត្របរិញ្ញាបត្រ ឬសមមូល (សម្រាប់ថ្នាក់បរិញ្ញាបត្រជាន់ខ្ពស់) និង​សញ្ញាបត្រ​បរិញ្ញាបត្រជាន់ខ្ពស់ ឬសមមូល (សម្រាប់ថ្នាក់បណ្ឌិត), ព្រឹត្តិបត្រពិន្ទុ, ត្រូវមានសមត្ថភាពភាសាអង់គ្លេស ឬចិន ដែលអា​ចប្រើប្រាស់​បានផ្លូវការ ដោយភ្ជាប់មក​ជាមួយ​ឯកសារ​បញ្ជាក់កម្រិតសិក្សា បើមាន ដូចជា HSK Certificate និង​ IELTS ឬ​ឯកសារ​បញ្ជាក់ផ្សេងៗ, ប្រវត្តិរូបសង្ខេប​ជាភាសាអង់គ្លេស, Personal Statement ឬ​ Motivation Letter មិនលើសពីមួយ​ទំព័រ, Research Proposal (សម្រាប់បេក្ខជនថ្នាក់បណ្ឌិត)។

បេក្ខជនដែលមានចំណាប់អារម្មណ៍​សូមដាក់ពាក្យ​ទៅ​តាម គណៈកម្មាធិការ ស.ស.យ.ក. រាជធានី-ខេត្ត ហើយ​ការ​ជ្រើសរើស​ត្រូវ​ធ្វើពីរដំណាក់កាល ដោយ​ដំណាក់កាលទី១ ត្រូវ​ជ្រើសរើស​បឋម ដោយ​ឆ្លង​កាត់​វគ្គ Screening និងវគ្គសម្ភាសន៍ ហើយ​ដំណាក់កាលទី២ បេក្ខជន​ដែលត្រូវ​ជ្រើសរើស​ក្នុងដំណាក់កាលទី១ នឹង​ត្រូវ​បានទាក់ទង​តាមរយៈ​អ៊ីមែល ឬលេខទូរស័ព្ទ សម្រាប់ការ​បំពេញ​ពាក្យ​តាម​ប្រព័ន្ធ Online របស់អាហារូបករណ៍រដ្ឋាភិបាលចិន។

កាលបរិច្ឆេទទទួលពាក្យ ៖ បេក្ខជនដែលបានបំពេញលក្ខខណ្ឌចាំបាច់ និង​នីតិវិធី​ដូចបញ្ជាក់ខាងលើ ត្រូវ​បំពេញ​ទម្រង់បែបបទ​ជាភាសាអង់គ្លេស​សម្រាប់​ការ​ប្រកួតប្រជែង​ដំណាក់កាលទី១ ចាប់ពីថ្ងៃជូនដំណឹង​នេះ រហូត​ដល់ថ្ងៃទី២៧ ខែធ្នូ ឆ្នាំ​២០២៤ វេលាម៉ោង ២៣:៥៩នាទីយប់។ សម្រាប់ព័ត៌មានបន្ថែម សូមទំនាក់ទំនង​ទូរស័ព្ទ ឬតេលេក្រាម 096 379 965៕