គណៈកម្មាកិធិការអាហារូបករណ៍សិស្ស-និស្សិតក្រីក្រ សម្ដេចអគ្គមហាសេនាបតីតេជោ ហ៊ុន​ សែន និងសម្ដេចកិត្តិព្រឹទ្ធបណ្ឌិត ប្រកាសផ្ដល់អាហារូបករណ៍ ថ្នាក់ភាសាចិន ថ្នាក់បរិញ្ញាបត្រ និងបរិញ្ញាបត្រជាន់ខ្ពស់ ឆ្នាំសិក្សា២០២៥-២០២៦។ អាហារូបករណ៍ផ្ដល់ជូនចំនួន ៧៨កន្លែងសិក្សានៅប្រទេសចិនលើកម្មវិធីសិក្សាទាំងបីខាងលើ។

អាហារូបករណ៍ផ្ដល់ជូនការសិក្សា ថ្នាក់ភាសាចិន សិក្សាជាភាសាចិនរយៈពេល១ឆ្នាំ ថ្នាក់បរិញ្ញាបត្រ សិក្សាជាភាសាចិនរយៈពេល៤ឆ្នាំ ថ្នាក់បរិញ្ញាបត្រជាន់ខ្ពស់ សិក្សាជាភាសាចិន ឬជាភាសាអង់គ្លេស រយៈពេល ២ ឬ៣ឆ្នាំ លើការសិក្សាជំនាញគ្រប់មុខ ។ កម្មវិធីអាហារូបករណ៍ផ្ដល់ជូនចំនួន ៤០កន្លែង ដោយផ្ដល់ជូន ថ្លៃសិក្សា កន្លែងស្នាក់នៅ និងប្រាក់ឧបត្ថម្ភប្រចាំខែ ចំណែក៣៨កន្លែង ផ្ដល់ជូនថ្លៃសិក្សា និងកន្លែងស្នាក់នៅ។

គ្រឹះស្ថានសិក្សាដែលអាហារូបករណ៍ផ្ដល់ជូនរួមមាន ៖ សាកលវិទ្យាល័យស៊ុតយ៉ាត់សេន, សាកលវិទ្យាល័យប៉េកាំងតិចណូឡូជី, សាកលវិទ្យាល័យយូណាននៃហិរញ្ញវត្ថុ និងសេដ្ឋកិច្ច, សាកលវិទ្យាល័យជីវជាំង និង សាកលវិទ្យាល័យហ៊ូចូវ។

លក្ខខណ្ឌនៃការដាក់ពាក្យ ៖

សម្រាប់ការស្នើសុំថ្នាក់ភាសាចិន ៖ បេក្ខជនទាំងពីរភេទត្រូវមានសញ្ជាតិខ្មែរ, មានសុខភាពល្អ និងសតិបញ្ញាល្អ មានអាយុក្រោម២៥ឆ្នាំ (គិតត្រឹមថ្ងៃដាក់ពាក្យ) មិនធ្លាប់ទទួលបានអាហារូបករណ៍ប្រភេទនេះ, មានសញ្ញាបត្រមធ្យមសិក្សាទុតិយភូមិ ឬសញ្ញាបត្រមានតម្លៃស្មើ(រៀបចំជា File.PDF) ភ្ជាប់សំណេរស្ដីពី « មូលហេតុដែលចង់ទៅសិក្សានៅប្រទេសចិន» ចំនួន៦០០-៧០០ពាក្យ ជាភាសាចិន (រៀបចំជា File Word)។

សម្រាប់ការស្នើសុំថ្នាក់បរិញ្ញាបត្រ បេក្ខជនទាំងពីរភេទត្រូវមានសញ្ជាតិខ្មែរ, មានសុខភាពល្អ និងសតិបញ្ញាល្អ មានអាយុក្រោម២៥ឆ្នាំ (គិតត្រឹមថ្ងៃដាក់ពាក្យ) ត្រូវជ្រើសរើសជំនាញយ៉ាងច្រើនចំនួន៣ជំនាញ, មានសញ្ញាបត្រមធ្យមសិក្សាទុតិយភូមិ ឬសញ្ញាបត្រមានតម្លៃស្មើ (រៀបចំជា File.PDF) មានចំណេះដឹងភាសាចិនល្អ និងត្រូវភ្ជាប់មកជាមួយ HSK Certificate ឬឯកសារបញ្ជាក់សមត្ថភាពការរៀនសូត្រភាសាចិន (រៀបចំជា File.PDF)។

សម្រាប់ការស្នើថ្នាក់បរិញ្ញាបត្រជាន់ខ្ពស់ បេក្ខជនទាំងពីរភេទត្រូវមាន សញ្ជាតិខ្មែរ មានអាយុមិនលើស ៣៥ឆ្នាំ(គិតត្រឹមថ្ងៃដាក់ពាក្យ) មានចំណេះដឹងភាសាអង់គ្លេស ឬភាសាចិន ហើយបេក្ខជនអាចជ្រើសរើសជំនាញយ៉ាងច្រើនចំនួន៣ និងមានសញ្ញាបត្រមធ្យមសិក្សាទុតិយភូមិ ឬសញ្ញាបត្រមានតម្លៃស្មើ (រៀបចំជា File.PDF) សញ្ញាបត្របរិញ្ញាបត្រ ឬសញ្ញាបត្រមានតម្លៃស្មើ (រៀបចំជា File.PDF) មានព្រឹត្តិបត្រពិន្ទុទាំងបួនឆ្នាំនៃថ្នាក់បរិញ្ញាបត្រ (រៀបចំជា File.PDF) និងភ្ជាប់ជាមួយ IELTS ឬ TOEFL ឬ Duokingo ឬ Certificate ឬឯកសារបញ្ជាក់ភាសាអង់គ្លេស ឬចិន (រៀបចំជា File.PDF) និងភ្ជាប់ Writing Research Proposal ជាភាសាអង់គ្លេស ឬចិន (រៀបចំជា File.PDF)។

បេក្ខជនដែលមានបំណងដាក់ពាក្យស្នើសុំអាហារូបករណ៍ ត្រូវបំពេញបែបបទតាមការណែនាំ ដោយទៅចុះឈ្មោះនៅស្នាក់ការអាហារូបករណ៍ ដែលមានអាសយដ្ឋាន ផ្ទះលេខ៤ ផ្លូវលេច៥២២ សង្កាត់បឹងកក់១ ខណ្ឌទួលគោក រាជធានីភ្នំពេញ នៅរៀងរាល់ម៉ោងធ្វើការ ពីច័ន្ទ-អាទិត្យ ម៉ោង ៨ព្រឹក ដល់១២ថ្ងៃត្រង់ និងម៉ោង២ ដល់៥រសៀល។ លើសពីនេះ បេក្ខជនត្រូវភ្ជាប់ជាមួយអត្តសញ្ញាណប័ណ្ណ ឬលិខិតឆ្លងដែន និងសៀវភៅគ្រួសារ ឬសៀវភៅស្នាក់នៅ (រៀបចំជា File.PDF) និងឯកសារដែលបានបញ្ជាក់ក្នុងលក្ខខណ្ឌសម្រាប់ស្នើសុំចុះឈ្មោះ។សម្រាប់ព័ត៌មានបន្ថែម អាចទំនាក់ទំនងទៅក្រុមការងារប្រចាំការអាហារូបករណ៍ ដែលមានអាសយដ្ឋាន ផ្ទះលេខ៤ ផ្លូវលេខ៥២២ សង្កាត់បឹងកក់១ ខណ្ឌទួលគោក រាជធានីភ្នំពេញ នៅរៀងរាល់ម៉ោងធ្វើការតាមរយៈតំណភ្ជាប់ https://t.me/+9q0zMIO6vrMyNWE1 ។ ផុតកំណត់ទទួលពាក្យ​ថ្ងៃទី២២ ខែមីនា ឆ្នាំ២០២៥ វេលាម៉ោង៥ល្ងាច៕