ក្រសួងអប់រំ យុវជន និងកីឡា ប្រកាសប្រឡងជ្រើសរើសគ្រូបង្រៀនដែលកំពុងបង្រៀននៅតាមសាលាបឋមសិក្សា មធ្យមសិក្សា និងសាលាគរុកោសល្យទៅសិក្សាអាហារូបករណ៍នៃកម្មវិធី Teacher Training Students នៅប្រទេសជប៉ុន សម្រាប់ឆ្នាំ២០២៤។

នេះជាកម្មវិធីអាហារូបករណ៍ Teacher Training Students របស់ក្រសួងអប់រំ វប្បធម៌ កីឡា វិទ្យាសាស្រ្ត និងបច្ចេកវិទ្យា នៃប្រទេសជប៉ុន ផ្ដល់សម្រាប់គ្រូបង្រៀនកម្ពុជា ដើម្បីទៅសិក្សាស្រាវជ្រាវលើវិស័យអប់រំនៅប្រទេសជប៉ុនចាប់ពីខែកញ្ញា ឬតុលា ឆ្នាំ២០២៤។

ជំនាញដែលត្រូវសិក្សាស្រាវជ្រាវមាន ការគ្រប់គ្រងការអប់រំ (Education Administration) វិធីសាស្រ្តអប់រំ (Educational methods) ការសិក្សាស្រាវជ្រាវ មុខវិជ្ជាពិសេស (Specialized Subject​ Research) និងការសង្កេត និងការអនុវត្ត (Observation Tours and practice)។

លក្ខខណ្ឌនៃការចុះឈ្មោះប្រឡងអាហារូបករណ៍ ៖ ជាបេក្ខជនមានសញ្ជាតិខ្មែរ បានបញ្ចប់ការសិក្សាពីសាលាគរុកោសល្យណាមួយ និងកំពុងបង្រៀននៅតាមសាលាបឋមសិក្សា ឬមធ្យមសិក្សា ឬសាលាគរុកោសល្យនានា នៅកម្ពុជាដែលមានរយៈពេលបំពេញការងារយ៉ាងតិច៥ឆ្នាំ គិតត្រឹមថ្ងៃទី០១ ខែតុលា ឆ្នាំ២០២៤។ ជាមួយគ្នានេះ បេក្ខជនត្រូវមានអាយុមិនលើស៣៥ឆ្នាំ មានចំណេះដឹងភាសាអង់គ្លេសកម្រិតមធ្យម និងមានឆន្ទៈសិក្សាភាសាជប៉ុន មានសុខភាពល្អបរិបូរណ៍ទាងកាយសម្បទា និងសតិបញ្ញា។

បេក្ខជនដែលមានចំណាប់អារម្មណ៍ក្នុងការដាក់ពាក្យ សូមទាញយកពាក្យស្នើសុំអាហារូបករណ៍ជាភាសាអង់គ្លេសដែលមានក្នុងគេហទំព័ររបស់ស្ថានទូតជប៉ុនប្រចាំព្រះរាជាណាចក្រកម្ពុជា៖ https://link.moeys.gov.kh/xd9mo1 និងពាក្យសុំអាហារូបករណ៍ជាភាសាខ្មែរតាមរយៈ https://cdn2.me-qr.com/pdf/18502270.pdf សម្រាប់បំពេញ។ ជាមួយគ្នានេះ បេក្ខជនត្រូវភ្ជាប់​ឯកសារចាំបាច់ដូចជា ព្រឹត្តិបត្តិពិន្ទុពីសាលាគរុកោសល្យណាមួយដែលបេក្ខជនបានសិក្សា (មជ្ឈមណ្ឌលគរុកោសល្យភូមិភាគ សាលាគរុកោសល្យ និងវិក្រឹតការខេត្តជាដើម) រួចយកពាក្យទៅដាក់នៅការិយាល័យអាហារូបករណ៍ និងកម្មសិក្សានៃនាយកដ្ឋានទំនាក់ទំនងវប្បធម៌ និងអាហារូបករណ៍ដែលមានអាសយដ្ឋាន​ អគារលេខ២៣ ផ្លូវលេខ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ ឱ្យបានមុនថ្ងៃទី២៦ ខែមករា ឆ្នាំ២០២៤ ម៉ោង ៤:០០ រសៀល។

ការប្រឡងជ្រើសរើស ក្រសួងអប់រំ យុវជន និងកីឡា សហការជាមួយស្ថានទូត នឹងរៀបចំការប្រឡងសំណេរវិញ្ញាសារភាសាជប៉ុន និងភាសាអង់គ្លេស នៅថ្ងៃទី១២ ខែកុម្ភៈ ឆ្នាំ២០២៤ នៅស្ថានទូតជប៉ុន។

សម្រាប់ព័ត៌មានបន្ថែមអំពីអាហារូបករណ៍អាចទំនាក់ទំនងទៅកាន់ ០៩៨ ៩៨៩ ៧៨៩ ឬទាក់ទងផ្ទាល់ទៅកាន់ការិយាល័យអាហារូបករណ៍ និងកម្មសិក្សា នៃនាយកដ្ឋានទំនាក់ទំនងវប្បធម៌ និងអាហារូបករណ៍ តាមអាសយដ្ឋានខាងលើ៕